ஸ்டெர்லைட் ஆலை மூடல் ‘தமிழக அரசின் உத்தரவுக்குத் தடை விதிக்க முடியாது!’ பசுமைத் தீர்ப்பாயம்

Read Time:2 Minute, 18 Second

ஸ்டெர்லைட் ஆலையை மூட தமிழக அரசு பிறப்பித்த உத்தரவிற்கு இடைக்கால தடை விதிக்க பசுமைத் தீர்ப்பாயம் மறுத்துவிட்டது.

சுற்றுச்சூழல் சீர்கேடு ஏற்படுகிறது என்று தூத்துக்குடியில் உள்ள ஸ்டெர்லைட் ஆலையை மூடக்கோரி அப்பகுதி மக்கள் 3 மாதத்துக்கும் மேலாக போராட்டம் நடத்தினர்.

100-வது நாளாக கடந்த மே 22-ம் தேதி மாவட்ட ஆட்சியர் அலுவலகத்தை முற்றுகையிடும் போராட்டம் நடந்தது. அப்போது கலவரம் ஏற்பட்டதையடுத்து போலீஸார் நடத்திய துப்பாக்கிச் சூட்டில் 13 பேர் பரிதாபமாக இறந்தனர். 70-க்கும் மேற்பட்டோர் காயம் அடைந்தனர். இதனையடுத்து நீர் மற்றும் காற்று மாசு கட்டுப்பாட்டு சட்டத்தை முன்வைத்து, ஸ்டெர்லைட் ஆலையை தமிழக அரசு மூட உத்தரவிட்டது. இதனையடுத்து ஆலைக்கு சீல் வைக்கப்பட்டது.




இந்நிலையில் ஆலையை மூட தமிழக அரசு உத்தரவிட்டதை எதிர்த்து டெல்லி தேசிய பசுமைத் தீர்ப்பாயத்தில் வேதாந்தா நிறுவனம் மேல்முறையீடு செய்தது.

“அரசியல் காரண்த்துக்காகவும், மக்களின் போரட்டத்தை கட்டுப்படுத்தும் நோக்கில் தான் ஆலையை தமிழக அரசு மூடியுள்ளது” என்று ஸ்டெர்லைட் மனுவில் கூறப்பட்டிருப்பதாக ராய்ட்டர்ஸ் செய்தி நிறுவனம் செய்தி வெளியிட்டுள்ளது.

இதுதொடர்பான விசாரணையின் போது இருதரப்பு விசாரணையும் கேட்ட பசுமைத் தீர்ப்பாயம், ஸ்டெர்லைட் ஆலையை மூடுமாறு தமிழக அரசு பிறப்பித்த உத்தரவுக்கு இடைக்கால தடை விதிக்க மறுத்தது. மேலும் வழக்கில் 10 நாட்களுக்குள் தமிழக அரசு மற்றும் தமிழ்நாடு மாசு கட்டுப்பாடு வாரியம் பதிலளிக்க நோட்டீஸ் விடுத்த பசுமைத் தீர்ப்பாயம், வழக்கு விசாரணையை வருகிற 18–ந் தேதிக்கு ஒத்திவைத்தது.

Leave a Reply

Your email address will not be published. Required fields are marked *