TMPBullet: 2 நாளில் தி.மு.க. வேட்பாளர் பட்டியல்; தனித்து போட்டியிட தயார் -பிரேமலதா பேட்டி…!

Read Time:3 Minute, 37 Second

2019 நாடாளுமன்ற தேர்தலில் வலுவான கூட்டணியை அமைத்துள்ள தி.மு.க. 20 தொகுதிகளில் போட்டியிடுகிறது. 20 தொகுதிகளில் போட்டியிடும் தி.மு.க. வேட்பாளர்களை 2, 3 நாட்களில் நாங்கள் அறிவிப்போம் என மு.க. ஸ்டாலின் தெரிவித்துள்ளார். 21 சட்டமன்ற தொகுதிகளுக்கான இடைத்தேர்தலும் வரும் என்ற நம்பிக்கை தெரிவித்த மு.க. ஸ்டாலின், அப்படி வந்தால்தான் ஜனநாயக முறைப்படி நியாயமாக இருக்கும். ஆனால், அதை தடுத்து நிறுத்துவதற்கான முயற்சியில் மாநில அரசும், மோடி அரசும் ஈடுபட்டுள்ளதாக செய்தி வந்திருக்கிறது. அப்படி நடந்தால் ஜனநாயக படுகொலை என குற்றம் சாட்டியுள்ளார்.


தனித்து போட்டியிட தயார் – பிரேமலதா

அ.தி.மு.க.-பா.ஜ.க. கூட்டணியில் தே.மு.தி.க. இணைவதில் தொடர்ந்து இழுபறி நிலை நீடித்து வருகிறது. கடைசி நேரத்தில் அங்கும், இங்குமாக சென்றதால் கடும் விமர்சனம் எழுந்தது. நேற்று செய்தியாளர்களிடம் பேசிய பிரேமலதா விஜயகாந்த், 2014 தேர்தலில் 37 தொகுதிகளில் அ.தி.மு.க. வெற்றி பெற்றும் தமிழகத்திற்கு எந்த பலனும் கிடைக்கவில்லை. நாடாளுமன்ற தேர்தலில் தே.மு.தி.க. தனித்து போட்டியிட தயார் என்று குறிப்பிட்டார். துரைமுருகன் விமர்சனம் தொடர்பாக பேசுகையில், தி.மு.க. என்றாலே தில்லுமுல்லு கட்சி. எங்களை வைத்து அரசியல் செய்கிறார்கள் என கூறியுள்ளார்.


ஒருமையில் பேசிய பிரேமலதா

செய்தியாளர்கள் சந்திப்பின் போது ‘நீ, வா, போ’ என்று பிரேமலதா ஒருமையில் பேசியதால், பரபரப்பு ஏற்பட்டது. செய்தியாளர்களின் கேள்விக்கு பதில் அளிக்கமுடியாமல் சிக்கிய பிரேமலதா அதனை சமாளிக்கும் வகையில் கோபத்தை காட்டினார். மேலும் ஒருமையில் பேசினார். அவருடைய பேச்சுக்கு பலரும் கண்டனம் தெரிவித்துள்ளனர்.


மோடிதான் எங்கள் டாடி – அமைச்சர் கே.டி.ராஜேந்திர பாலாஜி

விருதுநகர் மாவட்டம் ஸ்ரீவில்லிபுத்தூரில் செய்தியாளர்களிடம் பேசிய அமைச்சர் கே.டி.ராஜேந்திர பாலாஜி, பிரதமர் மோடியின் தலைமையிலான ஆட்சியை பாராட்டினார். அப்போது ஜெயலலிதா என்ற ஆளுமை இப்போது இல்லாத நிலை இருப்பதால், மோடிதான் இப்போது எங்கள் டாடி. அவர் இந்தியாவின் டாடி. தேர்தலில் அனைத்து தொகுதிகளையும் அ.தி.மு.க. கூட்டணியே வெற்றி பெறும் என கூறியுள்ளார்.


நடிகனாக இருக்க மாட்டேன் – கமல்ஹாசன்

சென்னை வேப்பேரியில் உள்ள ஜெயின் மகளிர் கல்லூரியில் மகளிர் தின விழாவில் பேசிய கமல்ஹாசன், மக்களுக்கு சேவையாற்ற வேண்டும் என்ற எண்ணத்தோடு அரசியலுக்கு வந்துள்ளேன். அரசியலில் இன்னொரு நடிகனாக இருக்க மாட்டேன். அதேபோல் இன்னொரு அரசியல் வாதியாகவும் இருக்க மாட்டேன் என குறிப்பிட்டார்.