சபரிமலை விவகாரம்: தலைவர்கள் வீடுகளில் வெடிகுண்டு வீச்சு, 10 முக்கியக் குறிப்புகள்

Read Time:4 Minute, 56 Second

1) சபரிமலை அய்யப்பன் கோவிலில் 10 முதல் 50 வயது வரையிலான பெண்கள் தரிசனம் செய்யலாம் என கடந்த செப்டம்பர் மாதம் உச்சநீதிமன்றம் தீர்ப்பு வழங்கியது.

2) உச்சநீதிமன்ற தீர்ப்பை அமல்படுத்துவதில் ஆளும் மார்க்சிஸ்ட் கம்யூனிஸ்டு கட்சி தீவிரமாக உள்ளது. ஆனால் பிரதான எதிர்க்கட்சிகளான காங்கிரசும், பா.ஜனதாவும் இதற்கு எதிர்ப்பு தெரிவித்து போராட்டம் நடத்துகிறது.

3) உச்சநீதிமன்ற தீர்ப்புக்கு பின்னர் சபரிமலை கோவிலுக்கு சென்ற பெண்கள் பக்தர்களால் தடுத்து நிறுத்தப்பட்டனர். போராட்டம் காரணமாக அங்கு ‘144’ தடை உத்தரவு அமல்படுத்தப்பட்டது.

4) இந்த எதிர்ப்புகளுக்கு மத்தியில் ஜனவரி இரண்டாம் தேதி கேரளாவை சேர்ந்த கல்லூரி பேராசிரியையும், மார்க்சிஸ்ட் கம்யூனிஸ்டு தொண்டருமான பிந்து (வயது 42) மற்றும் ரேஷன் கடை ஊழியரான கனகதுர்கா (44) ஆகிய இருவரும் அதிகாலை சுமார் 3.45 மணியளவில் அய்யப்பனை தரிசித்தனர். மாநில அரசின் முழு பாதுகாப்புடன் தரிசனம் செய்தனர்.

5) ஏற்கனவே போராட்டம் நடைபெற்ற நிலையில் பெண்கள் தரிசனம் செய்தனர் என்ற செய்தி போராட்டத்தை தீவிரப்படுத்தச் செய்தது. பா.ஜனதா முழு அடைப்பு போராட்டம் நடத்தியது. ஆங்காங்கே வன்முறை சம்பவங்களும் பதிவாகியது. பந்தளம் பகுதியில் நடத்தப்பட்ட கல்வீச்சு தாக்குதலில் பா.ஜனதா தொண்டர் ஒருவர் உயிரிழந்தார். போதிய பாதுகாப்பு ஏற்பாடுகள் செய்யப்படவில்லை எனவும் குற்றம் சாட்டப்பட்டது.

6) பா.ஜனதா மாநில தலைவர் பிஎஸ் ஸ்ரீதரன்பிள்ளை பேசுகையில், “நவீன அவுரங்கசீப்தான் பினராயி விஜயன். அவுரங்கசீப் இந்து கோவில்களை அழித்தவர். பெண்கள் கோவிலுக்குள் அழைத்துச் செல்லப்பட்ட விதம் திட்டமிட்ட மற்றும் சதித்திட்டமாகும். மாநிலத்தில் ஆளும் மார்க்சிஸ்ட் கம்யூனிஸ்ட் கோவிலின் பாரம்பரியத்தை அழித்துவிட்டது. இதற்கு அய்யப்ப பக்தர்களும், பொதுமக்களும் பதிலளிப்பார்கள்,” என்றார்.

7) கோவிலுக்கு சென்ற பெண்கள் பக்தர்கள் கிடையாது, அவர்கள் ஆர்வலர்கள் என காங்கிரஸ் குற்றம் சாட்டியது. காங்கிரஸ் கட்சியை சேர்ந்த ரமேஷ் சென்னிதாலா பேசுகையில், “உண்மையை பினராயி விஜயனே ஒப்புக்கொண்டார். இது கோவில் மீது மக்கள் கொண்டிருந்த நம்பிக்கையின் மீது சதிதிட்டம் தீட்டப்பட்டு நடத்தப்பட்ட தாக்குதலாகும். பெண்கள் எங்கு தங்கியிருந்தார்கள்? பெண்கள் பினராயி விஜயனின் உத்தரவின்படி கோவிலுக்கு அழைத்துச் செல்லப்பட்டுள்ளனர்,” என்றார்.

8) கேரளா முதல்-மந்திரி பினராயி விஜயன் பேசுகையில், சபரிமலை கோவிலுக்கு பெண்கள் செல்ல விரும்பினால் அவர்களுக்கு முழு பாதுகாப்பு வழங்கப்படும் என்பதில் மிகவும் உறுதியாக உள்ளோம் என வலியுறுத்தினார்.

9) கேரளாவில் ஒரு புறம் போராட்டம் நடத்த சபரிமலையில் இலங்கையை சேர்ந்த சசிகலா (46) என்ற பெண் தரிசனம் செய்தார் என தகவல் வெளியாகியது. போலீசும் இதனை உறுதி செய்தது. போராட்டம் தொடர்ந்து நடைபெற்று வருகிறது. வன்முறை தொடர்பாக இதுவரை 1, 369 பேரை போலீஸார் கைது செய்துள்ளனர். மேலும் திருவனந்தபுரம், பத்தினம்திட்டா, கண்ணூர், கோழிக்கோடு, பாலக்காடு, காசர்கோடு ஆகிய மாவட்டங்களில் பதற்றமாக இருப்பதால், அங்கு போலீஸார் குவிக்கப்பட்டுள்ளனர்.

10) இந்நிலையில் தலச்சேரி எம்எல்ஏ ஷம்ஷீர், மார்க்சிஸ்ட் கம்யூனிஸ்ட் தலைவர்கள் வீடுகளில் நேற்று நள்ளிரவில் நாட்டு வெடிகுண்டு வீசப்பட்டுள்ளது. இதுபோன்று பா.ஜனதா எம்.பி. வி. முரளிதரன் வீட்டிலும் நாட்டு வெடிகுண்டு வீசப்பட்டுள்ளது. போராட்டம் நடைபெறும் நிலையில் வெடிகுண்டு வீசப்பட்டதால் பெரும் பதற்றம் ஏற்பட்டுள்ளது. பந்தளம், அடூர், குடும்மோன், பத்தினம்திட்டா ஆகிய மாவட்டங்களில் அடுத்த 7 நாட்களுக்கு தடை உத்தரவு பிறப்பிக்கப்பட்டுள்ளது.