டாஸ்மாக் கடைகளை நிரந்தரமாக மூடுவது எப்போது? உயர்நீதிமன்றம் கேள்வி

Read Time:3 Minute, 45 Second

டாஸ்மாக் கடைகளை நிரந்தரமாக மூடுவது எப்போது? என தமிழக அரசுக்கு உயர்நீதிமன்றம் கேள்வி எழுப்பியுள்ளது.

மதுரை உயர்நீதிமன்றக் கிளையில் தஞ்சாவூரை சேர்ந்த மகேந்திரன், டாஸ்மாக் கடை தொடங்க தடை விதித்து உத்தரவிட வேண்டும் என மனுத்தாக்கல் செய்தார்.

தஞ்சையில் பள்ளியக்கரஹாரம் பேருந்து நிலையம் அருகே டாஸ்மாக் கடையை அமைப்பதற்கு நடவடிக்கை எடுக்கப்பட்டு வருகிறது. விதிகளின்படி டாஸ்மாக் கடை அமைக்கும் இடத்தில் இருந்து 100 மீட்டர் தூரத்தில் கோவில், கல்வி நிறுவனங்கள், மருத்துவமனைகள் இருக்கக்கூடாது. ஆனால் பள்ளியக்கரஹாரத்தில் டாஸ்மாக் கடை அமைய உள்ள இடத்தின் அருகே இவை அனைத்துமே உள்ளது. அங்கு டாஸ்மாக் கடையை தொடங்கினால் பொதுமக்கள், மாணவர்கள் என எல்லோருக்கும் இடையூறாக அமையும். எனவே, டாஸ்மாக் கடை தொடங்க தடை விதித்து உத்தரவிட வேண்டும் என கேட்டுக்கொண்டார் மகேந்திரன்.

இம்மனுவை உயர்நீதிமன்ற நீதிபதிகள் என்.கிருபாகரன், எஸ்.எஸ்.சுந்தர் ஆகியோர் விசாரித்தனர். விசாரணையின் முடிவில் உயர்நீதிமன்றம், பள்ளியக்ரஹாரம் பஸ் நிலையம் அருகில் டாஸ்மாக் கடை அமைக்க தடை விதித்து உத்தரவிட்டது.

இவ்வழக்கு விசாரணையில் தமிழக உள்துறை செயலாளர், டாஸ்மாக் தலைவர் மற்றும் நிர்வாக இயக்குனர் ஆகியோரை எதிர்மனுதாரர்களாக சேர்க்கவும் உத்தரவிட்டது.

இவ்வழக்கு விசாரணையின் போது தமிழக அரசை கடிந்துக்கொண்ட உயர்நீதிமன்றம் தமிழகத்தில் டாஸ்மாக் கடைகள் அனைத்தும் நிரந்தரமாக மூடப்படுவது எப்போது? என்பது உள்பட அடுக்கடுக்கான கேள்விகளை முன்வைத்தது.


தமிழகத்தில் கடந்த 2016–ம் ஆண்டு எத்தனை டாஸ்மாக் கடைகள் இருந்தன?


2016–ம் ஆண்டுக்கு பின்னர் தமிழகத்தில் இதுவரை எத்தனை டாஸ்மாக் கடைகள் மூடப்பட்டுள்ளன? எத்தனை கட்டங்களாக அவை மூடப்பட்டன?


2016–ம் ஆண்டுக்கு பின்பு எத்தனை டாஸ்மாக் கடைகள் புதிதாக திறக்கப்பட்டுள்ளன? இனி எத்தனை கடைகள் திறக்கப்பட உள்ளன?


தமிழகத்தில் டாஸ்மாக் கடைகள் அனைத்தும் நிரந்தரமாக மூடப்படுவது எப்போது?


2016–ம் ஆண்டில் இருந்து தற்போது வரை டாஸ்மாக் கடைகளால் கிடைத்த வருமானம் எவ்வளவு?


என கேள்விகளை எழுப்பிய உயர்நீதிமன்றம், தமிழக அரசு அறிக்கை அளிக்க வேண்டும் என்று உத்தரவிட்டது. இது தொடர்பாக டாஸ்மாக் தலைவர் வருகிற 4–ந் தேதி நேரில் ஆஜராகி விளக்கம் வேண்டும் என உத்தரவிடப்பட்டுள்ளது.

இம்மாத தொடக்கத்திலும் இதுபோன்ற வழக்கு ஒன்று மதுரை உயர்நீதிமன்றக் கிளையில் விசாரணைக்கு வந்தது. அப்போது, 2016 தேர்தல் அறிக்கைகளில் படிப்படியாக டாஸ்மாக் கடைகள் மூடப்படுமென அறிவிக்கப்பட்ட நிலையில் இதுவரை மூடப்பட்ட டாஸ்மாக் கடைகள் எத்தனை? அடுத்தகட்டமாக எத்தனை டாஸ்மாக் கடைகள், எப்போது மூடப்படவுள்ளன? என்பது குறித்து பதிலளிக்க தமிழக அரசுக்கு உத்தரவிட்டு வழக்கை மார்ச் 4 ஆம் தேதிக்கு ஒத்திவைத்தனர் என்பது குறிப்பிடத்தக்கது.