மக்கள் பாதுகாப்புப் படையை நம்புகிறார்கள், உங்களையல்ல..! மோடியை சாடிய சித்தார்த்

Read Time:3 Minute, 45 Second

மக்கள் பாதுகாப்புப் படையை நம்புகிறார்கள், உங்களையல்ல..! என பிரதமர் மோடியை சித்தார்த் விமர்சனம் செய்துள்ளார்.

புல்வாமா தாக்குதல், இந்திய விமானப்படையின் அதிரடி தொடர்பாக அரசியல் ஆக்க கூடாது என பா.ஜனதாவும், எதிர்க்கட்சிகளும் கூறிவருகிறது. ஆனால் இதுதொடர்பாக அரசியல் செய்யப்பட்டு வருகிறது. பிரதமர் மோடி ஒவ்வொரு கூட்டத்திலும் இதுதொடர்பாக பேசுகிறார். சில எதிர்க்கட்சிகள் தலைவர்கள் பயங்கரவாதிகள் பலியானதற்கு ஆதாரம் எங்கே? என கேள்வி எழுப்புகிறார்கள். விமானப்படை தரப்பில் பயங்கரவாதிகள் சாவு தொடர்பாக அதிகாரப்பூர்வமாக தகவல் தெரிவிக்கவில்லை. ஆனால் பா.ஜனதா தலைவர் அமித்ஷா, இத்தாக்குதலில் 200-க்கும் அதிகமான பயங்கரவாதிகள் கொல்லப்பட்டுள்ளனர் என கூறியுள்ளார்.

பா.ஜனதா தலைவர்கள் இதனை அரசியல் ஆக்குவதை எதிர்க்கட்சிகள் விமர்சனம் செய்கின்றன.

பாட்னா கூட்டத்தில் பேசிய பிரதமர் மோடி, எல்லை தாண்டியும், இந்தியாவுக்குள்ளும் நமது பாதுகாப்பு படையினர், எதிரிகளை எதிர்த்து சண்டையிட்டுக்கொண்டிருக்கிற நேரத்தில், பாகிஸ்தானை மகிழ்விப்பதற்காக எதிர்க்கட்சிகள் கருத்துகளை வெளியிடுகின்றனர் என்றார். பிரதமர் பேச்சு தொடர்பான டுவிட்டை பிரதமர் அலுவலகம் வெளியிட்டது. அதில் “இயற்கையாகவே நம்முடைய ராணுவ படைகள் மீது நம்பிக்கை வைக்கவேண்டும், பெருமை கொள்ள வேண்டும். ஆனால் சிலர் இந்தியப் படைகளை கேள்வி கேட்க விரும்புகிறார்கள், அது ஏன் என்று தெரியவில்லை,” என குறிப்பிடப்பட்டது.

அரசியல் தொடர்பாக வெளிப்படையான கருத்தை தெரிவிக்கும் நடிகர் சித்தார்த், இதனை ரீடுவிட் செய்து விமர்சனத்தை முன்வைத்துள்ளார். “பாதுகாப்புப் படையைதான் மக்கள் நம்புகிறார்கள், உங்களை இல்லை,” என பிரதமர் மோடியை கடுமையாக விமர்சனம் செய்துள்ளார் சித்தார்த். அவர் வெளியிட்டுள்ள டுவிட் செய்தியில், “இந்திய மக்கள் பாதுகாப்புப் படையினர் மீது நம்பிக்கை கொண்டு, அவர்களுக்கு பக்கபலமாக நிற்கிறார்கள்.


உங்களையும், உங்களுடைய கூட்டத்தையும்தான் அவர்கள் நம்பவில்லை. புல்வாமா தாக்குதலை அரசியலாக்குவதை நிறுத்துங்கள். உண்மையான ஹீரோக்களுக்கு முன் நின்றுகொண்டு, ஹீரோ போல நடிப்பதை நிறுத்துங்கள். பாதுகாப்புப் படையினருக்கு நீங்கள் மரியாதை கொடுங்கள். நீங்கள் ராணுவ வீரர் கிடையாது. அவ்வாறு உங்களை நடத்த வேண்டும் என்று எதிர்பார்ப்பதை நிறுத்துங்கள். ஜெய் ஹிந்த்’’ என குறிப்பிட்டுள்ளார். அவருடைய் டுவிட்டை சிலர் பாராட்டியும், விமர்சனம் செய்தும் ரீடுவிட் செய்து வருகிறார்கள்.