ரெயில் நிலையங்களில் 15 ஆண்டுகளுக்குப் பின் மீண்டும் வருகிறது மண் குவளை…

Read Time:5 Minute, 46 Second

ரெயில் நிலையங்களில் 15 ஆண்டுகளுக்குப் பின்னர் மீண்டும் மண் குவளைகள் பயன்பாட்டுக்கு வருகிறது.

இந்திய ரெயில் நிலையங்களில் ஒருமுறை மட்டும் பயன்படுத்தப்படும் பிளாஸ்டிக் மற்றும் பேப்பர் கப்களில் தேநீர், பால், காபி வழங்கப்பட்டு வருகிறது. இதனை பயணிகள் குப்பையிலும் போடுவது கிடையாது. ரெயில்வே தண்டவாளங்களில் எறிவதால் அவை கழிவுநீர்களை அடைக்கிறது, சுகாதாரத்திற்கு பெரும் சிரமத்தை ஏற்படுத்துகிறது. பயணியாளர்களுக்கு பெரும் துயரத்தை ஏற்படுத்துகிறது. பயணிகள் குப்பைத் தொட்டியை பயன்படுத்தினாலே போதும், அதைதான் பலரும் செய்வது கிடையாது. கடந்த 15 ஆண்டுகளுக்கு முன் முன்னாள் ரெயில்வே அமைச்சர் லாலு பிரசாத் யாதவ் ரெயில் நிலையங்களில் மண் குவளைகளை அறிமுகம் செய்தார். ஆனால் வழக்கம்போல் அது செயல் இழந்து சென்றது. பேப்பர் கப்கள் பயன்பாட்டுக்கு வந்தது.

இப்போது ரெயில் நிலையங்களில் 15 ஆண்டுகளுக்குப் பின்னர் மீண்டும் மண் குவளைகள் பயன்பாட்டுக்கு வருகிறது.

எதுவும் இயற்கையோடு ஒன்றியிருந்தால் வாழ்க்கையில் எந்தஒரு பிரச்சனையும் கிடையாது. இப்போது இதனை உணரும் மக்கள் மீண்டும் பாரம்பரியம் நோக்கி செல்லும் நிலையில் இப்படியொரு நகர்வு ஏற்படுகிறது.

மத்திய ரெயில்வே அமைச்சர் பியூஷ் கோயல் சமீபத்தில் வாரணாசி மற்றும் ரேபரேலி ரெயில் நிலைய அதிகாரிகளுக்கு பிறப்பித்த உத்தரவில் பயணிகளுக்கு வழங்கும் உணவுப் பொருட்கள், பால், தேநீர், காபி உள்ளிட்டவற்றை மண் குவளையிலும், பீங்கான் தட்டுகளிலும் வழங்க கோரியுள்ளார். இந்த உத்தரவை வடகிழக்கு ரெயில்வே முன்னெடுக்கிறது. ரெயில் நிலையங்களில் மண் குவளையில் தேநீர், பால், காபி ஆகியவற்றை வழங்குவதற்கு நடவடிக்கை எடுக்கப்படுகிறது. இதனால் குவளை தயாரிக்கும் தொழிலில் ஈடுபட்டுள்ள மக்களுக்கு மிகப்பெரிய அளவில் வேலைவாய்ப்பு உருவாகலாம்.

காதி மற்றும் கிராம தொழிற்சாலை ஆணையம் மேற்கொண்ட முயற்சிக்கு வெற்றி கிடைத்துள்ளது. இது தொடர்பாக அமைச்சர் பியூஷ் கோயிலுக்கு கடிதம் மூலம் வலியுறுத்தி, ரேபரேலி, வாரணாசி ரெயில் நிலையங்களில் செயல்படுத்த கேட்டுக்கொள்ளப்பட்டது. இதன்மூலம் உள்ளூர் மண்பாண்ட உற்பத்தியாளர்களுக்கு வேலைவாய்ப்பு கிடைக்கும் என்று தெரிவிக்கப்பட்டது.

இது குறித்து பிறப்பிக்கப்பட்ட சுற்றறிக்கையில் “ சுற்றுச்சூழலுக்கு கேடுவிளைவிக்காத, உள்ளூரில் தயாரிக்கப்பட்ட மண்ணால் செய்யப்பட்ட குவளைகள், தட்டுகளைப் பயணிகளுக்கு உணவுப்பொருட்கள், தேநீர், பால் ஆகியவற்றை வழங்கப் பயன்படுத்த வேண்டும் என்று மண்டல ரெயில் நிலையங்கள், ஐஆர்சிடிசி அமைப்பை கேட்டுக்கொள்கிறோம். ரேபரேலி, வாரணாசி ரயில் நிலையங்கள் உடனடியாக டெரகோட்டா பொருட்களை பயன்படுத்த வேண்டும், இதன் மூலம் மண்பாண்ட உற்பத்தியாளர்களுக்கு வேலைவாய்ப்பு கிடைக்கும்” என தெரிவிக்கப்பட்டுள்ளது.

காதி மற்றும் கிராம தொழிற்சாலை ஆணையத்தின் தலைவர் வி.கே. சக்சேனா பேசுகையில் “மண் குவளைகள் தயாரிப்பை ஊக்குவிப்பதற்காக மண்பாண்டம் செய்பவர்களுக்கும் மின்மோட்டார் பொருத்தப்பட்ட சக்கரங்கள் வழங்கியுள்ளோம். இதன் மூலம் நாள் ஒன்றுக்கு 600 கோப்பைகள் வரை செய்ய முடியும். அவர்களுக்கு வருமானமும் அதிகரிக்கும். எங்களுடைய திட்டத்தை ரெயில்வே ஏற்றுக்கொண்டதால், இனி லட்சக்கணக்கான மண்பாண்ட உற்பத்தியாளர்களுக்கு வேலைவாய்ப்பும், வருமானமும் கிடைக்கும். இது அனைவருக்குமான வெற்றி.

ஒட்டுமொத்த மண்பாண்ட உற்பத்தியாளர்களும் ரயில்வே துறைக்கு நன்றி செலுத்துவார்கள். ரேபரேலி, வாரணாசி ரயில் நிலையத்துக்கு நாள் ஒன்றுக்கு 2.5 லட்சம் கோப்பைகள் தேவைப்படுகிறது அதை இவர்கள் வழங்குவார்கள் என்று நம்புகிறோம்”என கூறியுள்ளார். கும்ஹார் சஷாக்திகரண் யோஜனா திட்டத்தின் கீழ் உ.பி. அரசு மின்மோட்டார்கள் பொருத்தப்பட்ட சக்கரங்களை மண்பாண்ட உற்பத்தியாளர்களுக்கு வழங்கியுள்ளது.

பிரதமர் மோடி தொகுதியான வாரணாசியில் ஆயிரம் மின்சக்கரங்களும், சோனியா காந்தியின் தொகுதியான ரேபரேலியில் 700-க்கும் மேற்பட்ட மின்சக்கரங்களும் வழங்கப்பட்டுள்ளன. மண்பாண்ட உற்பத்தியாளர்களுக்கு பயனுள்ள நடவடிக்கையாக இருப்பதுடன் சுற்றுசூழலுக்கும் உகந்ததாக இருக்கும் என பலரும் இந்நகர்வை பாராட்டி வருகிறார்கள்.