விவசாய கடன்; ஒரு வருடத்தில் 615 கணக்குகளுக்கு மட்டும் ரூ 59,000 கோடி சென்றது! அதிர்ச்சி ரிப்போர்ட்..!

Read Time:10 Minute, 26 Second

விவசாய கடன்களாக ஒரு வருடத்தில் மட்டும் ரூ. 59,000 கோடி 615 கணக்குகளுக்கு மட்டுமே சென்றுள்ளது என்ற அதிர்ச்சி தகவல் வெளியாகியுள்ளது.

2016-ம் ஆண்டில் அரசு வங்கிகள் விவசாய கடனாக 58,561 கோடியை 615 கணக்குகளுக்கு வழங்கியுள்ளது. சராசரியாக, ஒவ்வொரு வங்கி கணக்குக்கும் ரூ. 95 கோடி விவசாய கடனாக வழங்கப்பட்டுள்ளது. தி வையர் இணையதள செய்தி நிறுவனம் ஆர்.டி.ஐ. தகவல் மூலம் பாரத ரிசர்வ் வங்கியிடம் இருந்து விபரங்களை பெற்றுள்ளது. பொதுவாக வழங்கப்படும் கடன்களுடன் ஒப்பிடும் போது விவசாய கடன்களுக்கு வட்டி விகிதங்களும் குறைவு மற்றும் குறைவான முன்நிபந்தனைகளின் கீழே வழங்கப்படுகிறது.

சிறு மற்றும் நடுத்தர விவசாயிகள் கடன்கள் பெறுவதை எளிதாக்கும் வகையில் இந்த மாற்றங்கள் செய்யப்பட்டுள்ளன. விவசாயிகளுக்கு 4% வட்டி விகிதத்தில் விவசாய கடன்கள் வழங்கப்படுகிறது.

Rythu Swarajya Vedika விவசாய அமைப்பின் தலைவர் கிரண் குமார் வீசா பேசுகையில், “விவசாய தொழிலில் மிகப்பெரிய நிறுவனங்களும் ஈடுபட்டுள்ளது, அவைகளும் விவசாயக் கடன்களின் கீழ் கடன் வாங்கிக் கொள்கின்றன. ரிலையன்ஸ் ஃப்ரெஷ் போன்ற நிறுவனங்கள் அக்ரி-பிசினஸ் கம்பெனி பிரிவின் கீழ் வருகின்றன. வேளாண் விளைபொருட்களை கொள்முதல் மற்றும் விற்பனை செய்வதில் அவர்கள் ஈடுபடுகின்றனர். குடோன்கள் மற்றும் அதுதொடர்புடைய நடவடிக்கைகளை மேற்கொள்வதற்கு விவசாய கடன்கள் பிரிவின் கீழ் கடன்களை பெறுகின்றனர். ” என்று கூறியுள்ளார்.

நாட்டில் சில பொருளாதாரப் பிரிவுகளின் வளர்ச்சியை உறுதி செய்யும் வகையில் முன்னுரிமைகள் வழங்கப்படுகிறது. வங்கிகள் வழங்கும் மொத்த கடன்களில் ஒரு குறிப்பிட்ட பகுதியை விவசாயம், சிறிய மற்றும் நடுத்தர நிறுவனங்கள், ஏற்றுமதி கடன், கல்வி, வீட்டு வசதி,  சமூக உள்கட்டமைப்பு மற்றும் புதுப்பிக்கத்தக்க ஆற்றல் துறைகளில் (renewable energy)முதலீடு செய்ய வேண்டும் என்று ரிசர்வ் வங்கி உத்தரவிட்டுள்ளது. இந்த முன்னுரிமை துறை கடன் (PSL) என்று அழைக்கப்படுகிறது.

சிறு மற்றும் குறு விவசாயிகளுக்கு உதவும்படி PSL கொள்கையின்படி, வங்கிகள் மொத்தம் வழங்கும் கடனில் 18% விவசாயத்திற்கு வழங்க வேண்டும். “இதில் சிக்கல் என்னவென்றால் வங்கிகள், பெரிய அளவு தொகையை பெரிய நிறுவனங்களுக்கு கொடுக்கின்றன, இதன் விளைவாக விவசாயிகள் இந்த கடன்களைப் பெற முடியவில்லை.” என்று கூறுகிறார் கிரண் குமார் வீசா.

