பாரத பிரதமர் மோடியின், சொத்து மதிப்பு எவ்வளவு?

Read Time:2 Minute, 26 Second

பாராளுமன்ற உறுப்பினர்கள் ஆண்டுதோறும் தங்களின் சொத்துக்கணக்கை வெளியிட வேண்டும் என்ற விதியின் அடிப்படையில் பிரதமர் அலுவலகம் பிரதமர் மோடியின் சொத்து விபரங்களை வெளியிட்டுள்ளது.

பிரதமர் அலுவலகம் வெளியிட்டுள்ள தகவலின்படி அவருடைய சொத்து மதிப்பு ரூ. 2.28 கோடி என தெரிவிக்கப்பட்டுள்ளது.

இந்த ஆண்டு மார்ச் 31-ம் தேதி முடிவில் பிரதமர் மோடியிடம் ரூ. 48 ஆயிரத்து 944 ரொக்கமாகக் கையிருப்பு இருக்கிறது. கடந்த ஆண்டோடு ஒப்பிடும் போது அவருடைய கையிருப்பு பணம் குறைந்துள்ளது. கடந்த ஆண்டு ரூ.1.49 லட்சம் இருந்த நிலையில், இந்த ஆண்டு ரூ.50 ஆயிரத்துக்கும் குறைவாகவே இருக்கிறது. காந்திநகரில் உள்ள எஸ்பிஐ வங்கியில் ரூ.11 லட்சத்து 29 ஆயிரத்து 690 டெபாசிட் செய்துள்ளார். மற்றொரு எஸ்பிஐ வங்கிக்கணக்கில் ரூ.1.7 கோடிக்கு டெபாசிட் செய்யப்பட்டுள்ளது.

மோடியிடம் வரிசேமிப்பு எல்அன்ட்டி பத்திரம் ரூ.20 ஆயிரம், தேசிய சேமிப்பு பத்திரம் ரூ.5.18 லட்சம், எல்ஐசி காப்பீடு ரூ.1.59 லட்சம் ஆகியவை இருக்கின்றன. ரூ.1.38 லட்சம் மதிப்புடைய் 4 தங்க மோதிரங்கள் உள்ளன. சொந்தமாக பைக், கார் போன்ற வாகனங்கள் ஏதுவும் கிடையாது. குஜராத் மாநிலம் காந்திநகரில் கடந்த 2002-ம் ஆண்டு மோடி ரூ.1.30 லட்சத்துக்கு நிலம் வாங்கியுள்ளார். அதன் இன்றைய சந்தை மதிப்பு ரூ.1.கோடியாகும். மற்றவகையில் பரம்பரை சொத்துக்கள் ஏதும் மோடிக்கு இல்லை, வங்கியில் கடன் எதுவும் அவர் வாங்கவில்லை. மொத்தமாக அவருடைய சொத்து மதிப்பு ரூ. 2.28 கோடி என தெரிவிக்கப்பட்டுள்ளது.

மத்திய நிதி அமைச்சர் அருண் ஜெட்லியிடம் கையிருப்பு பணமாக ரூ. 10 லட்சம் உள்ளது. அருண் ஜெட்லியின் எஸ்.பி.ஐ. மற்றும் எச்.டி.எப்.சி. வங்கி சேமிப்பு கணக்குகளில் ரூ. 1.58 கோடி உள்ளது என தெரிவிக்கப்பட்டுள்ளது.