வாட்ஸ்-அப்பில் அரசியல் கட்சிகள்தான் போலி செய்திகளை பரப்புகின்றன…!

Read Time:2 Minute, 9 Second

குறுஞ்செய்திகளை பகிரப்பயன்படும் செயலியான வாட்ஸ் அப் உலகம் முழுவதும் பில்லியன் கணக்கான மக்களால் பயன்படுத்தப்படுகிறது.

இந்தியாவில் அதிகமானோர் பயன்படுத்தும் வாட்ஸ் அப்பில் பரப்பப்படும் வதந்திகளால் பெரும் சிக்கல்கள் ஏற்பட்டதும் பாதுகாப்பு ஏற்பாடுகளை வாட்ஸ் அப் கொண்டுவந்தது. ஒரு செய்தியை குறைந்தபட்சம் 5 நபருக்குதான் ஒரே நேரத்தில் பகிரமுடியும் என கொண்டுவந்தது. இதனையடுத்தும் போலியான செய்திகள் பரப்பப்பட்டுதான் வருகிறது. நாட்டில் வாட்ஸ் அப் மூலம் வதந்திகளும், பொய்யான செய்திகளும் பரவுவது அதிகரித்து வருகிறது.

இதைத் தொடர்ந்து, பொய் செய்திகள், வதந்திகள் பரவுவதை தடுக்க உடனடியாக நடவடிக்கை எடுக்க வலியுறுத்தி, வாட்ஸ் அப் நிறுவனத்துக்கு மத்திய அரசு ஏற்கெனவே இரு முறை நோட்டீஸ் அனுப்பியது. இப்போது 2019 தேர்தல் வரவுள்ள நிலையில் தேர்தல் ஆணையம் பார்வையும் சமூக வலைதளங்களின் மீதே உள்ளது. எங்களுடைய தளங்களை தவறாக பயன்படுத்த அனுமதிக்கமாட்டோம் என சமூக வலைதள நிறுவனங்கள் உறுதியளித்துள்ளன.

இந்நிலையில் அரசியல் கட்சிகள்தான் போலி செய்திகளை பரப்புகின்றன என வாட்ஸ்-அப் நிறுவனம் கூறியுள்ளது. போலி செய்தி பரவல் விவகாரத்தில் பா.ஜனதா மற்றும் காங்கிரஸ் கட்சியினர் இடையே ஒரு மீது ஒருவர் குற்றம் சாட்டப்படுகிறது. அரசியல் கட்சிகளும் வாட்ஸ் அப் செயலியை தவறாக பயன்படுத்துகின்றன, இதனை செய்யக்கூடாது என எச்சரித்துள்ளது. ஆனால் குறிப்பிட்ட கட்சிகளின் விபரங்களையும், எந்த விதமான தவறுகளை அவை செய்கின்றன என்பது தொடர்பான தகவலையும் வாட்ஸ்-அப் நிறுவனம் தெரிவிக்க மறுத்துவிட்டது.