மனோகர் பாரிக்கர் காலமானார், இறுதி மூச்சு வரையில் மக்களுக்காகவே பணியாற்றியவர்

Read Time:4 Minute, 6 Second

கோவா முதல்வரும், பாஜக மூத்த தலைவருமான மனோகர் பாரிக்கர் காலமானார். வயது (63).

மனோகர் பாரிக்கர் கணைய புற்றுநோய் காரணமாக வெளிநாட்டிலும், டெல்லி எய்ம்ஸ் மருத்துவமனையிலும், கோவா மருத்துவமனையிலும் சிகிச்சை பெற்றுவந்தார். மேலும் தன் இல்லத்தில் தனிப்பட்ட முறையிலும் சிகிச்சைப் பெற்று வந்தார். இந்நிலையில் அவருடைய உடல் நிலை மிகவும் மோசமானதாகவும், அவருடைய உயிரை காப்பாற்ற மருத்துவர்கள் போராடி வருகிறார்கள் என மதியம் தகவல் தெரிவிக்கப்பட்டது. இந்நிலையில் மருத்துவர்களின் தீவிர சிகிச்சை பலனளிக்காமல் கோவா மாநில முதல்வர் மனோகர் பாரிக்கர் காலமானார் என குடியரசு தலைவர் அறிவித்துள்ளார். அவருடைய இறப்பு இந்திய மக்களுக்கு பெரும் இழப்பாகும்.

மிகவும் தன்னம்பிக்கை மிக்க மனிதரான மனோகர் பாரிக்கர் இந்நிலையில் காலமாகியுள்ளார். எதிர்க்கட்சி தலைவர்களும் அவருடைய இனிமையான பண்புகளை தெரிவித்து, இரங்கலை தெரிவித்து வருகிறார்கள். மனோகர் பாரிக்கர் கோவா மாநில முதல்வராகவும், மத்திய பாதுகாப்புத்துறை அமைச்சராகவும் பதவி வகித்தவர். இந்தியாவிலே ஐஐடியில் படித்த முதல் முதல்வர் என்ற பெருமையை தனதாக்கியவர்.

குடியரசுத் தலைவர் ராம்நாத் கோவிந்த் டுவிட்டரில் வெளியிட்டுள்ள செய்தியில், மனோகர் பாரிக்கர் கோவா மாநில முதல்வராகவும், மத்திய பாதுகாப்புத்துறை அமைச்சராகவும் பதவி வகித்தவர். கோவா மாநில முதல்வர் மனோகர் பாரிக்கர் உயிரிழப்பு செய்தி மிகவும் வருத்தம் அடைய செய்கிறது. பொது வாழ்வில் ஒருமைப்பாடு மற்றும் அர்ப்பணிப்பு கொண்டவர், கோவா மற்றும் இந்தியாவின் மக்களுக்கு அவருடைய சேவை மறக்கமுடியாதது என தெரிவித்துள்ளார். ராகுல் காந்தி, மம்தா பானர்ஜி உள்ளிட்ட தலைவர்கள் மனோகர் பாரிக்கர் மறைவுக்கு இரங்கல்களை தெரிவித்து வருகின்றனர்.

மத்திய மந்திரி நிதின் கட்காரி பேசுகையில், “மனோகர் பாரிக்கர் உயிரிழப்பால் பா.ஜனதா மிகப்பெரிய இழப்பை எதிர்க்கொண்டுள்ளது. கட்சி உறுப்பினர் என்பது போக எனக்கு மிகவும் நெருங்கிய நண்பர். என்னுடன் அவர் இப்போது இல்லை. நான் மிகவும் வேதனையடைந்துள்ளேன். கோவா செல்கிறேன்,” என கூறியுள்ளார்.

இறுதி மூச்சுவரையில்…

சில மாதங்களுக்கு முன்பு அமெரிக்கா சென்று சிகிச்சை பெற்றுவிட்டு நாடு திரும்பியதும் உடல் நிலை சரியில்லாமலும் முதல்வராக பணியாற்றினார். அவரை பா.ஜனதா வலுக்கட்டாயப் படுத்தி பணியில் வைத்துள்ளது என விமர்சனங்கள் எழுந்தது. அப்போது செய்தியாளர்களிடம் பேசுகையில்

“என்னுடைய கடைசி மூச்சுவரையில் கோவா மக்களுக்காக பணியாற்றுவேன்,” என்று கூறினார்.

அதன்படியே இறுதி மூச்சுவரையில் கோவா மாநில மக்களுக்காகவே பணியாற்றியுள்ளார். அவருடைய இழப்பு தேசத்திற்கு பெரும் இழப்புதான். கோவா மாநிலத்தில் 4 முறை முதல்வராக இருந்துள்ளார். 2014 தேர்தலில் பா.ஜனதா மகா வெற்றியை தனதாக்கியதும் மத்திய அரசுக்கு சென்று பாதுகாப்பு அமைச்சரானார். பின்னர் 2017-ம் ஆண்டு கோவா மாநில அரசியலுக்கு திரும்பினார்.