வடகிழக்குப் பருவமழை தொடங்குவதற்கான சாதகமான சூழ்நிலை – வானிலை மையம்

Read Time:3 Minute, 0 Second

வடகிழக்குப் பருவமழை வரும் 8-ம் தேதி முதல் தொடங்க சாதகமான சூழல் நிலவுவதாக சென்னை வானிலை ஆய்வு மையம் தெரிவித்துள்ளது.

தமிழகத்தில் கடந்த 2 தினங்களாக பரவலாக மழை பெய்து வருகிறது. இன்னும் சில நாட்களுக்கு மழை இருக்கும் என்றும் 7-ந் தேதி ஞாயிற்றுக்கிழமை பலத்த மழை இருக்கும் என்றும் இந்திய வானிலை மையத்தால் ‘ரெட் அலார்ட்’ எச்சரிக்கை விடப்பட்டு உள்ளது.

இந்நிலையில் வடகிழக்குப் பருவமழை வரும் 8-ம் தேதி முதல் தொடங்க சாதகமான சூழல் நிலவுவதாக சென்னை வானிலை ஆய்வு மையம் தெரிவித்துள்ளது.

சென்னை வானிலை ஆய்வு மைய இயக்குநர் பாலச்சந்திரன் பேசுகையில் “தென்மேற்கு பருவமழை, தென்தமிழகப் பகுதியில் வளிமண்டலத்தில் மேலடுக்கு சுழற்சி நிலவுகிறது. இதன் காரணமாக கடந்த 24 மணிநேரத்தில் தமிழகம் மற்றும் புதுச்சேரியில் பரவலாக மழை பெய்துள்ளது. ஒருசில இடங்களில் கனமழை பெய்துள்ளது. சென்னை எண்ணூரில் 13 செமீ மழையும், செங்கல்பட்டில் 12 செமீ மழையும் அதிகபட்சமாக பதிவாகியுள்ளது. தமிழகம் மற்றும் புதுச்சேரியில் வரும் 8 ம் தேதி வரை பரவலாக மழை பெய்யக்கூடும்.

ஓரிரு இடங்களில் கனமழை முதல் மிக கனமழை பெய்யக்கூடும். தென்கிழக்கு அரபிக்கடல் பகுதியில் குறைந்த காற்றழுத்த தாழ்வு பகுதி உருவாகியுள்ளது. இது அடுத்து வரும் 24 மணிநேரத்தில் காற்றழுத்த தாழ்வு மண்டலமாகவும் தொடர்ந்து புயலாகவும் வலுப்பெற்று வடமேற்கு திசையில் ஓமன் கரையை நோக்கி நகரக் கூடும். மேலும், தெற்கு வங்கக்கடல் பகுதியில் வரும் 8 ஆம் தேதி குறைந்த காற்றழ்த்த தாழ்வு பகுதி உருவாகக் கூடும்.

தென்மேற்கு பருவ மழை வட இந்திய பகுதியிலிருந்து அடுத்து வரும் 3 தினங்களில் படிப்படியாக விலகி, வடகிழக்குப் பருவமழை தமிழகம், கேரளா, தெற்கு ஆந்திரா தெற்கு கர்நாடகா பகுதிகளில் தொடங்குவதற்கான சாதகமான சூழ்நிலை நிலவுகிறது.

மீனவர்கள் குமரிக்கடல், லட்சத்தீவுகள், தென்கிழக்கு மற்றும் அரபிக்கடல் பகுதிகளுக்கு இன்று முதல் செல்ல வேண்டாம் என அறிவுறுத்தப்படுகிறார்கள்” என தெரிவித்துள்ளார்.

தென்மேற்கு பருவமழை காலத்தில் தமிழகத்தில் குறைவான அளவே பெய்த நிலையில், வடகிழக்கு பருவமழையின் போது கூடுதலாக 12 சதவிதம் மழை பெய்யும் என்றும் தெரிவிக்கப்படுகிறது.