`வைல்ட் லைஃப் போட்டோகிராபர் ஆஃப் தி இயர்’ 10 வயதில் சாதித்த இந்திய சிறுவன்!

Read Time:4 Minute, 54 Second

10 வயதில் `வைல்ட் லைஃப் போட்டோகிராபர் ஆஃப் தி இயர்’ விருதை வென்ற இளம் சாதனையாளர் அர்ஷ்தீப் சிங், “இப்போது, என்னுடைய புகைப்படம் 65 நாடுகளில் காட்சி படுத்தப்படும் என்பதே எனக்கு மிகப்பெரிய விஷயம்,” என்கிறார்.

இங்கிலாந்தின் நேச்சுரல் ஹிஸ்டரி அருங்காட்சியகம் நடத்திய போட்டியில் கலந்துகொண்ட பஞ்சாப் மாநிலத்தை சேர்ந்த அர்ஷ்தீப் சிங், `வைல்ட் லைஃப் போட்டோகிராபர் ஆஃப் தி இயர்’ விருதை வென்று சாதனை புரிந்துள்ளார்.

பஞ்சாப் மாநிலத்தை சேர்ந்த போட்டோகிராபர் ரன்தீப் சிங் என்பவரின் மகனான அர்ஷ்தீப் சிங் 5 வயதாக இருக்கும்போது வைல்ட் லைஃப் போட்டோகிராபியை தொடங்கியிருக்கிறார். இயற்கை அழகை தனது கேமராவில் படம் பிடித்து வருவதை வழக்கமாக கொண்டிருக்கிறார். அப்படி, பஞ்சாபின் கபுர்தலாவில் சதுப்பு நிலத்திற்கு தந்தையுடன் காரில் பயணித்துக்கொண்டிருந்த அர்ஷ்தீப், இரும்பு பைப்பை வாழ்விடமாக கொண்ட ஆந்தைகளை தன்னுடைய கேமராவில் நேர்த்தியாக புகைப்படம் எடுத்துள்ளார்.

இந்த புகைப்படம் இங்கிலாந்தின் நேச்சுரல் ஹிஸ்டரி அருங்காட்சியகம் நடத்திய போட்டியில் அவருக்கு மதிப்புமிக்க விருதை வென்று கொடுத்திருக்கிறது.

அர்ஷ்தீப் இரும்பு பைப் ஒன்றில் ஆந்தை அமர்ந்திருப்பதை கண்டிருக்கிறார். உடனடியாக காரை நிறுத்த சொல்லிவிட்டு, கார் கண்ணாடியை இறக்கிவிட்டு அந்த ஆந்தையை புகைப்படம் எடுக்க ஆயத்தமாகியிருக்கிறார். அப்போது மற்றொரு ஆந்தையும் பைப்பில் இருந்து எட்டிப்பார்க்கவே, இரண்டு ஆந்தைகள் அந்த இரும்புப் பைப்பில் இருந்து பார்ப்பது போன்ற அந்தப் படம் இவரது கேமராவுக்குள் சிக்கியது.

`Pipe owls’ என்று பெயரிடப்பட்ட அந்தப் படம், இங்கிலாந்தின் நேச்சுரல் ஹிஸ்டரி அருங்காட்சியகம் (Natural History Museum) நடத்திய போட்டியில் 10 வயதுக்குட்பட்டோருக்கான பிரிவில் வைல்ட் லைஃப் போட்டோகிராபர் ஆஃப் தி இயர் (Wild Life Photographer of the Year) போட்டியில் பங்கு பெற்று விருதை வென்றது. அர்ஷ்தீப் சிங் ஏற்கெனவே ஆசிய அளவிலான ஜூனியர் வைல்ட் லைஃப் போட்டோகிராபர் ஆஃப் தி இயர் விருதை வென்றிருக்கிறார். அவர் எடுத்த பல்வேறு புகைப்படங்கள் தேசிய மற்றும் சர்வதேச அளவிலான அங்கீகாரம் பெற்றிருக்கின்றன.

அர்ஷ்தீப் சிங் வெற்றி குறித்து பேசுகையில், இது சர்வதேச அளவிலான போட்டியாகும். பெரும் போட்டி காரணமாக வெற்றியை எதிர்பார்க்கவில்லை. இப்போது, என்னுடைய புகைப்படம் 65 நாடுகளில் காட்சிப்படுத்தப்படுகிறது என்பது எனக்கு மிகவும் பெரிய விஷயமாகும். எனக்கு அதிகமான பொறுப்பு ஏற்பட்டுள்ளது. என்மீது அதிகமான எதிர்பார்ப்பு எழுந்துள்ளது. இந்த விருதை வென்ற பின்னர் தந்தை ரன்தீப், இன்னும் மேற்கொண்டு பயணிக்க வேண்டும் என்று கூறியுள்ளார்.

வழக்கத்திற்குமாறான, பயனுள்ள மற்றும் ஆர்வமானதில் கவனம் செலுத்த கேட்டுக்கொண்டுள்ளார். என்னுடைய 5 வயதில் கேமராவை கையில் பிடிக்க தொடங்கினேன், எங்கள் வீட்டை சுற்றிலும் பறவைகளை புகைப்படம் எடுக்க தொடங்கினேன். பின்னர் அப்பாவுடன் வெளியே செல்லும் போதும் புகைப்படங்களை எடுப்பேன். அதுதான் எனக்கு மிகவும் பிடித்ததாக இருந்தது. என்னுடைய விடுமுறை நாட்கள் மற்றும் வார விடுமுறை நாட்களை இப்படிதான் செலவழிக்கிறேன். புகைப்படம் எடுப்பதை தவிர்த்து அறிவியல், டென்னிஸ் மற்றும் பேட்மிண்டனில் எனக்கு ஆர்வம் உண்டு என்கிறார். முழுநேர `வைல்ட் லைஃப் போட்டோகிராபர் ஆவேன் என்று மகிழ்ச்சிபொங்க தெரிவிக்கிறார் அர்ஷ்தீப் சிங்.

அவருடைய முயற்சி நிறைவேற, மேலும் சாதனைகளை படைக்க அவரை வாழ்த்துவோம்.