டோனி, கவுதம் காம்பீருக்கு வலைவீசும் பா.ஜனதா!

Read Time:4 Minute, 25 Second

2019 பாராளுமன்றத் தேர்தலில் கிரிக்கெட் நட்சத்திரங்கள் டோனி மற்றும் கவுதம் கம்பீரை களமிறக்க பா.ஜனதா திட்டமிட்டுள்ளது.

2019 பாராளுமன்றத் தேர்தல் ஏப்ரல்-மே மாதங்களில் நடைபெற உள்ளது. இத்தேர்தலுக்கு அரசியல் கட்சிகள் தீவிரமாக பணியாற்றி வருகின்றன. ஆளும் கட்சியான பா.ஜனதாவும் 300க்கும் அதிகமான தொகுதிகளில் வெற்றியை தனதாக்க வேண்டும் என பணியை தொடங்கிவிட்டது. இதேபோன்று காங்கிரசும் தேர்தலில் வெற்றியை கட்டாயம் பெற்றாக வேண்டும் என்ற நிலைக்கு தள்ளப்பட்டுள்ளது. இதற்கிடையே பா.ஜனதா கூட்டணியுடன் வெற்றி பெற்று ஆட்சிக்குவரும் எனவும் கருத்துக்கணிப்பு தகவல்கள் வெளியாகியுள்ளது.

2019 தேர்தலில் பாலிவுட் நட்சத்திரங்கள், விளையாட்டு வீரர்களை களமிறக்க பா.ஜனதா திட்டமிட்டுள்ளதாக செய்திகள் வெளியாகியது. இப்போது அதனை உறுதிசெய்யும் வகையில் தகவல் ஒன்று வெளியாகியுள்ளது. அதாவது தி சண்டே கார்டியன் வெளியிட்டுள்ள செய்தியில்
2019 பாராளுமன்றத் தேர்தலில் கிரிக்கெட் நட்சத்திரங்கள் டோனி மற்றும் கவுதம் கம்பீரை களமிறக்க பா.ஜனதா திட்டமிட்டுள்ளது என தெரிவிக்கப்பட்டுள்ளது.

கிரிக்கெட்டில் இருந்து இன்னும் ஓய்வை அறிவிக்காமல் விளையாடி வரும் கவுதம் கம்பீர், பல்வேறு சமூக அக்கறையான செயல்களை மேற்கொண்டு வருகிறார். பயங்கரவாதிகளுடனான மோதல்களில் உயிரிழக்கும் ராணுவ வீரர்களின் குழந்தைகளுக்கு கல்வி, சமூதாயத்தில் பின்தங்கியவர்களுக்கு படிக்க உதவி போன்றவற்றை செய்து வருகிறார். காஷ்மீர் விவகாரத்தில் பாகிஸ்தானுக்கு எதிராக ஸ்திரமான மற்றும் அதிரடியான கருத்துக்களை தெரிவிப்பவர். அரசியல் பற்றி பேசும் அவர் அதுதொடர்பான அறிவிப்பு எதையும் வெளியிட்டது கிடையாது. மக்கள் மத்தியில் நல்லபெயரையும் கொண்டுள்ளார் கவுதம் கம்பீர். இதேபோன்று டோனிக்கும் நல்லபெயர் உள்ளது.

இந்நிலையில் டெல்லியில் கவுதம் கம்பீரையும், ஜார்க்கண்டில் டோனியையும் களமிறக்க பா.ஜனதா திட்டமிட்டுள்ளது. கம்பீரை களமிறங்கினால், அக்கட்சியின் எம்.பி.யாக மீனாட்சி லெகியிடம் இருந்து வாய்ப்பு பறிக்கப்படும் எனவும் தெரிவிக்கப்படுகிறது. மீனாட்சி லெகியின் செயல்பாட்டில் பா.ஜனதாவிற்கு திருப்தி கிடையாது, எனவே கம்பீருக்கு வலைவீசுகிறது என தெரிவிக்கப்படுகிறது. இதுதொடர்பாக பா.ஜனதா மூத்த தலைவர் பேசுகையில், “கட்சியின் அடிமட்டத்திலிருந்து மீனாட்சி லெகி பற்றிவரும் தகவல்கள் திருப்திகரமாக இல்லை.

அவருடைய தொகுதியை சேர்ந்த மக்களும் அவருடைய செயல்பாட்டில் திருப்தியாக இல்லை. அவரை மறுபடியும் களமிறக்க பா.ஜனதா வாய்ப்பு வழங்காது. கிரிக்கெட் வீரர் கம்பீரை வேட்பாளராக அறிவிப்பது குறித்து ஆலோசனை நடத்தப்பட்டு வருகிறது. அதற்கு அவரின் சமூக சேவையே காரணம். டெல்லி மக்களும் கம்பீர் மீது நல்ல மரியாதை வைத்துள்ளனர்,” என கூறியுள்ளார் என அச்செய்தியில் தெரிவிக்கப்பட்டுள்ளது. இதேபோன்று டோனியின் சொந்த மாநிலமான ஜார்க்கண்டில் டோனியை களமிறக்க பா.ஜனதா முயற்சி செய்து வருவதாக தெரிவிக்கப்பட்டுள்ளது.

கம்பீரும், டோனியும் பா.ஜனதாவின் முடிவுக்கு ஆதரவு தெரிவித்தால் அவர்களும் அரசியல்வாதி, எம்.பி,யாகலாம். அவர்களுடைய முடிவு என்ன என்பதை பொறுத்து இருந்துதான் பார்க்க வேண்டும்.