பொள்ளாச்சி பயங்கரம் பாதிக்கப்பட்ட பெண்களின் அடையாளம் பாதுகாக்கப்பட வேண்டும்…

Read Time:3 Minute, 21 Second

பொள்ளாச்சி பயங்கரத்தில் பாதிக்கப்பட்ட பெண்களின் அடையாளம் பாதுகாக்கப்பட வேண்டும் என மக்கள் நீதி மய்யம் தரப்பில் வலியுறுத்தப்பட்டுள்ளது.

பொள்ளாச்சி பாலியல் சம்பவத்தில் ஈடுபட்டவர்கள் மீது கடும் நடவடிக்கை எடுக்கக் கோரி நடிகரும் மக்கள் நீதி மய்யம் கட்சி தலைவருமான கமல்ஹாசன் போலீஸ் டிஜிபி அலுவலகத்தில் புகார் மனுவை அளித்தார். பின்னர் செய்தியாளர்களிடம் பேசுகையில், விரைவாக நடவடிக்கையை மேற்கொள்ள வேண்டும் என்றார். மேலும் பாதிக்கப்பட்ட பெண்ணின் அடையாளத்தை போலீஸ் எஸ்.பி. வெளிப்படுத்தியது தவறானது. அவர்களுக்கு பாதுகாப்பு உறுதி செய்யப்பட வேண்டும் என்றார்.

மக்கள் நீதி மய்யம் கட்சியின் தரப்பில் பொள்ளாச்சி பயங்கரம் விவகாரத்தில் குற்றவாளிகள் மீது நடவடிக்கை எடுக்க வலியுறுத்தி பேரணி நடத்தப்பட்டது. பொள்ளாச்சி பாலியல் வன்கொடுமைக்கு கண்டனம் தெரிவிக்கும் வகையில் மக்கள் நீதி மய்யம் கட்சி சார்பாக ஶ்ரீப்ரியா, சினேகன் உள்பட 300 பேர் பேரணியாக சென்று பொள்ளாச்சி துணை ஆட்சியரிடம் விரைவாக விசாரணை நடத்த வேண்டும் என்று மனு கொடுத்தனர்.

குற்றவாளிகள் மீது கடும் நடவடிக்கையை எடுக்க வேண்டும். பாதிக்கப்பட்ட பெண்களின் தனிப்பட்ட தகவல்களை பாதுகாக்க வேண்டும் என்று வலியுறுத்தப்பட்டது.

பேரணியில் கலந்துக்கொண்ட அக்கட்சியின் தலைவர் ஸ்ரீபிரியா பேசுகையில், பொள்ளாச்சி சம்பவம் பெண்கள் மட்டுமல்ல ஆண்கள் மத்தியிலும் பெரும் தாக்கத்தை ஏற்படுத்தியுள்ளது. ஏனென்றால், எலோருக்கும் தாய், அக்கா – தங்கை உள்ளனர். இதுபோன்று செய்பவர்கள் மனிததன்மைக்கு அப்பாற்பட்டவர்கள். இது நம்முடைய மகள்களுக்கு நடந்த ஒரு அநீதியாகும். இதில் கட்சி அரசியலுக்கு அப்பாற்பட்டு பாதிக்கப்பட்டவர்களுக்கு நியாயம் கிடைக்க வேண்டும் என்பதுதான் முக்கியமானது.

பாதிக்கப்பட்டவர்களின் அடையாளத்தை காக்க வேண்டும். எனென்றால் நாளை அவர்களுக்கு என்று ஒரு எதிர்காலம் இருக்க வேண்டும். தயவு செய்து அவர்களை பற்றிய வீடியோக்கள், புகைப்படங்கள், தனிப்பட்ட தகவல்களை ஊடகங்கள், பொதுமக்கள் பகிர்ந்துக்கொள்ள வேண்டாம். இதுபோன்று தொடர்ந்து நடக்கக்கூடாது. சட்டம் ஒரு இருட்டு அறையாக இருக்க கூடாது. குற்றவாளி எந்த பதவியில் இருந்தாலும், யாராக இருந்தாலும் அவர்களை மக்களுக்கு அடையாளம் காட்டி தக்க தண்டனையை கொடுக்க வேண்டும் என வலியுறுத்தினார். இவ்வழக்கில் தொய்வு இல்லாமல் விசாரணை மேற்கொள்ளப்பட வேண்டும் எனவும் வலியுறுத்தப்பட்டது.