தமிழக அரசியலில் மீண்டும் முக்கியத்துவம் பெறும் தே.மு.தி.க…!

Read Time:6 Minute, 46 Second

தமிழகத்தை திமுக, அதிமுகவிடமிருந்து காப்பாற்ற யாருமே இல்லையா? என்று மக்கள் ஏங்கிய நிலையில் சினிமா ஹீரோவை போன்று கேப்டன் விஜயகாந்த் அரசியலில் குவித்தவர். சினிமாவில் புகழின் உச்சியை எட்டியபோதே நிர்ணயம் செய்யப்பட்ட இலக்கு, ஜெயலலிதா, கருணாநிதி ஆகிய இருபெரும் சக்திகளுக்கு இடையே எந்தஒரு பயமும் இல்லாமல் அரசியலுக்கு வந்தார்.

விஜயகாந்த்.

கிராமங்கள் தோறும் மன்றங்களை தொடங்கச்செய்து, சொந்தக் காசில் நற்பணிகள் செய்த விஜயகாந்த், 2005-ம் ஆண்டு மதுரையில் 5 லட்சத்துக்கும் அதிகமானோர் குவிந்த பொதுக்கூட்டத்தில் தேமுதிகவை தொடங்கினார். தமிழகத்தின் மூலைமுடுக்கெல்லாம் ஆர்வத்தை ஏற்படுத்திய விஜயகாந்த், 2006 சட்டசபைத் தேர்தலில் 234 தொகுதிகளிலும் தனியாக பம்பரமாக சுற்றி பிரசாரம் செய்தார். ரிஷிவந்தியம் தொகுதியில் விஜயகாந்த் மட்டும் வெற்றிப்பெற்ற நிலையில் நாடு முழுவதும் திமுக, அதிமுகவுக்கு மாற்று தேமுதிகதான் என்று நாட்டையே பேச வைத்தார்.

8.3% வாக்குவங்கியை பெற்று கருணாநிதியையும், ஜெயலலிதாவையும் பெரும் கடுப்படைய செய்தவர். ‘தெய்வத்தோடும், மக்களோடும்தான் கூட்டணி’ என்று முழங்கியதும் அவருக்கான வெற்றிக்கு முதல்படியாக அமைந்தது. 2009 நாடாளுமன்றத் தேர்தலிலும் விஜயகாந்திடம் அதே வேகம்தான், பலன் 8.3% ஆக இருந்த தேமுதிகவின் வாக்குவங்கியை 10%ஆக உயர்த்தினார். மக்களுடனும், தெய்வத்துடனும்தான் கூட்டணி என வெற்றிப்பாதையில் பயணித்த விஜயகாந்த் முதல்முறையாக 2011 தேர்தலில் ஜெயலலிதாவுடன் கூட்டணி வைத்தார். இதில் விஜயகாந்தைவிட பயனைடந்தவர் ஜெயலலிதாதான். தேமுதிகவிற்கு 29 தொகுதிகள் கிடைத்தது. வெளிப்படையாகவே எந்தஒரு செயலையும் செய்த விஜயகாந்திற்கு அரசியல் தந்திரம் தெரியாதது அவருக்கு முதல் சறுக்காக அமைந்தது. எம்.எல்.ஏ.க்கள் ஓட்டம் உள்ளிட்ட அடிமேல் அடி கிடைத்தது.

பண்ருட்டி ராமச்சந்திரன்

கட்சிக்காக பணியாற்றிய ஒவ்வொரு கிளையிலும் இருந்த வேர்கள் வெகுவாக உயிரற்று வெளியேறும் நிலை ஏற்பட்டது. எம்ஜிஆர் காலத்து அரசியல்வாதி பண்ருட்டி ராமச் சந்திரனையே தக்கவைத்துக்கொள்ள முடியாத நிலையில் தோல்வியின் பயணம் தேமுதிகவை தொற்றிக்கொண்டது. கட்சியிலிருந்து வெளியேறுகையில் பண்ருட்டி ராமச் சந்திரன், “ஆரம்பத்தில் என்னைப் போன்றவர்களின் ஆலோசனைகளைக் கேட்ட விஜயகாந்த், நாளடைவில் குடும்பத்தினரின் ஆதிக்கத்துக்குள் போய்விட்டார்,” என்றார்.

