பா.ஜனதாவுக்கு முக்கியத்துவம்… அதிமுகவில் முக்கிய விக்கெட் காலி…!

Read Time:4 Minute, 37 Second

அதிமுகவில் இருந்து விலகிய ராஜ கண்ணப்பன், ஓ.பன்னீர் செல்வம் துரோகம் செய்துவிட்டார் என குற்றம் சாட்டியுள்ளார்.

கடந்த 2009 நாடாளுமன்றத் தேர்தலில் சிவகங்கை தொகுதியில் போட்டியிட்ட ராஜ கண்ணப்பன், 3,354 வாக்குகள் வித்தியாசத்தில் காங்கிரஸ் மூத்த தலைவர் ப.சிதம்பரத்திடம் தோற்றார். 2011-ல் திருப்பத்தூர் சட்டப்பேரவைத் தொகுதியில் போட்டியிட்டு முன்னாள் அமைச்சர் பெரிய கருப்பனிடம் தோற்றார். அதிமுகவில் ஓ. பன்னீர்செல்வத்தின் ஆதரவாளராக உள்ள ராஜ கண்ணப்பன், சிவகங்கை அல்லது ராமநாதபுரம் தொகுதியில் போட்டியிட முயற்சித்து வந்தார். ஆனால், அந்த 2 தொகுதிகளையும் பா.ஜனதாவுக்கு அதிமுக ஒதுக்கியது.

இதனால்தான் சார்ந்த யாதவ சமூகத்தினர் கணிசமாக உள்ள மதுரை தொகுதியை பெற ராஜகண்ணப்பன் முயற்சித்து வருகிறார். மு.க.அழகிரி திமுக கூட்டணிக்கு எதிராக வேலைபார்ப்பார் என்பதால், அங்கு அதிமுக சார்பில் எளிதில் வெற்றிபெற்றுவிடலாம் என அவர் கருதுகிறார் என தகவல் வெளியாகியுள்ளது. அவருடைய அதிகாரம் மதுரை வருவதை விரும்பாத அப்பகுதியை சேர்ந்த அமைச்சர்கள் எதிர்த்ததாக கூறப்பட்டது. வேட்பாளர் அறிவிப்பு ராஜ கண்ணப்பனுக்கு பெரும் ஏமாற்றமாக அமைந்தது.

ஓ பன்னீர்செல்வம் தேனி தொகுதியில் தனது மகன் ரவீந்திரநாத்தை களமிறக்கியுள்ளார். மதுரை தொகுதி .வி.ஆர்.ராஜ்சத்யனுக்கு ஒதுக்கப்பட்டுள்ளது. கட்சிக்குள்ளே வேட்பாளர்கள் நிறுத்தம் தொடர்பாக அதிருப்தி நிலவுவதாக தகவல்கள் வெளியாகியுள்ளது. இந்நிலையில் அதிமுகவில் போட்டியிட வாய்ப்பு கிடைக்காததால் திமுகவுக்கு ராஜகண்ணப்பன் ஆதரவு தெரிவித்துள்ளார். மு.க.ஸ்டாலினை சந்தித்து ராஜகண்ணப்பன் ஆதரவை தெரிவித்தார்.

பின்னர் பேசுகையில் ஓ. பன்னீர்செல்வம் துரோகம் செய்துவிட்டார் என குற்றம் சாட்டினார். “ அதிமுகவில் உட்கட்சிப்பூசல் நிறைய உள்ளது. ஒரு குடும்பத்திற்காக தர்மயுத்தம் நடத்திய ஓ.பன்னீர்செல்வம், மகனுக்காக சீட் வாங்க போராடியது ஏன்? என கேள்வி எழுப்பிய ராஜ கண்ணப்பன், ஓ.பன்னீர்செல்வம் தூரோகம் செய்துவிட்டார். அதிமுகவை பா.ஜனதாவிடம் அடகு வைத்துவிட்டனர். அதிமுகவில் தற்போது இருப்பவர்கள் தொண்டர்கள் இல்லை.

திராவிடக் கட்சிகளின் ஆதிக்கம் நிறைந்த தமிழகத்தில் நோட்டாவை வெற்றிக்கொள்ள முடியாத பா.ஜனதாவிற்கு இவ்வளவு முக்கியத்துவம் கொடுப்பது ஏன்? தென்மாவட்டங்களில் 4 தொகுதிகளை பா.ஜனதாவிற்கு கொடுக்க வேண்டிய அவசியம் ஏன்? என காட்டமான கேள்விகளை எழுப்பிய அவர், இப்போதைய தலைவர்கள் கைகளை கட்டிக்கொண்டு நிற்கிறார்கள். திமுக கூட்டணியை ஆதரித்து மதுரையில் பிரசாரம் செய்வேன். ப.சிதம்பரத்திற்கு ஆதரவாகவும் பிரசாரம் செய்வேன் என கூறியுள்ளார்.

மதுரை தொகுதியில் திமுக கூட்டணி கட்சியின் மார்க்சிஸ்ட் வேட்பாளராக அறிவிக்கப்பட்டுள்ள சு. வெங்கடேசன், அதிமுகவைச் சமாளித்து வெற்றிக் கனியை பறிப்பாரா? என்ற எதிர்பார்ப்பு உள்ளது. ஆதரவு குறித்து மு.க. அழகிரி பேசுகையில் சு.வெங்கடேசன் என்னிடம் வந்து பேசலாம் என குறிப்பிட்டார். அதிமுகவின் வாக்குகளை அதிமுகவில் இருந்து பிரிந்து சென்ற டிடிவி.தினகரனும் பிரிக்க வாய்ப்பு உள்ளது. இப்போது திமுக கூட்டணிக்கு ஆதரவாக பிரசாரம் செய்வேன் என ராஜ கண்ணப்பன் பிரசாரம் செய்வேன் என அறிவித்துள்ளது அதிமுகவிற்கு நெருக்கடியை அதிகரிக்கதான் செய்யும்…