TikTok fined in US for illegally gathering children's data 

 ‘டிக் டாக்’கிற்கு ரூ.40 கோடி அபராதம்…

Read Time:2 Minute, 58 Second

சிறுவர்களின் தகவல்களை திரட்டியதாக டிக் டாக் செயலிக்கு ரூ.40 கோடி அமெரிக்காவில் அபராதம் விதிக்கப்பட்டது.

பேஸ்புக், ட்விட்டர், வாட்ஸ் அப் போன்ற சமூக வலைதளங்கள் வரிசையில் மக்களிடம் அதிகமான பயன்பாட்டில் இருக்கும் செயலி டிக் டாக். மற்ற சமூக வலைதளங்கள் போல் இல்லாமல் இந்த செயலி பயனாளர்கள் தங்களுடைய நடிப்பு திறனை வெளிப்படுத்த பயன்படுகிறது. இளைஞர்கள் மட்டுமின்றி வயது வித்தியாசம் இல்லாமல் சீன நிறுவனத்தின் இச்செயலிக்கு கோடிக்கணக்கில் வாடிக்கையாளர்கள் உள்ளனர். பிடித்த பாடலையோ, இசையையோ, வசனத்தையோ பின்னால் ஓடவிட்டு அதற்கு ஏற்றாற்போல் நடனமாடுவது, வசனம் பேசுவது, நடித்து காட்டுவது போன்றவற்றை இதில் செய்யலாம்.  

இச்செயலில் 13 வயதுக்கு மேல் உள்ளவர்கள் பயனாளர்களாக சேர்ந்து வீடியோவை பதிவு செய்துக்கொள்ளலாம். இப்போது இது பொழுதுபோக்காக மட்டும் இல்லை, அடிமையாகும் நிலைக்கு வந்துள்ளது. ஆபாசம், வெறுப்பு போன்றவற்றை பரப்பும் தளமாக உள்ளது எனவும் குற்றம் சாட்டப்படுகிறது. டிக்டாக் செயலியைத் தடை செய்ய வேண்டும் என பல்வேறு நாடுகள் கோரிக்கை விடுத்துள்ளன. 

“சமூக வலைத்தளங்களில் இளைஞர்கள், பெண்கள், இளம் பருவத்தினரை அதிகம் பாதிக்கும் ‘டிக் டாக்’ செயலியைத் தடை செய்ய நடவடிக்கை எடுக்கப்படும்,”

என தமிழக தகவல் தொடர்புத் துறை அமைச்சர் மணிகண்டன் சட்டமன்றத்தில் உறுதியளித்திருக்கிறார். அமெரிக்காவில் பெற்றோர்களின் அனுமதியின்றி குழந்தைகளின் ரகசியத் தகவல்களை பெற்றதாக டிக் டாக் செயலி மீது குற்றம் சாட்டப்பட்டது. 13 வயதுகுட்பட்ட சிறுவர்களிடம் அவர்களின் தனிப்பட்ட விவரத்தை சேகரிக்கும் போது அவரவர்களின் பெற்றோர்களின் அனுமதியையும் வாங்க வேண்டும். 

இருப்பினும் இந்த விதியை பின்பற்றாத டிக் டாக் விதியை மீறி குழந்தைகளின் தகவல்களை திரட்டியதாகவும் கூறப்படுகிறது. இதனையடுத்து அமெரிக்காவின் தலைமை வர்த்தக ஆணையம், டிக் டாக் செயலிக்கு இந்திய மதிப்பில் சுமார் 40 கோடி ரூபாயை அபராதமாக விதித்துள்ளது. இதற்கும் ஆப்ஷன் ஒன்றை கூறியுள்ள டிக் டாக், 13 வயதுக்குட்பட்டவர்களுக்காக பெற்றோர்களால் கட்டுப்படுத்தும் வசதியோடு புதிய செயலி உருவாக்கப்படும் என்று தெரிவித்துள்ளது.