நயன்தாரா குறித்து ராதாரவி சர்ச்சைக்குரிய பேச்சு…  விக்னேஷ் சிவன் பாய்ச்சல்

Read Time:6 Minute, 26 Second

கொலையுதிர் காலம் படத்தின் பத்திரிகையாளர் சந்திப்பில் நயன்தாரா குறித்து சர்ச்சைக்குரிய வகையில் பேசிய ராதாரவிக்கு கண்டனம் தெரிவிக்கப்பட்டு வருகிறது.

நயன்தாரா, பிரதாப் போத்தன் உள்ளிட்ட பலர் நடிப்பில் உருவாகியுள்ள கொலையுதிர் காலம் படத்தின் ட்ரெய்லர் வெளியீட்டு விழா சென்னையில் சனிக்கிழமை நடைபெற்றது. இவ்விழாவில் நயன்தாரா குறித்து ராதாரவி சர்ச்சைக்குரிய வகையில் பேசியுள்ளார். ராதாரவி பேசுகையில், எம்.ஜி.ஆர், சிவாஜி போன்றவர்கள் எல்லாம் ஒரு லெஜண்ட் ஆவார்கள். அவர்கள் சாகா வரம் பெற்றவர்கள்.

நயன்தாரா நல்ல நடிகை, இவ்வளவு நாள் திரையுலகில் நிலைப்பதே பெரிய விஷயம். அவரைப் பற்றி வராத செய்தியே கிடையாது. அதெல்லாம் தாண்டி நிற்கிறார்கள்.

தமிழ்நாட்டு மக்கள் எப்போதுமே ஒரு விஷயத்தை 4 நாட்கள் மட்டுமே ஞாபகம் வைத்திருப்பார்கள். பிறகு விட்டுவிடுவார்கள். நயன்தாரா ஒரு படத்தில் பேயாகவும் நடிக்கிறார். இன்னொரு புறம் சீதாவாகவும் நடிக்கிறார். இப்போது சீதாவாக யார் வேண்டுமானாலும் நடிக்கலாம். முன்பெல்லாம் சீதாவாக நடிக்கவேண்டும் என்றால் கே.ஆர்.விஜயாவைத் தான் தேடுவார்கள். இப்போது பார்த்தவுடன் கும்பிடத் தோன்றுபவர்களும் நடிக்கலாம், பார்த்தவுடன் கூப்பிடத் தோன்றுபவர்களும் நடிக்கலாம் என பேசினார்.

அவருடைய இந்த பேச்சு அடங்கிய வீடியோ சமூக வலைதளங்களில் வைரலாக பரவி வருகிறது. இதற்கு கடும் கண்டங்கள் தெரிவித்து நெட்டிசன்கள் விமர்சனம் செய்து வருகிறார்கள். ஏற்கனவே திரையுலகில் பாலியல் துன்புறுத்தல் தொடர்பாக நடவடிக்கை எடுக்கப்படுவது இல்லை என்ற குற்றச்சாட்டு நிலவுகையில் இதுபோன்ற சர்ச்சைக்குரிய பேச்சை வெளியே பேசியுள்ளார் ராதாரவி.

சின்மயி காட்டம்

இவ்விவகாரத்தை கையில் எடுத்துள்ள பாடகி சின்மயி தனது டுவிட்டர் பக்கத்தில், தயாரிப்பாளர் சங்கமும், நடிகர் சங்கமும் என் பிரச்சினையில் எந்த நடவடிக்கையும் எடுக்கவில்லை. அவர்கள் ஒதுங்கினர். வேறு யூனியன் விஷயத்தில் தலையிட முடியாது என்ற காரணத்தால். ஆனால் இப்போது அந்த நபர் மிகவும் வெற்றிகரமாக தன்னை நிரூபித்த நடிகையையல்லவா மேடையில் சீண்டியுள்ளார். இப்போதாவது நடவடிக்கை எடுங்கள். முடிந்தால் எடுங்கள் என கேட்டுக்கொண்டுள்ளார்.

வீடியோவில் ராதாரவி அந்த நடிகையின் படத்தின் ட்ரெய்லர் வெளியீட்டு விழாவில் நடிகையை மிகவும் தரக் குறைவாகப் பேசுகிறார். ஒருவரும் ஒரு வார்த்தைகூட கண்டனம் தெரிவிக்கவில்லை. அப்புறம் கூப்பிடுறவுங்க கூப்பிடுவாங்கன்னு சொல்றாரே ராதாரவி, அந்த கூப்பிடுற ஆம்பளைங்க யாரு? அவங்கள தானே அசிங்கப் படுத்தணும்? என்ற கேள்வியையும் எழுப்பியுள்ளார்.

விக்னேஷ் சிவன் பாய்ச்சல்

ராதாரவியின் பேச்சு குறித்து நயன்தாராவின் காதலரும் இயக்குநருமான விக்னேஷ் சிவன் கடும் கண்டனத்தை தெரிவித்துள்ளார்.

இதுதொடர்பாக அவர் டுவிட்டரில் வெளியிட்டுள்ள தகவலில், ஒரு பாரம்பரிய குடும்பத்திலிருந்து வந்தவரிடம் இருந்து வெளியாகியுள்ள வார்த்தைகள், அருவருப்பான கருத்துகளுக்கு எதிராக யார் நடவடிக்கை எடுப்பார்களோ? யார் எனது கண்டன குரலுக்கு ஆதரவு கொடுப்பார்களோ? எனக்கு எந்தஒரு துப்புமில்லை, ஆதரவும் இல்லை. தன் மீதான கவனத்தை ஈர்ப்பதற்காக (ராதாரவியின் பெயரை குறிப்பிடாமல்) இதை செய்துகொண்டிருக்கிறார். மூளையற்றவர்.

அவருடைய கீழ்தரமான கருத்தை அங்கிருந்தவர்கள் கைத்தட்டி, சிரித்து கேட்து மிகவும் கவலையளிக்கிறது. இப்படி ஒரு நிகழ்ச்சி முடிவுறாத ஒரு படத்துக்காக நடக்கிறது என்று எங்கள் யாருக்கும் தெரியாது. படத்தை தயாரிப்பார்கள், இயக்குநர்கள் சில ஆண்டுகளுக்கு முன்னரே கைவிட்டுவிட்டனர் என்று பார்த்தேன். இது சற்றும் பொருத்தமற்ற நிகழ்ச்சியாகும். தேவையற்ற நபர்கள் கலந்து கொண்டு என்ன பேசுகிறோம் என்று தெரியாமலயே பேசினர். இதுதான் ஒரு படத்தை புரமோட் செய்யும் விதம் என்றால் இனி இது போன்ற நிகழ்ச்சிகளில் இருந்து விலகி நிற்பதே நலம்.

ஏனெனில் இத்தகைய நிகழ்ச்சிகள் வேலையற்ற நபர்கள், தங்களுடைய அறிவற்ற செயலை, வார்த்தைகளை கக்குவதற்கு இடமளிக்கிறது. என்ன நடந்தாலும் அவர் மீது நடிகர் சங்கத்தை சேர்ந்தவர்களோ அல்லது வேறு எந்த சங்கத்தைச் சேர்ந்தவர்களோ நடவடிக்கை எடுக்கப்போவதில்லை. பரிதாப நிலை என்று காட்டமாக பதிவு செய்துள்ளார். ராதா ரவிக்கு பல்வேறு தரப்பில் கண்டங்கள் தெரிவிக்கப்பட்டு வருகிறது.