மதுரை- சென்னை இடையே அதிவேக புதிய ரெயில்! 42 ஆண்டுகளுக்கு பிறகு 2-வது பகல் நேர ரெயில்!!

Read Time:7 Minute, 54 Second

மதுரை- சென்னை இடையிலான அதிவேக ‘தேஜஸ்’ ரெயில் சேவையை தொடங்க உள்ளது.

‘தேஜஸ்’ ரெயில்

இந்திய ரெயில்வேயில் நவீன தொழில்நுட்ப வசதிகளுடன் கூடிய ‘தேஜஸ்‘ ரெயில் இயக்கப்படும் என்று கடந்த 2016-ம் ஆண்டு பட்ஜெட்டில் அறிவிக்கப்பட்டது. அதனை தொடர்ந்து தேஜஸ் ரெயில் தயாரிக்கப்பட்டு மும்பையில் இருந்து கோவா மாநிலம் கர்மாலிக்கு கடந்த 2017-ம் ஆண்டு மே மாதம் முதன்முதலாக இயக்கப்பட்டது. பிறகு, புதுடெல்லி-சண்டிகர் இடையே இயக்கப்பட்டது. இந்த ரெயிலில் நவீன பொழுதுபோக்கு அம்சங்கள் கொண்ட வசதிகள் பல உள்ளன. இப்போது மதுரை – சென்னை இடையே இயக்கப்பட உள்ளது.

சிறப்பு அம்சங்கள் என்ன?

தேஜஸ் ரெயிலில் இருக்கைகள் வெளிநாடுகளில் உள்ள ரெயில்களின் இருக்கை போல வடிவமைக்கப்பட்டு உள்ளன. அதிவேக வை-பை இன்டர்நெட் வசதி, பயோ-கழிப்பறைகள், கண்காணிப்பு கேமரா, தீ மற்றும் புகை எச்சரிக்கை அலாரம், கழுவிய கைகளை உலர வைக்க கருவி, பார்வையற்றவர்களும் எளிதில் அறியக்கூடிய வகையில் பிரெய்லி தொடுதிரை, ஒவ்வொரு இருக்கையிலும் விமானத்தில் இருப்பது போல எல்.இ.டி. டி.வி. வசதி, ஹெட்போன் வசதி என பல்வேறு சிறப்பு அம்சங்கள் உள்ளன.

42 ஆண்டுகளுக்கு பிறகு 2-வது பகல் நேர ரெயில்…

தென்மாவட்டங்களில் இருந்து மதுரை வழியாக சென்னைக்கு தற்போது 20-க்கும் மேற்பட்ட ரெயில்கள் இயக்கப்படுகின்றன. மதுரையில் இருந்து தினமும் ஆயிரக்கணக்கான பயணிகள் சென்னைக்கு ரயில் மூலம் செல்கின்றனர். இருப்பினும் ரெயிலில் டிக்கெட் கிடைக்காமல் மக்கள் தவிக்கும் நிலையும் தொடர்கிறது. இந்நிலையில் வடமாநிலங்களை போன்று மதுரை – சென்னை இடையேயும் ‘தேஜஸ்’ ரெயில்கள் இயக்கப்பட வேண்டும் என வலியுறுத்தப்பட்டது. தென்னக ரெயில்வே பயணிகள் நலச் சங்கம், தமிழ்நாடு தொழில் வர்த்தக சங்கம் மற்றும் பல்வேறு அமைப்பினர், எம்பிக்கள் மத்திய ரெயில்வே அமைச்சகத்துக்கு கோரிக்கை வைத்தனர்.

இதை ஏற்று மதுரை- சென்னைக்கு பகல் நேர ‘தேஜஸ்’ அதி விரைவு ரயிலை தினமும் இயக்க மத்திய ரெயில்வே அமைச்சகம் நடவடிக்கை எடுத்தது. ‘தேஜஸ்’ ரெயில் சேவைக்கு ஒப்புதல் தெரிவிக்கப்பட்டது. மதுரையில் இருந்து சென்னைக்கு முதன் முதலாக 1977-ம் ஆண்டு பகல் நேரத்தில் வைகை எக்ஸ்பிரஸ் ரெயில் இயக்கப்பட்டது. அதே சமயம் பல ஆண்டுகளுக்கு முன்பு இரவு நேரத்தில் பாண்டியன் எக்ஸ்பிரஸ் ரெயில் இயக்கப்பட்டு வருகிறது. இப்போது மதுரையில் இருந்து ஏறக்குறைய 42 ஆண்டுகளுக்குப் பிறகு சென்னைக்கு ‘தேஜஸ்’ என்கிற அதிவேக ரெயில் விரைவில் இயக்கப்பட உள்ளது.

பயண நேரம் எவ்வளவு?

ரெயிலை மணிக்கு 150 கி.மீ. வேகத்தில் கூட இயக்கமுடியும். இருந்தாலும் தற்போது மணிக்கு 70 கி.மீ. வேகத்தில் மட்டும் இயக்கப்பட உள்ளது. இதன் மூலம் சுமார் 7 மணி நேரத்தில் சென்னையை சென்றடையலாம் என அதிகாரிகள் தெரிவித்தனர்.

