பசுமை தீர்ப்பாயத்தின் உத்தரவு ரத்து; ஸ்டெர்லைட் ஆலையைத் திறக்கத் தடை உச்ச நீதிமன்றம் உத்தரவு

Read Time:2 Minute, 42 Second

தேசிய பசுமை தீர்ப்பாயத்தின் உத்தரவை ரத்து செய்த உச்ச நீதிமன்றம் தூத்துக்குடி ஸ்டெர்லைட் ஆலையைத் திறக்கத் தடை விதித்தது.

தூத்துக்குடி ஸ்டெர்லைட் ஆலையை நிரந்தரமாக மூடக்கோரி கடந்த ஆண்டு மே மாதம் 22-ந் தேதி கலெக்டர் அலுவலகம் முன்பு முற்றுகை போராட்டம் நடந்தது. அப்போது கலவரம் ஏற்பட்டதை தொடர்ந்து, போலீசார் நடத்திய துப்பாக்கி சூடு மற்றும் தடியடியில் 13 பேர் பலியானார்கள். இதைத்தொடர்ந்து அரசு, ஸ்டெர்லைட் ஆலையை மூட அரசாரணை வெளியிட்டு, ஆலை மூடப்பட்டது. இதனை எதிர்த்து தேசிய பசுமை தீர்ப்பாயத்தில் ஆலை தரப்பில் வழக்கு தாக்கல் செய்யப்பட்டது.

தேசிய பசுமை தீர்ப்பாயம் ஆலையை திறக்க அனுமதி அளித்தது. இதனை எதிர்த்து அரசு உச்சநீதிமன்றத்தில் மேல்முறையீடு செய்தது. அதே நேரத்தில் ஸ்டெர்லைட் நிர்வாகம், தேசிய பசுமை தீர்ப்பாயம் உத்தரவை அமல்படுத்த இடைக்கால உத்தரவு பிறப்பிக்க வேண்டும் என்று மனு தாக்கல் செய்தது. இந்த மனு மற்றும் அரசின் மேல்முறையீடு மனு ஆகியவை சேர்த்து உச்சநீதிமன்றத்தில் விசாரணை நடந்து வந்தது. வழக்கு விசாரணை முடிந்த நிலையில் தீர்ப்பு கடந்த வாரம் இறுதியில் வெளியாகும் என்று எதிர்பார்க்கப்பட்டது. இதனால் போலீசார் உஷார்படுத்தப்பட்டு இருந்தனர்.

இந்த நிலையில் தீர்ப்பு இன்று அறிவிக்கப்படுவதாக உச்சநீதிமன்றம் அறிவித்தது.

ஸ்டெர்லைட் ஆலையைத் திறக்க தடை

அதன்படி உச்சநீதிமன்றம் இன்று தீர்ப்பளிக்கையில், தேசிய பசுமை தீர்ப்பாயத்தின் உத்தரவை ரத்து செய்தும், ஸ்டெர்லைட் ஆலையைத் திறக்கத் தடை விதித்தும் உத்தரவிட்டது. “ஆலையை மூட உத்தரவிட்ட தமிழக அரசின் அரசாணையை ரத்து செய்ய பசுமைத் தீர்ப்பாயத்துக்கு அதிகாரம் இல்லை” எனவும் உச்சநீதிமன்றம் கூறியுள்ளது.

”இதுதொடர்பாக தமிழக அரசும், வேதாந்தா நிறுவனமும் சென்னை உயர நீதிமன்றத்தை அணுகித் தீர்வு பெற்றுக்கொள்ளலாம்” எனவும் குறிப்பிட்டுள்ளது. ஆலையை மூடுமாறு உயர் நீதிமன்றம் உத்தரவிட்டிருந்தது என்பது குறிப்பிடத்தக்கது.