பிரதமர் மோடியின் வெளிநாட்டு பயணத்திற்கு ரூ. 1,484 கோடி செலவு

Read Time:2 Minute, 52 Second

பிரதமர் மோடி இதுவரையில் 84 நாடுகளுக்கு பயணம் சென்றுள்ளதாகவும், சுற்றுப்பயணங்களுக்கு ரூ.1,484 கோடி செலவிடப்பட்டிருப்பதாகவும் மத்திய அரசு தெரிவித்துள்ளது.

பிரதமர் மோடியின் தலைமையிலான பா.ஜனதா அரசு 2014-ம் ஆண்டு மே மாதம் பதவியேற்றது. இதனையடுத்து பிரதமர் மோடியின் தொடர்ச்சியான வெளிநாட்டு பயணங்கள் விமர்சனத்திற்கு உள்ளாகியது. இப்போது 2014-ம் ஆண்டு ஜூன் மாதம் முதல் வெளிநாடுகளில் பிரதமர் நரேந்திர மோடி மேற்கொண்ட சுற்றுப்பயணங்களுக்கு ரூ.1,484 கோடி செலவிடப்பட்டிருப்பதாக மத்திய அரசு தெரிவித்துள்ளது.

மாநிலங்களவையில் வெளியுறவுத் துறை இணை அமைச்சர் வி.கே. சிங் தாக்கல் செய்த அறிக்கையில், நாட்டின் பிரதமராக கடந்த 2014-ம் ஆண்டு மே மாதம் பதவியேற்றது முதல் 42 முறை மோடி சுற்றுப்பயணம் மேற்கொண்டுள்ளார். அப்போது 84 வெளிநாடுகளுக்கு அவர் சென்றுள்ளார். கடந்த 2014-ம் ஆண்டு ஜூன் 15-ம் தேதி முதல், 2018-ம் ஆண்டு ஜூன் 10-ம் தேதி வரையிலான காலக்கட்டத்தில், பிரதமர் மோடி வெளிநாட்டு சுற்றுப்பயணங்களுக்கு பயன்படுத்தும் விமானத்தை பராமரிக்க மொத்தம் ரூ.1,088.42 கோடி செலவு செய்யப்பட்டுள்ளது.

மோடியின் வெளிநாட்டு பயணத்தின்போது பயன்படுத்தப்பட்ட தனியார் விமானங்களுக்கு ரூ.387.26 கோடி செலவிடப்பட்டுள்ளது.

கடந்த 2015-16ம் ஆண்டில் அதிகப்பட்சமாக 24 நாடுகளுக்கு மோடி சென்றுள்ளார். 2016-17ம் ஆண்டில் 18 நாடுகளுக்கும், 2017-18ம் ஆண்டில் 19 நாடுகளுக்கும் மோடி சென்றுள்ளார். பிரதமர் மோடியின் பயணத்துக்காக கடந்த 2014-15ம் ஆண்டில் தனியார் விமானங்களுக்கு ரூ.93.76 கோடியும், 2015-16ம் ஆண்டில் ரூ.117 கோடியும், 2016-17ம் ஆண்டில் ரூ.76.27 கோடியும், 2017-18ம் ஆண்டில் ரூ.99.32 கோடியும் செலவிடப்பட்டுள்ளது என்று தெரிவிக்கப்பட்டுள்ளது.

2018-19ம் ஆண்டு காலக்கட்டத்தில் வெளிநாட்டு பயணங்களுக்கு பயன்படுத்தப்பட்ட தனியார் விமானங்களுக்கு செலவிடப்பட்ட தொகை குறித்து அதில் தெரிவிக்கப்படவில்லை.

வெளிநாட்டு பயணங்களின்போது பிரதமர் மோடியின் தொலைபேசி அழைப்புகளுக்கு மொத்தம் ரூ.9.12 கோடி செலவிடப்பட்டுள்ளது என்று குறிப்பிடப்பட்டுள்ளது.