ரெயில் சென்னையில் இருந்து காலை 6.30 மணிக்குப் புறப்பட்டு, பிற்பகல் 1.30 மணிக்கு மதுரை சென்றடையும். மதுரையில் இருந்து பிற்பகல் 2.30 மணிக்கு கிளம்பி இரவு 9.30 மணிக்கு சென்னை சென்றடையும். வியாழக்கிழமை மட்டும் ரெயில் சேவை இருக்காது. மற்ற 6 நாட்கள் சேவையிருக்கும். சுமார் 7 மணி நேரத்தில் சென்னை-மதுரை இடையே இயக்கத் திட்டமிட்டுள்ளதால் திருச்சி, விழுப்புரம் ரெயில் நிலையங்களில் மட்டும் இந்த ரெயில் நிறுத்தப்படும் என எதிர்பார்க்கப்படுகிறது.

கட்டணம் எவ்வளவு?

தேஜஸ் ரயிலை இயக்க கால அட்டவணை தயாரிக்கப்படுகிறது. கட்டண விவரம் ரெயிலில் உள்ள வசதி, சலுகை விவரம் விரைவில் தெரியவரும். அதுகுறித்து ஆன்லைனில் வெளியிடப்படும் என ரெயில்வே தரப்பில் தெரிவிக்கப்படுகிறது.

தி நியூ இந்தியன் எக்ஸ்பிரஸ் டிசம்பர் 6-ம் தேதி வெளியிட்ட செய்தியில், தேஜஸ் ரெயிலில், சேர் கார் கட்டணம் 1,140 ரூபாயில் இருந்து ஆயிரத்து 1,200 ரூபாயாக நிர்ணயிக்கப்படலாம். சிறப்பு வகுப்புக்கான ரெயில் பெட்டி கட்டணம் 2,100 ரூபாயில் இருந்து 2,200 ரூபாய் வரை நிர்ணயிக்கப்படலாம். இருப்பினும் பயணிகளுக்கு பயனளிக்கும் விதமான நடவடிக்கை எடுக்கப்படும். தள்ளுபடி நடவடிக்கையும் எடுக்கப்படும். இதுவரையில் கட்டணம் முடிவு செய்யப்படவில்லை என்று ரெயில்வே தகவல்கள் தெரிவிக்கிறது என குறிப்பிடப்பட்டது.

பிரதமர் மோடி தொடங்கி வைக்கிறார்

இந்த ரெயிலின் முதல் பயணத்தை பிரதமர் மோடி மதுரையில் இருந்து தொடங்கி வைக்க உள்ளார். மதுரையில் எய்ம்ஸ் மருத்துவமனைக்கான அடிக்கல் நாட்டு விழா ஜனவரி 27-ல் நடைபெற உள்ளது. அப்போது பிரதமர் மோடி இந்த ரெயிலை கொடியசைத்து தொடக்கி வைக்க திட்டமிட்டிருப்பதாக மதுரை ரெயில்வே கோட்ட அதிகாரிகள் தெரிவித்துள்ளதாக செய்தி வெளியாகியுள்ளது.

பெட்டிகள் எத்தனை?

இந்த ரெயிலில் மொத்தம் 10 பெட்டிகள் இணைக்கப்படுகின்றன. ரெயில் என்ஜினுக்கு அருகிலும், பின் பகுதியிலும் கார்டுக்கு 2 பெட்டிகள் ஒதுக்கப்படுகின்றன. முதல் 4 எக்ஸ்கியூடிவ் பெட்டிகள். சொகுசு வசதிகள் விஐபிக்கள், முக்கிய அதிகாரிகள் பயணிக்கும் வகையில் இது வடிவமைக்கப்பட்டுள்ளது. மீதம் உள்ள 4 பெட்டிகளில் சாதாரண மக்கள் பயணிக்கும் வகையில் இருக்கும். ஒவ்வொரு பெட்டியிலும் தலா 48 பேர் வரை பயணம் செய்யலாம்.

பொறுப்பை உணர்வோம்

அதிநவீன வசதிகளை கொண்ட ‘தேஜஸ்’ எக்ஸ்பிரஸ் ரெயில் வரப்பிரசாதமாக அமைய வேண்டும் என்ற எதிர்பார்ப்பு பயணிகள் மத்தியில் உள்ளது. புதிய ரெயில் மூலம் பாண்டியன் மற்றும் தென்மாவட்டங்களில் இருந்து செல்லும் பிற எக்ஸ்பிரஸ் ரெயில்களிலும் பயணிகள் கூட்டம் குறையலாம் எனவும் பார்க்கப்படுகிறது. இந்த ரெயிலில் உள்ள வசதிகளை முறையாக பயன்படுத்த வேண்டிய பொறுப்பு பயணிகளுக்கு உள்ளது.

மும்பை-கோவா இடையே இயக்கப்படும் தேஜஸ் ரெயிலின் பெட்டிகளில் எல்.இ.டி.திரை சேதப்படுத்தப்பட்டும், ஹெட்போன்கள் விஷமிகளால் எடுத்து செல்லப்பட்டதால், அந்த ரெயில் பொலிவை இழந்து வருகிறது. எனவே, பயணிகள் அதிக பொறுப்புணர்வுடன் பயணிக்க வேண்டும் என்று எதிர்பார்க்கப்படுகிறது.