‘கட்டாயமாக மாதம் ரூ. 35 ரீசார்ஜ் செய்ய வேண்டும்’ ஏர்டெல், வோடோபோனுடுக்கு டிராய் எச்சரிக்கை

Read Time:4 Minute, 13 Second

வாடிக்கையாளர்கள் ‘கட்டாயமாக மாதம் ரூ. 35 ரீசார்ஜ் செய்ய வேண்டும்’ என்ற திட்டத்திற்கு ஏர்டெல், வோடோபோனுடுக்கு டிராய் எச்சரிக்கையை விடுத்துள்ளது.

ஜியோ நிறுவனம் வழங்கும் அதிரடி சலுகைகளால், பெரும்பாலான வாடிக்கையாளர்கள் மற்ற தொலைத்தொடர்பு நிறுவனங்களை பயன்படுத்துவதில்லை. இதனால் ஏற்படும் பெரும் வருமான இழப்பை தடுக்கும் வகையில் குறைந்தப்பட்ச ரீசார்ஜ் கட்டாயம் என்ற திட்டத்தை பிற தொலைத் தொடர்பு நிறுவனங்கள் கொண்டு வந்துள்ளன. இந்த திட்டத்தை ஏர்டெல், வோடோபோன் ஐடியா நிறுவனம் அமல்படுத்த உள்ளது. குறைந்தபட்ச தொகையான 35 ரூபாய்க்கு ரிசார்ஜ் செய்யவில்லை என்றால் இனி இன்காமிங் கால் வசதியும் இருக்காது.

தொலைத்தொடர்பு நிறுவன வாடிக்கையாளர்களின் எண்களுக்கு, தொலை தொடர்பு சேவை அளிக்கும் நிறுவனங்களிடம் இருந்து கடந்த மாதத்தில் இருந்து தொடர்ந்து குறுந்தகவல்கள் அனுப்பப்பட்டு வருகின்றன. அதில், மாதந்தோறும் குறைந்தபட்ச தொகையை ரீசார்ஜ் செய்ய வேண்டும், இல்லையெனில் வெளி அழைப்பு மேற்கொள்ளும் வசதி முதலில் துண்டிக்கப்படும், அதன்பிறகு அழைப்பு பெறும் வசதி துண்டிக்கப்படும் எனத் தெரிவிக்கப்பட்டுள்ளது.

இதனால் குறைந்தபட்ச தொகையை ரீசார்ஜ் செய்யாத காரணத்துக்காக வாடிக்கையாளர்கள் தாங்கள் நீண்ட நாள்களாக பயன்படுத்தி வரும் செல்லிடப்பேசி எண்ணை இழக்க வேண்டிய நிலை ஏற்பட்டுள்ளது. ஜியோவிற்கு எதிராக இந்நிறுவனங்கள் எடுக்கும் நடவடிக்கையினால் அதிகமான பலன் கிடைக்க வாய்ப்பு உள்ளது.

டிராய் அமைப்பு எச்சரிக்கை

வாடிக்கையாளர்கள் ‘கட்டாயமாக மாதம் ரூ. 35 ரீசார்ஜ் செய்ய வேண்டும்’ என்ற திட்டத்திற்கு ஏர்டெல், வோடோபோனுடுக்கு டிராய் எச்சரிக்கையை விடுத்துள்ளது என தகவல் வெளியாகியுள்ளது. திட்டம் தொடர்பாக விளக்கத்தையும் கேட்டு நோட்டீஸ் அனுப்பியுள்ளதாக தெரிவிக்கப்படுகிறது.

டிராய் அமைப்பின் தலைவர் ஆர்.எஸ். ஷர்மா இதுதொடர்பாக பேசுகையில், தொலைத் தொடர்பு சேவை அளிக்கும் நிறுவனங்களின் திட்டங்களில் பொதுவாக டிராய் தலையிடுவதில்லை. அதேநேரத்தில், வாடிக்கையாளர்களின் செல்லிடப் பேசி எண்ணில் போதிய தொகை இருப்பு இருக்கும்போது, அவரது எண்ணில் மாதந்தோறும் குறைந்தப்பட்ச தொகையை ரீசார்ஜ் செய்ய வேண்டும், இல்லையெனில் சேவை துண்டிக்கப்படும் எனத் தெரிவிப்பது சரியில்லை.

இதுதொடர்பாக தொலைத் தொடர்பு சேவை நிறுவனங்களால் அனுப்பப்பட்டுள்ள குறுந்தகவலை சுட்டிக்காட்டி, டிராய் அமைப்புக்கு வாடிக்கையாளர்களிடம் இருந்து புகார்கள் வந்துள்ளன. இதை முக்கிய பிரச்னையாக டிராய் கருதுகிறது. ஆதலால், போதிய தொகை இருப்பில் இருக்கும் வாடிக்கையாளர்களின் எண்ணுக்கான சேவையை, மாதாந்திர குறைந்தப்பட்ச ரீசார்ஜ் செய்யாத காரணத்துக்காக உடனடியாக தொலைத் தொடர்பு சேவை அளிக்கும் நிறுவனங்கள் துண்டிக்கக் கூடாது.
இதுதொடர்பான டிராயின் உத்தரவு, தொலைத் தொடர்பு சேவை அளிக்கும் நிறுவனங்களுக்கு செவ்வாய்க்கிழமை அனுப்பப்பட்டுள்ளது என்றார்.