விளம்பரத்துக்கு மட்டுமே 56% நிதி செலவு…!

Read Time:3 Minute, 37 Second

”பெண் குழந்தைகளைக் காப்போம், பெண் குழந்தைகளைப் படிக்க வைப்போம்” என்ற மத்திய அரசு திட்டத்தின் விளம்பரத்திற்கு மட்டும் மொத்த நிதியில் இருந்து 56 சதவீதம் செலவழிக்கப்பட்டுள்ளது என தெரிவிக்கப்பட்டுள்ளது.

பாலினம் கண்டறிந்து கருச்சிதைவு செய்வதை தடுத்தல், பெண் குழந்தைகளுக்கான கல்வி வாய்ப்பு, பாதுகாப்பது மற்றும் பெண்கள் மேம்பாட்டுக்கான ஒருங்கிணைந்த திட்டமாக ”பெண் குழந்தைகளைக் காப்போம், பெண் குழந்தைகளைப் படிக்க வைப்போம்” திட்டத்தை மத்திய அரசு தொடங்கியது. பிரதமர் மோடி இத்திட்டத்தை கடந்த 2015-ம் ஆண்டு ஜனவரியில் அரியானாவில் தொடங்கினார்.

இந்த திட்டத்தின் நோக்கத்தினை அடைய செய்யப்பட்ட செலவில் பாதிக்கு மேல் விளம்பரதிற்காக செய்யப்பட்டுள்ளது. மத்திய அரசு களப்பணிக்கு பதிலாக விளம்பரங்களுக்கு அதிகமான தொகையை செலவு செய்துள்ளது.

”பெண் குழந்தைகளைக் காப்போம், பெண் குழந்தைகளைப் படிக்க வைப்போம்”திட்டம் தொடர்பாக காங்கிரஸ், சிவசேனா, தெலுங்கானா ராஷ்டீரிய சமிதி கட்சியின் உறுப்பினர்கள் எழுப்பிய கேள்விக்கு மத்திய அரசு பதிலளித்துள்ளது.

மக்களவையில் மகளிர் மற்றும் குழந்தைகள் மேம்பாட்டு நலத்துறை இணை அமைச்சர் வீரேந்திர குமார் ஜனவரி 4-ம் தேதி தாக்கல் செய்துள்ள தகவலில், பெண் குழந்தைகளைக் காப்போம், பெண் குழந்தைகளைப் படிக்க வைப்போம்” திட்டத்துக்கு கடந்த 5 ஆண்டுகளில் 648 கோடி ரூபாய் ஒதுக்கப்பட்டுள்ளது. இதில் ரூ.364.66 கோடி விளம்பரத்திற்காக செலவு செய்யப்பட்டுள்ளது என தெரிவிக்கப்பட்டுள்ளது.

வெறும் 24.5 சதவீதம் அல்லது ரூ.159.18 கோடி மட்டுமே மாநிலங்களுக்கும், மாவட்டங்களுக்கும் வழங்கப்பட்டுள்ளது என தெரிவிக்கப்பட்டுள்ளது.

2018-19-ம் ஆண்டுக்கு இத்திட்டத்திற்காக ரூ.280 கோடியை மத்திய அரசு ஒதுக்கியது. ஆனால் விளம்பரத்திற்கு மட்டும் ரூ.155.71 கோடி ஒதுக்கப்பட்டது. 70.63 கோடி ரூபாய் மட்டும் மாநிலங்களுக்கும் மாவட்டங்களுக்கும் அளிக்கப்பட்டது. மீதமுள்ள ரூ. 53.66 கோடி அல்லது 19 சதவித நிதி இன்னும் ஒதுக்கீடே செய்யப்படவில்லை என தெரிவிக்கப்பட்டுள்ளது. இதுவே
2017-18-ம் ஆண்டில் விளம்பரத்திற்கான செலவு அதிகமாகும். அதாவது மத்திய அரசு ஒதுக்கிய ரூ.200 கோடி நிதியில் ரூ. 135.71 கோடி அல்லது 68% நிதி விளம்பரங்களுக்காகவே செலவிடப்பட்டது. 2014-15-ம் ஆண்டில் ரூ.18.91 கோடிகளும், 2015-16-ம் ஆண்டில் ரூ.24.54 கோடிகளும், 2016-17ம் ஆண்டில் ரூ.29.79 கோடிகளும் விளம்பரத்துக்காக மட்டுமே செலவிடப்பட்டுள்ளது என தெரிவிக்கப்பட்டுள்ளது.

பாதிக்கும் அதிகமான தொகையை விளம்பரத்திற்கு பயன்படுத்திய மத்திய அரசு விமர்சனங்களை எதிர்க்கொண்டுள்ளது.