டெல்லியில் ஆம் ஆத்மியுடன் கூட்டணி இல்லை… காங்கிரஸ் அறிவிப்பு!

Read Time:2 Minute, 14 Second

புதுடெல்லி,

டெல்லியில் ஆம் ஆத்மியுடன் கூட்டணி இல்லையென காங்கிரஸ் அறிவித்துள்ளது.

புதுடெல்லியில் ஆட்சிசெய்யும் அரவிந்த் கெஜ்ரிவால் பா.ஜனதாவிற்கு எதிரான கொள்கையை கொண்டுள்ளார். இதே கொள்கையில் உள்ள காங்கிரசுடன் நெருக்கம் காட்டினார். பா.ஜனதாவிற்கு எதிரான கொள்கையில் இரு கட்சியும் ஒரு வரிசையில் வருகிறது. எனவே, இரு கட்சிகளும் டெல்லியில் கூட்டணி வைக்கலாம் என எதிர்பார்க்கப்பட்டது. இதற்கான பேச்சுவார்த்தையும் நடத்தப்பட்டது. டெல்லியில் இரு தொகுதியை தருவதாகவும், பஞ்சாப்பில் கூட்டணியென ஆம் ஆத்மி பேச்சுவார்த்தை நடத்தியதாக கூறப்பட்டது.

டெல்லி காங்கிரசில் சாதகமான நகர்வு இல்லாத நிலையில் ஆம் ஆத்மி 6 தொகுதிகளுக்கு வேட்பாளர்களை அறிவித்தது. இருப்பினும் ஒரு தொகுதியை கையில் வைத்து இருந்தது. ஆம் ஆத்மியுடன் கூட்டணி வைக்க 2013-ல் கெஜ்ரிவாலால் ஆட்சியைவிட்டு அகற்றப்பட்ட ஷீலா தீட்சித்திற்கு நாட்டம் கிடையாது. இந்நிலையில் காங்கிரஸ் தலைவர் ராகுல் காந்தியை டெல்லி காங்கிரஸ் தலைவர்கள் சந்தித்து பேசினர். 2 மணி நேரங்களுக்கு மேலாக நடைபெற்ற பேச்சுவார்த்தையில் மாநில தலைவர்கள் கருத்தை ராகுல் ஏற்றுக்கொண்டார்.

இதனையடுத்து காங்கிரஸ் டெல்லியில் தனித்து போட்டியிடுவது உறுதியானது.

டெல்லி காங்கிரஸ் தலைவர் ஷீலா தீட்சித் பேசுகையில் “ஆம் ஆத்மியுடன் கூட்டணியில்லை, இது இறுதியானது. முடிவை ராகுல் காந்தி ஏற்றுக்கொண்டார். காங்கிரஸ் 7 தொகுதிகளிலும் தனித்து போட்டியிடும்” என கூறியுள்ளதாக என்டிடிவி செய்தி வெளியிட்டுள்ளது.