“மதுவால் ஒரு தலைமுறையே சீரழிந்துவிட்டது; வருங்கால சந்ததியை காப்பது அவசியம்’’ உயர்நீதிமன்றம்

Read Time:2 Minute, 52 Second

அரசின் வருமானத்துக்கு டாஸ்மாக் கடைகளை மட்டுமே நம்பி இருக்கக்கூடாது என உயர்நீதிமன்றம் தெரிவித்துள்ளது.

தமிழகத்தில் டாஸ்மாக் கடைகள் மூலம் அரசுக்கு ஆண்டுதோறும் பல ஆயிரம் கோடி ரூபாய் வருமானம் கிடைக்கிறது. இந்நிலையில் இளைஞர்களுக்கு மது விற்பனை செய்யக்கூடாது, மது விற்பனை நேரத்தை குறைக்க வேண்டும், மதுப்பழக்கத்தால் ஏற்படும் தீங்குகளை அனைவரும் தெரிந்து கொள்ளும் வகையில் அறிவிப்பு பலகை வைக்க உத்தரவிட வேண்டும் என உயர்நீதிமன்றக் மதுரை கிளையில் வழக்கு தொடரப்பட்டது. டாஸ்மாக் விற்பனை நேரத்தை மதியம் 2 மணி முதல் இரவு 8 மணி வரை என மாற்றி அமைக்கவும் உத்தரவிட வேண்டும் எனவும் கோரப்பட்டது.

இவ்வழக்கு தொடர்பான விசாரணையின் போது பள்ளி – கல்லூரி மாணவ-மாணவிகள் மது அருந்துவது போன்ற காட்சிகளை கொண்ட புகைப்படங்கள் சமர்ப்பிக்கப்பட்டது.

‘24 மணி நேரமும் மது கிடைக்கும் போது, மதுக்கடைகளின் நேரத்தை மாற்றி அமைப்பதால் மட்டும் என்ன பயன்?’’ என்று கேள்வி எழுப்பியது நீதிமன்றம். ‘‘மது விற்பனையை முறைப்படுத்த பல்வேறு விதிகளும், அரசாணைகளும் பிறப்பிக்கப்பட்டு உள்ளன’’ என்று அரசு தரப்பில் தெரிவிக்கப்பட்டது. இதனையடுத்து நீதிமன்றம், விதிகள் உள்ளன. ஆனால் அவை முறையாக செயல்படுத்தப்படுவது கிடையாது.

டாஸ்மாக் கடைகள் மற்றும் பார்களில் கண்காணிப்பு கேமராக்கள் பொருத்தப்பட்டு உள்ளதா? சமுதாயத்தில் ஏராளமான பிரச்சினைகளுக்கு மதுதான் காரணம். டாஸ்மாக் கடைகளில் கண்காணிப்பு கேமராக்களை பொருத்தினால் பெரும்பாலான குற்றங்கள் குறையும். அரசின் வருமானத்துக்கு டாஸ்மாக் கடைகளை மட்டுமே நம்பி இருக்கக்கூடாது. வருவாயை பெருக்குவதற்கு பல்வேறு வழிகள் உள்ளன. அந்த வழிகளை பின்பற்றுவதில் அரசு கவனம் செலுத்த வேண்டும்.

மதுவால் ஒரு தலைமுறையே சீரழிந்துவிட்டது. வருங்கால சந்ததியினரை மதுப்பழக்கத்தில் இருந்து காப்பது அவசியம். எனவே கிராமசபை கூட்டங்களை நடத்தி மதுக்கடைகள் வேண்டாம் என்று தீர்மானம் நிறைவேற்றலாம் என கூறியுள்ளது. இவ்வழக்கு தொடர்பாக தமிழக அரசு பதில் அளிக்க உத்தரவிட்ட நீதிமன்றம் விசாரணையை வருகிற 28–ந் தேதிக்கு ஒத்திவைத்தது.