“உண்மையில் PSL கொள்கையின் கீழ் , பெரிய நிறுவனங்கள் கடன்களை பெறுவது மிகவும் எளிதானது, விவசாய கடன்களை வழங்க கட்டுப்பாடுகள் மற்றும் கடன் வட்டி விகிதம் பிற பொதுவான கடன்களுடன் ஒப்பிடும்போது மிகவும் குறைவாக உள்ளது. வங்கிகள் பெரிய கடன்களை வழங்குகின்றன, இதனால் அவற்றின் வளங்கள் அப்படியே உள்ளன. “எனவும் குறிப்பிட்டுள்ளார்.

மாநிலம் வாரியாக தகவல்களை பெறுவதற்கு ஸ்டேட் பாங்க் ஆப் இந்தியாவின் அனைத்து மண்டல கிளையிலும் ஆர்.டி.ஐ.யின் கேள்விகளை தாக்கல் செய்தோம். மும்பை மண்டலத்தை தவிர வேறு எந்த கிளைகளும் இந்த தகவலை வெளியிடவில்லை. மும்பை மண்டலத்தில் பணக்காரர்களுக்கான இடமாக அறியப்படும் இடத்தில் உள்ள மும்பை சிட்டி கிளையில் 3 கணக்குகளுக்கு ரூ. 29.95 கோடியை வழங்கப்பட்டுள்ளது என தி வையர் செய்தி வெளியிட்டுள்ளது. சராசரியாக ஒவ்வொரு கணக்குக்கும் ரூ. 10 கோடி கடன் வழங்கப்பட்டுள்ளது. அதே கிளையில் 9 கணக்குகளுக்கு ரூ. 27 கோடி கடனாக வழங்கப்பட்டுள்ளது.

ஆனால், கடன் தொகையை பெற்றவர்களின் தகவல்களை தெரிவிக்க வங்கி மறுத்துவிட்டது என தெரிவிக்கப்பட்டுள்ளது.

விவசாயத்துறை நிபுணர் தேவேந்திர சர்மா பேசுகையில், விவசாயிகளின் பெயரில் பெரிய நிறுவனங்களுக்கு மலிவான வட்டியில் கடன் வழங்கப்படுகிறது. “விவசாயிகளின் பிரச்சினைகளை தீர்ப்பது வெறும் வாய்பேச்சுமட்டும்தான்” ரூ .100 கோடி அளவில் கடன் வழங்கப்பட்டுள்ள இவர்கள் என்ன விதமான விவசாயிகள்? இது ஒரு நாடகம். விவசாயிகள் என்ற பெயரில் தொழில் நிறுவனங்களுக்கு ஏன் கடன் கொடுக்கப்படுகிறது? ” என கேள்வியை எழுப்புகிறார்.

இதுபோன்ற செயல்முறைகளில் வங்கிகளும் பயனடைகிறது. எனவேதான் இதுபோன்று பெரிய அளவு தொகை கடனாக விவசாய பிரிவின் கீழ் வழங்கப்படுகிறது. “இங்கு நிறுவனங்களுக்கு ரூ. 100 கோடி எளிதாக வழங்க முடியும். இதே தொகை விவசாயிகளுக்கு வழங்கப்பட வேண்டும் என்றால், குறைந்தப்பட்சம் 200 பேர் தேவைப்படும். 18 சதவிதம் என்ற இலக்கை அடைய வேண்டுமென்றே வழங்குகிறது.” என கூறியுள்ளார்.

பா.ஜனதா தலைமையிலான தேசிய ஜனநாயக கூட்டணி அரசு வேளாண் உற்பத்தி மற்றும் வருவாயை பெருக்கும் வகையில் அத்துறைக்கு 2014-15ல் ரூ. 8.5 லட்சம் கோடியை ஒதுக்கியது. இதுவே 2018-19ல் 11 லட்சம் கோடி ரூபாயாக அதிகரித்துள்ளது. எனினும், ரிசர்வ் வங்கியிடமிருந்து பெறப்பட்ட தரவு மாறாக உள்ளது. வேளாண் தொழில் நிறுவனங்கள் மற்றும் தொழில் துறைக்கு இந்த கடன்கள் செல்கின்றன என்று விவசாய நிபுணர்கள் கூறுகின்றனர்.

விவசாய கடன்கள் மூன்று துணைப்பிரிவுகளின்கீழ் வழங்கப்படுகின்றன, அதாவது விவசாய கடன், அடிப்படை விவசாய உள்கட்டமைப்பு மற்றும் ஆதரவு நடவடிக்கைகள் என வழங்கப்படுகிறது. குடோன்கள், குளிர்சாதான கிடங்குகள் ஆகியவை அடித்தள உள்கட்டமைப்பு கீழ் வருகிறது. இதற்கு ரூ. 100 கோடி வரை கடன் வழங்கப்படுகிறது. வேளாண் கிளினிக்குகள் மற்றும் வேளாண் வணிக மையங்களை அமைப்பது போன்ற ஆதரவு நடவடிக்கைகள் கீழ் வருகிறது, இவைகளுக்கு கடனுக்கான வரம்பு ரூ 100 கோடி ஆகும்.

