நீர்நிலை ஆக்கிரமிப்பாளர்களை வாக்காளர் பட்டியலில் சேர்க்கக்கூடாது உயர்நீதிமன்றம் உத்தரவு

Read Time:3 Minute, 37 Second

நீர்நிலை ஆக்கிரமிப்பாளர்களை வாக்காளர் பட்டியலில் சேர்க்கக்கூடாது என உயர்நீதிமன்றம் உத்தரவிட்டுள்ளது.

தமிழத்தில் நீர்நிலைகளின் ஆக்கிரமிப்பு நாளுக்கு நாள் அதிகரித்து செல்கிறது. கால்வாய்கள், குளங்கள், ஏரிகள் காணாமல் போகிறது அல்லது சுருங்கி வருகிறது. இந்நிலையில் இவ்விவகாரத்தில் அதிரடியான உத்தரவை உயர்நீதிமன்ற மதுரைக்கிளை விடுத்துள்ளது.

தமிழகத்தில் குளங்கள், கண்மாய்கள் உள்ளிட்ட நீர்நிலைகள் ஆக்கிரமிக்கப்படுவது நாளுக்கு நாள் அதிகரித்து வருகிறது. எனவே நீர்நிலைகளை ஆக்கிரமித்து கட்டப்படும் கட்டிடங்களுக்கு பத்திரப்பதிவு செய்யக்கூடாது, மின் இணைப்பு வழங்கக்கூடாது, உள்ளாட்சி அனுமதியுடன் வரைபட அனுமதி அளிக்கக்கூடாது, சொத்து வரி வசூலிக்கக்கூடாது, ஆக்கிரமிப்பு கட்டிட உரிமையாளர்களுக்கு வாக்காளர் அடையாள அட்டை வழங்கக்கூடாது, அரசின் நலத்திட்ட உதவிகளையும் வழங்கக்கூடாது என்று உத்தரவிட வேண்டும் என கே.கே.ரமேஷ் தரப்பில் வழக்கு தொடரப்பட்டது.

இதுதொடர்பான விசாரணையின் போது உயர்நீதிமன்றம் நீர்நிலைகளில் கட்டப்படும் கட்டிடங்களுக்கு எந்த பத்திரமும் பதிவு செய்யக்கூடாது என்று அனைத்து சார்–பதிவாளர்களுக்கும் தமிழக பதிவுத்துறை தலைவர் சார்பில் சுற்றறிக்கை அனுப்ப வேண்டும் என உத்தரவிட்டுள்ளது.

நீர்நிலைகளை ஆக்கிரமித்து கட்டப்பட்டுள்ள கட்டிடங்களுக்கு மின் இணைப்பு வழங்குவதில்லை என்பதை மின்வாரிய அதிகாரிகள் உறுதி செய்ய வேண்டும். நீர்நிலைகளை ஆக்கிரமித்து கட்டப்பட்டுள்ள அனைத்து கட்டிடங்களுக்கும் குடிநீர் இணைப்பு வழங்கக்கூடாது. ஆக்கிரமிப்பு கட்டிடங்களுக்கு சொத்து வரி உள்ளிட்ட எந்த வரியும் வசூலிக்கக்கூடாது எனவும் உத்தரவிட்டது. நீர்நிலை ஆக்கிரமிப்பாளர்களை வாக்காளர் பட்டியலில் சேர்க்கக்கூடாது என்று சம்பந்தப்பட்ட அதிகாரிகளுக்கு தலைமை தேர்தல் அதிகாரி சுற்றறிக்கை அனுப்ப வேண்டும் எனவும் உத்தரவிட்டது.

கடந்த 2017–ம் ஆண்டு மத்திய ஆடிட்டர் ஜெனரல் அளித்த வழிகாட்டுதலின்படி நீர்நிலைகளில் உள்ள ஆக்கிரமிப்புகளை அகற்றுவது குறித்து எடுக்கப்பட்ட நடவடிக்கை என்ன? என்பது குறித்து தமிழக அரசின் தலைமை செயலாளர் பிப்ரவரி மாதம் 11–ந்தேதிக்குள் பதில் மனு தாக்கல் செய்ய வேண்டும் என உத்தரவிட்ட நீதிமன்றம், மாவட்ட கலெக்டர்கள், தங்கள் மாவட்டத்தில் நீர்நிலைகளில் உள்ள ஆக்கிரமிப்புகள் மற்றும் நீர்நிலைகளின் மூல வரைபடங்களின் நகல்களை சார்–பதிவாளர் அலுவலகங்களுக்கும், மின்வாரியத்துக்கும், உள்ளாட்சி அமைப்புகளுக்கும் மாவட்ட தேர்தல் அதிகாரிக்கும் பிப்ரவரி மாதம் 8–ந்தேதிக்குள் அனுப்ப வேண்டும் என அதிரடியாக உத்தரவை பிறப்பித்துள்ளது.