கேரளாவை அச்சுறுத்தும் ‘வெஸ்ட் நைல் வைரஸ்’… 7 வயது சிறுவன் உயிரிழப்பு

Read Time:3 Minute, 6 Second

கேரளாவில் வெஸ்ட் நைல் வைரஸ்(West Nile Virus) தாக்கல் காரணமாக 7 வயது சிறுவன் சிகிச்சை பலனின்றி உயிரிழந்தான்.

கேரளா மாநிலம் மலப்புரத்தை சேர்ந்த 6 வயது சிறுவன் முகமது ஷான்க்கு காய்ச்சல் காரணமாக கோழிக்கோடு அரசு மருத்துவக் கல்லூரி மருத்துவமனையில் அனுமதிக்கப்பட்டிருந்த நிலையில் ‘வெஸ்ட் நைல்’ வைரஸ் தாக்கியது சோதனை மூலம் உறுதியானது.

மருத்துவமனையில் தொடர்ந்து சிகிச்சை பெற்றுவந்த சிறுவன், சிகிச்சை பலனின்றி உயிரிழந்தான் என தெரிவிக்கப்பட்டுள்ளது.

சிறுவன் உயிரிழந்ததை அடுத்து முன்னெச்சரிக்கை நடவடிக்கையாக வடக்கு மலபார் பகுதியில் மக்கள் எச்சரிக்கையுடன் இருக்கும்படி கேட்டுக் கொள்ளப்பட்டுள்ளனர். மேலும், இதுவரை ‘வெஸ்ட் நைல்’ வைரசினால் யாராயினும் தாக்கப்பட்டுள்ளதாக தகவல் இல்லை என கூறப்படுகிறது.

‘வெஸ்ட் நைல்’ வைரஸ் அறிகுறிகள்

இவ்வைரஸ் பறவைகளிலிருந்து கொசுக்கள் மூலமாக மனிதர்களுக்குப் பரவுகிறது என்றும் கழிவுநீர் தொட்டிகளில் இருந்தும் இந்த கிருமிகள் கொசுக்கள் வழியாக பரவுவதாக எச்சரிக்கப்படுகிறது.

இந்த நோய் தாக்கினால், சளி, காய்ச்சல், தலைவலி, சோர்வு மற்றும் குமட்டல் போன்ற அறிகுறிகள் இருக்கும். இந்த வைரஸ் தாக்கினால் மூளைக்காய்ச்சல் வரும் அபாயம் உள்ளது. வட அமெரிக்காவில் இத்தகைய நோயின் தாக்கம் அதிக அளவில் இருக்கும். டெல்லியில் இருந்து கேரளா சென்றுள்ள தேசிய நோய் தடுப்பு மைய அதிகாரிகளும் இந்த காய்ச்சலுக்கான சிகிச்சை குறித்து ஆலோசித்து வருகின்றனர்.

உஷார் நிலை

கேரளாவில் ‘நிபா’வை தொடர்ந்து ‘வெஸ்ட் நைல்’ வைரஸ் அச்சுறுத்தலை ஏற்படுத்தியுள்ளது. மாநில சுகாதாரத்துறை இயக்குநர் நடத்திய உயர்மட்ட அதிகாரிகள் கூட்டத்தில் அனைத்து மருத்துவமனைகளையும் உஷார் படுத்துமாறு எச்சரித்துள்ளார். மேலும் தனியார் மருத்துவமனைகளுக்கு அறிவுறுத்தல்கள் அனுப்பப்பட்டுள்ளதாக கூறப்படுகிறது.

கேரள சுகாதாரத்துறை அமைச்சர் கே.கே.சைலஜா பேசுகையில், யாரும் பீதி அடைய தேவையில்லை. வைரஸால் தாக்கப்பட்ட சிறுவன் கடந்த 10 நாட்களாக தனி வார்டில் வைத்து சிகிச்சை பெற்று வந்தான். உலக சுகாதார நிறுவனத்தின் பரிந்துரைகள்படி அனைத்து முன்னெச்சரிக்கை நடவடிக்கைகளும் மேற்கொள்ளப்பட்டுள்ளன என்றார்.