2016 ம் ஆண்டுக்கு முன்பே விவசாயக் கடன்கள் என்ற பெயரில் பெருமளவு தொகை வழங்கப்பட்டுள்ளதாக ரிசர்வ் வங்கியின் தகவல்கள் தெரிவிக்கின்றன. 2015 ம் ஆண்டில் 604 கணக்குகளுக்கு 52,143 கோடி ரூபாய் வழங்கப்பட்டுள்ளது. ஒரு கணக்கிற்கு சராசரியாக ரூ. 86.33 கோடி சென்றுள்ளது. இதுவே 2014- ம் ஆண்டு ரூ 60,156 கோடி ரூபாய் 669 கணக்குகளுக்கு வழங்கப்பட்டுள்ளது. சராசரியாக ஒரு கணக்கிற்கு ரூ. 91.28 கோடி சென்றுள்ளது.

அரசு வங்கிகள் விவசாய கடனாக வழங்கிய தொகை விபரம்.

இதேமுறை காங்கிரஸ் தலைமையிலான ஐக்கிய முற்போக்குக் கூட்டணி அரசாங்கத்திலும் பின்பற்றப்பட்டுள்ளது. 2013-ம் ஆண்டு 665 வங்கி கணக்குகளுக்கு ரூ. 56,000 கோடி செலுத்தப்பட்டுள்ளது, அப்போது ஒரு கணக்கிற்கு சராசரியாக ரூ. 84.30 கோடி வழங்கப்பட்டுள்ளது. 2012-ம் ஆண்டு 698 வங்கி கணக்குகளுக்கு ரூ. 55,504 கோடி செலுத்தப்பட்டுள்ளது, அப்போது ஒரு கணக்கிற்கு சராசரியாக ரூ. 79.51 கோடி வழங்கப்பட்டுள்ளது.

மத்திய பிரதேச மாநிலம் ஆம் கிசான் விவசாய அமைப்பின் உறுப்பினரான விவசாயி கேதர் சீரோஹி பேசுகையில், அரசாங்கங்கள் முதலில் பல்வேறு விதமான கடன் சுழற்சியில் விவசாயிகளை சிக்கவைக்கிறது, விவசாயி சிறந்த நிதியுதவியை பெற முயற்சி செய்யும் போது அவர்கள் வங்கிகளால் துன்புறுத்தப்படுகிறார். விவசாயிகள் பெயரில் திட்டங்களை அறிவித்துவிட்டு பெரு நிறுவனங்களுக்கு நூற்றுக்கணக்கான கோடி ரூபாயை கடன் வழங்குவதை சாதாரண விவசாயிகளால் கற்பனை கூட செய்து பார்க்க முடியாது என கூறியுள்ளார்.

உத்தரபிரதேச மாநிலத்தில் 4 ஏக்கரில் விவசாயம் செய்யும் விவசாயி சஞ்சீவ் பேசுகையில், இடைத்தரகர்களால் பெருமளவு விவசாய கடன் வாங்கப்படும் போது இது யாருக்கு பயனளிப்பதாக இருக்கும். சில விவசாயிகள் தங்களிடம் பணம் இல்லாத காரணத்தினால் கடன் பெறுகிறார்கள். ஆனால், இதுபோன்ற காரணத்திற்காக அவர்கள் வங்கிக்கு பலமுறை அழைக்கப்படுகிறார்கள் மற்றும் வங்கி அதிகாரிகளிடம் கேலியை எதிர்க்கொள்கிறார்கள் என்று கூறியுள்ளார். விவசாயிகள் மற்றும் விவசாய தொழில் நிறுவனங்களுக்கு கடன் வழங்குவதை அரசு பிரிக்க வேண்டும் என்கிறார் தேவேந்திர சர்மா.

‘விவசாயம்’ என்ற பெயரின் கீழ் நிறுவனங்களுக்கு கடன் வழங்குவதன் மூலம் விவசாயிகள் ஏமாற்றப்படக்கூடாது. நிதியமைச்சரிடம் இதுதொடர்பான ஆலோசனையை முன்வைத்திருப்பதாக கூறும் சர்மா, எந்தவொரு பதிலும் கிடைக்கவில்லை என குறிப்பிட்டுள்ளார்.