உங்களுடைய உதவியெல்லாம் வேண்டாம்… ஓரமாக போங்க… காங்கிரஸை கலாய்த்த மாயாவதி

Read Time:2 Minute, 46 Second

உத்தரபிரதேசம் முழுவதும் நீங்கள் வேட்பாளரை நிறுத்திக் கொள்ளலாம் என காங்கிரஸை மாயாவதி கலாய்த்துள்ளார்.

80 தொகுதிகளை கொண்ட உத்தரபிரதேச மாநிலம் மத்தியில் ஆட்சியமைக்கும் கட்சியை நிர்ணயம் செய்கிறது. கடந்த முறை பா.ஜனதா 73 தொகுதிகளை தன்வசப்படுத்தியது. இதனால் 30 ஆண்டுகளுக்கு பின்னர் பெரும்பான்மையுடன் ஆட்சிக்கு வந்த கட்சி என்ற பெருமையை தனதாக்கியது. இப்போது 2014 போன்று வரும் சூழ்நிலை காணப்படவில்லை. மோதல் கடினமாகவே இருக்கிறது. உ.பி.யில் காங்கிரசை கழற்றிவிட்டு சமாஜ்வாடி பகுஜன் சமாஜ்- ராஷ்டீரிய லோக் தளம் கட்சிகள் கூட்டணி வைத்துள்ளது.

சோனியா காந்தியின் ரேபரேலி தொகுதியிலும், ராகுல் காந்தியின் அமேதி தொகுதியிலும் போட்டி கிடையாது என கூட்டணி தரப்பில் தெரிவிக்கப்பட்டது.

இதனையடுத்து தனித்து களமிறங்குவதாக கூறிய காங்கிரஸ், பிரியங்காவை அரசியலுக்கு கொண்டு வந்தது. வேட்பாளர்களையும் அறிவித்தது. பிரியங்காவின் வருகை வாக்குகளை பிரிக்கும் என பார்க்கப்படுகிறது. இது சமாஜ்வாடி, பகுஜன் சமாஜ் கட்சிகளுக்கு பிடிக்கவில்லை. இந்நிலையில் 2 தொகுதியை ஒதுக்கியதால், நாங்கள் நல்லெண்ண அடிப்படையில் கூட்டணி கட்சிகளின் முக்கியமான வேட்பாளர்கள் போட்டியிடும் 7 தொகுதிகளில் வேட்பாளர்களை நிறுத்த மாட்டோம் என காங்கிரஸ் கூறியது.

மாயாவதி.

இதனை கலாய்த்த பகுஜன் சமாஜ் தலைவர் மாயாவதி, உத்தரபிரதேசம் முழுவதும் நீங்கள் வேட்பாளரை நிறுத்திக் கொள்ளலாம் என கூறிவிட்டார். காங்கிரஸ் கட்சியுடன் இனி ஒருபோதும் கூட்டணி என்பது கிடையாது. காங்கிரஸ் கட்சி உ.பி.யில் உள்ள 80 தொகுதிகளிலுமே வேட்பாளர்களை நிறுத்திக்கொள்ளலாம். எங்களுடைய கூட்டணிக்கு 7 தொகுதிகளை ஒதுக்கி குழப்பத்தை காங்கிரஸ் ஏற்படுத்த வேண்டாம். எங்களுடைய மகா கூட்டணியாலே பா.ஜனதாவை வெற்றிக் கொள்ள முடியும் என கூறியுள்ளார் மாயாவதி. அகிலேஷ் யாதவும், காங்கிரஸ் குழப்பத்தை ஏற்படுத்த வேண்டாம் என கூறியுள்ளார்.