தாமிரபரணி தண்ணீரை தொழிற்சாலைகள் எடுக்க தடை – உச்சநீதிமன்றம் உத்தரவு

Read Time:3 Minute, 56 Second

தூத்துக்குடி அனல்மின் நிலையம் தவிர தாமிரபரணி தண்ணீரை மற்ற தொழிற்சாலைகள் எடுக்கக் கூடாது என உச்ச நீதிமன்றம் உத்தரவிட்டுள்ளது.

தூத்துக்குடி மாவட்டத்தில் தாமிரபரணி ஆற்றின் மூலமாக 46 ஆயிரத்து 107 ஏக்கர் விவசாய நிலம் பாசன வசதி பெற்று வருகின்றன. இதேபோல் தாமிரபரணி ஆற்றின் குடிதண்ணீரை நம்பி லட்சக்கணக்கான மக்கள் உள்ளனர். கடந்த 2011-ம் ஆண்டு ஸ்ரீவைகுண்டம் அணையின் உட்பகுதியில் இருந்து தூத்துக்குடியில் உள்ள 21 தொழிற்சாலைகளுக்கு நாள்தோறும் 9 கோடியே 20 லட்சம் லிட்டர் தாமிரபரணி ஆற்றின் தண்ணீரை எடுத்து வழங்கும் திட்டம் நடைமுறைக்கு கொண்டு வரப்பட்டது.

இதனை எதிர்த்து தி.மு.க. மாநில இளைஞர் அணி துணை செயலாளர் ஜோயல் தேசிய பசுமை தீர்ப்பாயத்தில் வழக்கு தொடர்ந்தார். தினந்தோறும் தாமிரபரணி ஆற்றில் இருந்து ராட்சத மோட்டார்கள் மூலமாகத் தண்ணீரை உறிஞ்சி எடுத்து சுத்திகரித்து `குடிநீர்’ என்ற பெயரில் முழுக்க முழுக்க மோசடி செய்து தொழிற்சாலைகளுக்கு 1,000 லிட்டர் தண்ணீர், வெறும் 15 ரூபாய் என அடிமட்ட விலையில் விற்று, அரசுக்கு ஆயிரக்கணக்கான கோடி ரூபாய் இழப்பு ஏற்பட்டுள்ளது என்று தெரிவித்தார்.

ஸ்ரீவைகுண்டம் அணையில் இருந்து ஸ்டெர்லைட் உள்ளிட்ட ஆலைகள் நீர் எடுக்க பசுமைத் தீர்ப்பாயம் தடை

விசாரணை முடிவில் தீர்ப்பு வழங்கிய பசுமைத் தீர்ப்பாயம், முழுக்க முழுக்க மத்திய சுற்றுச்சூழல் மற்றும் வனத்துறை அமைச்சகத்தின் கட்டுப்பாட்டில் இருக்கும் ஸ்ரீவைகுண்டம் அணையிலிருந்து ஸ்டெர்லைட் தொழிற்சாலை உட்பட எந்தத் தொழிற்சாலைக்கும் தண்ணீர் எடுக்க அனுமதிக்கக் கூடாது என்றும் அணையிலிருந்து எடுக்கப்படும் தண்ணீரை பொதுமக்களின் குடிநீர் தேவைக்கு மட்டுமே வழங்கவேண்டும் என்று உத்தரவிட்டது. முப்போக சாகுபடி விவசாயத்தை முடக்கிய, பொதுமக்களின் குடிநீர் தட்டுப்பாட்டுக்கு முக்கிய காரணமாக இருந்த 20 எம்.ஜி.டி. திட்டத்திற்கு முற்றுப்புள்ளி வைக்கும் வழக்கில் சாதகமான தீர்ப்பால் பொதுமக்கள், விவசாயிகள் மகிழ்ச்சியடைந்தனர்.

பசுமை தீர்ப்பாயத்தின் உத்தரவுக்கு தடை விதிக்கக்கோரி தமிழக அரசு, உச்சநீதிமன்றத்தில் மேல்முறையீடு செய்தது. இந்த வழக்கு உச்சநீதிமன்றத்தில் நேற்று விசாரணைக்கு வந்தது. இரு தரப்பு வாதங்களை கேட்ட உச்சநீதிமன்றம் ‘ஸ்ரீவைகுண்டம் அணைக்கட்டில் இருந்து தூத்துக்குடி அனல்மின் நிலையத்துக்கும், குடிநீர் தேவைக்கும் மட்டுமே தாமிரபரணி ஆற்றில் இருந்து தண்ணீர் வழங்க வேண்டும். எக்காரணம் கொண்டும் தூத்துக்குடியிலுள்ள ஸ்டெர்லைட் உள்ளிட்ட மற்ற எந்த தொழிற்சாலைகளுக்கும் தண்ணீர் எடுக்கக் கூடாது என இடைக்கால உத்தரவை பிறப்பித்தது. இந்த வழக்கில் 21-ந்தேதிக்குள் மத்திய அரசின் சுற்றுச்சூழல் மற்றும் வனத்துறை அமைச்சகம் பதில் மனுதாக்கல் செய்ய வேண்டும் எனவும் உத்தரவிட்டது.