TMPBullet: சபரிமலையில் அனைத்து வயது பெண்களும் நுழைவதற்கு தேவஸம் போர்டு ஆதரவு

Read Time:4 Minute, 33 Second

சபரிமலை ஐயப்பன் கோயிலில் அனைத்து வயது பெண்களும் வழி பட அனுமதிக்கும் தீர்ப்பை எதிர்த்து தாக்கல் செய்யப்பட்ட மறுஆய்வு மனுக்கள் மீதான விசாரணை நிறைவடைந்தது. இதையடுத்து தீர்ப்பை உச்ச நீதிமன்றம் ஒத்திவைத்துள்ளது.

கோவிலில் பெண்களை அனுமதிக்கக்கூடாது என்ற தீவிர நிலைப்பாட்டில் இருந்த திருவிதாங்கூர் தேவசம் போர்டு திடீரென தனது நிலைப்பாட்டை மாற்றிக்கொண்டது. “உச்ச நீதிமன்றத் தீர்ப்பை மதிக்கிறோம். கோயிலில் அனைத்து வயது பெண்களையும் அனுமதிக்கலாம் என்ற தீர்ப்பை ஏற்கிறோம்” என்று தெரிவித்துள்ளது. ‘உயிரியல் ரீதியான குணாம்சங்களுக்காக’ ஒரு குறிப்பிட்ட வகையினரை அனுமதிக்காமல் பாகுபாடு காட்ட முடியாது என கூறியுள்ளது.


வருமான வரி கணக்கு தாக்கலுக்கு ஆதாருடன் ‘பான்’ எண்ணை இணைப்பது கட்டாயம்

வருமான வரி கணக்கு தாக்கல் செய்வதற்கு ஆதார் கட்டாயம் தேவை என சுப்ரீம் கோர்ட்டு செப்டம்பர் மாதம் 26-ம் தேதி உத்தரவிட்டது. இதற்கிடையே ஸ்ரேயா சென், ஜெயஸ்ரீ சத்புட்டே ஆகிய இருவர் 2018 -19 மதிப்பீட்டு ஆண்டுக்கான வரிமான வரி கணக்குகளை ஆதார், பான் எண் இணைக்காமல் தாக்கல் செய்யலாம் என டெல்லி உயர்நீதிமன்றம் அனுமதி அளித்தது. இந்த உத்தரவை எதிர்த்து சுப்ரீம் கோர்ட்டில் மத்திய அரசு மேல்முறையீடு செய்தது.

மத்திய அரசு மேல்முறையீடு குறித்து விசாரித்த சுப்ரீம் கோர்ட்டு, வருமான வரி கணக்கு தாக்கல் செய்வதற்கு ஆதார் எண்ணுடன் ‘பான்’ எண்ணை இணைப்பது கட்டாயம் என உத்தரவிட்டுள்ளது. வருமான வரி சட்டத்தின் பிரிவு 139 ஏஏ, வருமான வரி கணக்கு தாக்கலின் போது, ஆதார் எண்ணுடன் ‘பான்’ எண் என்று அழைக்கப்படுகிற வருமான வரி நிரந்தர கணக்கு எண்ணை இணைக்க வேண்டும் என்று கூறுகிறது. வருமான வரிச்சட்டம் பிரிவு 139 ஏஏ செல்லுபடியாகத்தக்கது.


ராபர்ட் வதேரா அமலாக்கத்துறை அலுவலகத்தில் ஆஜர்

லண்டனில் 18 கோடி ரூபாய் மதிப்புள்ள வீடுகள் உள்ளிட்ட சொத்துகள் வாங்கிய விவகாரத்தில், சட்டவிரோத பணப்பரிமாற்றம் நடந்துள்ளதாக, ராபர்ட் வதேரா மற்றும் மனோஜ் அரோரா மீது, அமலாக்கத்துறை வழக்குப் பதிவு செய்துள்ளது. ஐக்கிய முற்போக்கு கூட்டணி ஆட்சிக்காலத்தில் சில தொழில் நிறுவனங்களுக்கு சாதகமாக செயல்பட்டதால், வதேராவுக்கு பிரதிபலனாக சொத்துக்கள் வாங்கி தரப்பட்டதாக பாஜக புகார் கூறி வருகிறது.

இவ்வழக்கு தொடர்பாக காங்கிரஸ் தலைவர் ராகுல் காந்தியின் மைத்துனர் ராபர்ட் வதேரா அமலாக்கத்துறை அலுவலகத்தில் ஆஜரானார். அவரிடம் 4 மணி நேரங்களுக்கு மேலாக விசாரணை நடைபெற்றது.


காந்தியின் உருவ பொம்மையைச் சுட்டு, தீ வைத்த இந்து மகாசபா தலைவர் பூஜா பாண்டே கைது

தேசத்தந்தை மகாத்மா காந்தியின் நினைவு நாள் நாடு முழுவதும் அனுசரிக்கப்பட்ட போது உத்தரபிரதேச மாநிலம் அலிகார் பகுதியில் இந்து மகா சபை அலுவலகத்தில் காந்தியின் உருவ பொம்மையை வைத்து, அந்த அமைப்பின் தலைவர்களில் ஒருவரான பூஜா சகுன் பாண்டே துப்பாக்கியால் சுட்டார். உருவ பொம்மையில் வைக்கப்பட்டிருந்த சிவப்பான திரவம் ரத்தம் போல் வழிந்து ஓடியவுடன், அந்த உருவ பொம்மை மீது பெட்ரோலை ஊற்றி தீ வைத்து கொளுத்தினார்கள்.

இதை வீடியோவாக எடுத்து வெளியிட்டனர். சுடும்போது நாதுராம் கோட்சே வாழ்க என்று இந்தியில் முழக்கமிட்டனர். இதுதொடர்பாக வழக்குப்பதிவு செய்துவரும் போலீஸ் பூஜா பாண்டேவை கைது செய்தது.