விளக்கமாக பேசுகையில், குடும்பத்தினருக்குத் தலைவர் மேல் அக்கறை இருக்கலாம். ஆனால், பாசம் வேறு, செயல்திறன் வேறு. ஒரு தாய் தன்னுடைய குழந்தை கிணற்றில் விழுந்ததும், காப்பாற்றத் துடிப்பதில் தப்பில்லை, ஆனால் நீச்சல் தெரியாதபோது, மற்றவர்கள் உதவியை நாட வேண்டுமே தவிர, தாயும் கிணற்றில் குதிப்பது சரியாகாது. தேமுதிகவில் இப்போது அதுதான் நடக்கிறது” என்றார்.

மக்கள் நலக் கூட்டணி.

அது 2016 தேர்தலில் உண்மையானது. ‘நீச்சலே தெரியாத’ பிரேமலதா, சுதீஷ், நண்பர் வைகோ என்ற ஒரு கும்பலே அவருடைய அரசியலை படுபாதாளத்தில் தள்ளியது. வலுவான கூட்டணிக்கு சென்றுவிடாத வியூகத்தில் சிக்கினார். 2016 சட்டமன்றத் தேர்தலில் தோல்விமட்டுமல்லாது வாக்கு வங்கியும் ஒற்றை இலகத்திற்கு சென்றது. இதனையடுத்தும் தேமுதிகவில் களையை பிடுங்க முடியவில்லை. இதனையடுத்து அவருடைய உடல் நிலையும் அவருக்கு எதிராக செயல்பட தொடங்கிவிட்டது.

விஜயகாந்த் மற்றவர்களை சார்ந்து இருக்கும் நிலைக்கு சென்றார். அவரின் மீது பாசம் கொண்ட தொண்டர்கள் இன்னும் கட்சியில் செயலாற்றிதான் வருகிறார்கள். விஜயகாந்த் துடிப்பான அரசியலில் ஈடுபட முடியாத நிலையில் பாதாளம் நோக்கிய தேமுதிகவிற்கு தற்காலிகமாக உயிர்கொடுக்கும் வகையில் 2019 தேர்தல் அமைந்துள்ளது. ஆனால் அதனை நீடிக்க செய்வது யாரென்ற கேள்விக்கு பதில் கிடையாது. தமிழகத்தில், நாடாளுமன்ற தேர்தலை எதிர்கொள்ள ஆளும் கட்சியான அ.தி.மு.க.வும், எதிர்க்கட்சியான தி.மு.க.வும் தயாராகி வருகின்றன.

பிரேமலதா

இருகட்சிகளும் தேமுதிகவை தன்வசம் இழுக்க வேண்டும் என்ற நிலையில் உள்ளது. தேமுதிகவிற்கு உள்ள வாக்குவங்கியை குறிவைக்கும் அரசியல் கட்சிகள் அதற்கான வியூகத்தை வகுக்கத்தொடங்கிவிட்டது. தேமுதிக அதிகமான எதிர்பார்ப்பை கொண்டிருக்கலாம், ஆனால் வெற்றியென்ற அஸ்திரம் இப்போது அவசியமானது. மறுபுறம், தேமுதிகவின் வசம் உள்ள லட்சக்கணக்கான தொண்டர்கள் மீது திமுக, அதிமுகவின் கழுகு பார்வையில் இருந்தும் தப்பிக்க வேண்டும். இன்னமும் எப்படிக் கொத்திக் குதறலாம் என விழித்திருக்கும் கட்சிகளிடம் இருந்து தப்பித்தால் மட்டுமே தேமுதிக அரசியலில் நீடிக்க முடியும். இல்லையெனில் தேமுதிக வெகுசீக்கிரம் வரலாறு ஆகிவிடும். எது எப்படியோ கேப்டன் எப்போதும் மக்கள் மத்தியில் அன்பால் நீடித்துதான் இருப்பார் என்பதில் ஐயம் கிடையாது…