ஐரா(IARA) 2018-ம் ஆண்டின் சர்வதேச சிறந்த நடிகராக விஜய் தேர்வு

Read Time:3 Minute, 18 Second

மெர்சல் படத்தில் சிறப்பான நடிப்பை வெளிப்படுத்திய நடிகர் விஜய்யை 2018-ம் ஆண்டின் சர்வதேச சிறந்த நடிகராக ஐரா அறிவித்துள்ளது.

ஸ்ரீதேனாண்டாள் பிலிம்சின் தயாரிப்பில் அவர்களது 100-வது படமான மெர்சல் விஜய் நடிப்பில் அட்லி இயக்கத்தில் உருவானது. மெர்சல்  படம் பல்வேறு சர்ச்சைகளுக்கு மத்தியில் உலகம் முழுக்க வெளியாகி, வெற்றியை பதிவு செய்தது. படத்தில் விஜய் 3 தோற்றத்தில் நடித்து இருந்தார். அவரது ஜோடியாக நித்யா மேனன், காஜல் அகர்வால், சமந்தா ஆகியோர் நடித்திருந்தனர். எஸ்.ஜே.சூரியா வில்லனாக நடிக்க, சத்யராஜ், வடிவேலு, சத்யன், கோவை சரளா உள்ளிட்டோரும் நடித்திருந்தனர். இந்தப் படத்துக்கு இசை வலுசேர்த்தார் ஏ.ஆர்.ரஹ்மான்.

லண்டனை சேர்ந்த ஐரா (International Achievement Recognition Awards, IARA ) அமைப்பு கடந்த 2014-ம் ஆண்டு முதல் ஒவ்வொரு ஆண்டும் திரைத்துறையில் சர்வதேச அளவில் விருதுகளை வழங்கி திரைத்துறையினரை கௌரவித்து வருகிறது.

மெர்சல் படத்திற்காக ஐரா விருதுக்கு நடிகர் விஜய் பெயர் பரிந்துரை செய்யப்பட்டது. சிறந்த நடிகர் பிரிவில் விஜய்யுடன், டேவிட் டென்னன்ட்(டான் ஜுவான் இன் சோஹோ), ஜான் பொயேகா(ஸ்டார் வார்ஸ்: தி லாஸ்ட் ஜெடி), கிறிஸ் அட்டோ(ஸ்விங்), ஜாக் பெர்ரி ஜோன்ஸ்(பாங்), டேனியல் கலுயா(கெட் அவுட்), ஜாக் மோரிஸ் (ஈன்ஸ்ட்என்டர்ஸ்), ஜேமி லோமாஸ் (ஹோலிஓக்ஸ்) ஆகியோரின் பெயர்களும் பரிந்துரைக்கப்பட்டது.

இந்நிலையில் மெர்சல் படத்தில் சிறப்பான நடிப்பை வெளிப்படுத்திய நடிகர் விஜய்யை 2018-ம் ஆண்டின் சர்வதேச சிறந்த நடிகராக ஐரா அறிவித்துள்ளது.

இதனையடுத்து விஜய் ரசிகர்கள் கொண்டாட்டத்தில் ஈடுபட்டுள்ளனர். சமூக வலைதளங்களில் தங்களுடைய மகிழ்ச்சியை பகிர்ந்து வருகிறார்கள்.

தேமுதிக தலைவர் திரு விஜயகாந்த் அவர்கள் தனது ட்விட்டர் பக்கத்தில் நடிகர் விஜய்க்கு வாழ்த்து தெரிவித்துள்ளார்

தமிழ் நடிகர்

ஐஏஆர்ஏ விருதுக்கு பரிந்துரை செய்யப்பட்ட ஒரே தமிழ் நடிகர் விஜய் தான். பரிந்துரை செய்யப்பட்ட பெருமையுடன் நின்றுவிடாமல் விருதை வென்று தமிழர்களை பெருமை அடைய வைத்துள்ளார்.