செவ்வாய் கிரகத்தில 20 கிலோமீட்டர் பரப்பளவில் பனிபடர்ந்த ஏரி!

Read Time:3 Minute, 57 Second

செவ்வாய் கிரகத்தில 20 கிமீ அகலத்தில் பனிபடர்ந்த ஏரி இருப்பது கண்டுபிடிக்கப்பட்டுள்ளதாக சர்வதேச ஆய்வாளர்கள் தெரிவித்துள்ளனர்.

‘மார்ஸ் எக்ஸ்பிரஸ்’ என்ற செயற்கைக்கோள் அனுப்பிய புகைப்படங்களை ஆராய்ந்தபோது, சிவப்பு கோளான செவ்வாயின் துருவ பனி முகடுகளுள்ள கிழக்குப்பகுதியில், 20 கிலோமீட்டர் பரப்பளவுக்கு இந்த ஏரி பரந்து விரிந்திருப்பதாக விஞ்ஞானிகள் நம்புகின்றனர். முந்தைய ஆராய்ச்சிகளில் செவ்வாய் மேற்பரப்பில் குறிப்பிட்ட காலத்தில் மட்டும் தண்ணீர் பாய்வதற்கான சாத்தியமான ஆதாரங்கள் இருப்பதாக கண்டறியப்பட்டுள்ளது.

இந்நிலையில், முதல் முறையாக தொடர்ந்து தண்ணீர் பாய்வதற்கான ஆதாரம் கண்டறியப்பட்டுள்ளது.

ஏரிப் படுகை போன்ற நீர் ஆதாரங்கள் செவ்வாய் கிரகத்தின் மேற்பரப்பில் முன்னொரு காலத்தில் இருந்தது என்று நாசாவின் கியூரியாசிட்டி விண்கலம் கண்டறிந்திருந்தது.

இப்போது பனிபடர்ந்த ஏரி ஐரோப்பிய ஒன்றியத்தின் மார்ஸ் எக்ஸ்பிரஸ் திட்டத்தின் கீழ் செவ்வாய் கிரகத்துக்கு அனுப்பப்பட்ட மார்சிஸ் என்ற ராடார் கருவியின் மூலம் கண்டறியப்பட்டுள்ளது.




தண்ணீரின் அடுக்கு எவ்வளவு ஆழமாக இருக்கும் என்பதை ஆராய முடியவில்லை. ஆனால், குறைந்தது ஒரு மீட்டர் ஆழம் இருக்கும் என்று ஆராய்ச்சியாளர்கள் மதிப்பிட்டுள்ளனர். இத்தாலிய தேசிய கல்வி நிறுவனத்தின் ஆஸ்ட்ரோஃபிக்ஸ் துறையின் பேராசிரியர் ராபர்டோ ஓரோஸி பேசுகையில், “உண்மையிலேயே தண்ணீர் இருப்பதற்கான ஆதாரம் என்ற தகுதியை கொண்டுள்ளது. இது ஒரு ஏரிதான். பூமியில் பனிப்பாறைகள் உருகுவதால் பாறைக்கும், பனிக்கட்டிக்கும் இடையேயுள்ள இடைவெளியில் உருவாகும் அமைப்பு அல்ல” என்று கூறியுள்ளார்.

இப்போது தண்ணீர் இருப்பதற்கான ஆதாரம் இருப்பது கண்டறியப்பட்டாலும் உயிர்வாழ்வதற்கான சாத்தியகூறு என்றால், உறுதியாக எதுவும் கூற முடியாது என்றே ஆய்வாளர்கள் தெரிவிக்கிறார்கள். ஓபன் பல்கலைக்கழகத்தை சேர்ந்த டாக்டர் மணிஷ் படேல் பிபிசியிடம் பேசுகையில், “செவ்வாய் கிரகத்தின் மேற்பரப்பில் உயிர் வாழ்வதற்கான அறிகுறி இல்லை என்று ஏற்கனவே நாம் அறிந்திருக்கிறோம். எனவே, செவ்வாய் கிரகத்தின் உட்பகுதியில் சாத்தியகூறு உள்ளதா என்பது தொடர்பாக ஆய்வு மேற்கொள்ளப்படுகிறது.” என்று கூறியுள்ளார்.

செவ்வாயில் உயிர்வாழ்வதற்கான சாத்தியகூறுகள் உள்ளனவா என்பதை கண்டுபிடிப்பதற்கான ஆய்வில் முடிவை எட்டும் நெருங்கிய நிலையில் நாம் இல்லை என்றும் குறிப்பிடுகிறார். செவ்வாயில் உயிர்வாழ முடியுமா? என்ற ஆய்வில் முக்கியமான சம்பவமாக இப்போது ஏரி கண்டுபிடிக்கப்பட்டுள்ளது. இருப்பினும் , ஏரியின் பண்புகளை முதலில் ஆராய்ச்சியால் சரிபார்க்கப்பட வேண்டும், அங்கு சென்று இறுதியான ஆதாரங்களை சேகரிப்பது என்பது மிகவும் எளிதான பணியாக இருக்காது என்றும் ஆராய்ச்சியாளர்கள் கூறுகிறார்கள்.