பா.ஜனதாவை வீழ்த்தும் நோக்கத்தில் காங்கிரஸ் வியூகம் கைகொடுக்குமா?

Read Time:4 Minute, 13 Second

நாடாளுமன்றத் தேர்தலில் பா.ஜனதாவை வீழ்த்தும் நோக்கில் பல்வேறு மாநிலங்களில் கூட்டணி கட்சிகளுக்காக இடங்களை விட்டுக்கொடுத்து வலுவான கூட்டணியை காங்கிரஸ் கட்சி உறுதி செய்துள்ளது. உத்தரபிரதேசம் மாநிலத்தில் கூட்டணியை எதிர்பார்த்த நிலையில், மாயாவதியும், அகிலேஷும் கூட்டணி அமைத்ததால், காங்கிரஸ் கட்சி தனித்து விடப்பட்டது.

மராட்டியம், கர்நாடகம், பீகார், தமிழகம், காஷ்மீர் மாநிலங்களில் கூட்டணியை காங்கிரஸ் கட்சி உறுதி செய்துவிட்டது. மேற்கு வங்கத்தில் இடதுசாரிகளுடன் நல்லவிதமாக பேச்சு சென்ற நிலையில், திடீரென ஏற்பட்ட குழப்பத்தால் பேச்சு தடைபட்டது. இரு கட்சிகளும் தனித்தனியாக போட்டியிட உள்ளனர்.டெல்லியில் ஆம் ஆத்மி கட்சியுடன் கூட்டணி குறித்து பேசப்பட்டாலும் இது இன்னும் இறுதி செய்யப்படவில்லை. பிற மாநிலங்களிலும் தொகுதிகளை விட்டுக்கொடுத்து காங்கிரஸ் கட்சி கூட்டணியை தக்கவைத்து கொண்டுள்ளது.

இந்நிலையில் காங்கிரஸ் கட்சியின் புள்ளியல் ஆய்வுதுறையின் தலைவர் பிரவீன் சக்தரவர்த்தி பேசுகையில், இந்த தேர்தலில் காங்கிரஸ் கட்சி பெரும்பாலான இடங்களை கூட்டணி கட்சிகளுக்காக விட்டுக்கொடுத்து, தேர்தலை சந்திக்கிறது. எங்கள் நோக்கம் மத்தியில் பா.ஜனதா ஆட்சியை அகற்ற வேண்டும் எனதுதான். அதனால், கூட்டணி கட்சிகளுக்கு அதிகமான முக்கியத்துவம் அளிக்கப்பட்டுள்ளது.

காங்கிரஸ் கட்சியின் வரலாற்றிலேயே 2019-ம் ஆண்டு தேர்தல்தான் கூட்டணிக்கு உகந்த தேர்தலாக இருக்கக்கூடும். கூட்டணி அறிவித்தபின் கூட்டணிக் கட்சிகள் மனவருத்தம் அடையாத வகையில் அதிக முக்கியத்துவம் தரும் வகையில் இடங்கள் வழங்கப்பட்டுள்ளன. 2004 தேர்தலில் வாஜ்பாயை எதிர்க்கட்சி வரிசையில் அமர வைத்தது இந்த யுக்தியால்தான்.

கடந்த 1996-ம் ஆண்டுக்குப் பின் மக்களவை தேர்தலில் மிகக் குறைந்த அளவு இடங்களில் காங்கிரஸ் போட்டியிடுவது இதுதான் முதல் முறையாகும். 2004-ல் காங்கிரஸ் கட்சி பயன்படுத்திய யுக்தி இப்போது பயன்படுத்தப்படுவது தொண்டர்களுக்கு மகிழ்ச்சியை ஏற்படுத்தி இருக்கிறது. கடந்த 1996-ம் ஆண்டில் காங்கிரஸ் கட்சி 529 இடங்களிலும், 1998-ல் 467 இடங்களிலும், 2009-ம் ஆண்டில் 440 இடங்களிலும், 2014-ம் ஆண்டில் 464 இடங்களிலும் காங்கிரஸ் போட்டியிட்டது.

இந்த முறை மக்களவைத் தேர்தலில் காங்கிரஸ் கட்சி இதுவரை 218 இடங்களுக்கு வேட்பாளர்களை அறிவித்துள்ளது. பீகாரில் 40 இடங்களில் காங்கிரஸ் கட்சி 9 தொகுதிகளிலும், மராட்டியத்தில் 48 தொகுதிகளில் 26 இடங்களிலும், கர்நாடக மாநிலத்தில் 28 இடங்களில் 20 தொகுதிகளிலும் காங்கிரஸ் கட்சி போட்டியிடுகிறது. ஜார்கண்ட் மாநிலத்தில் 14 இடங்களில் 7 தொகுதிகளிலும், தமிழகத்தில் 39 இடங்களில் 9 தொகுதிகளிலும் காங்கிரஸ் கட்சி போட்டியிடுகிறது.

ஜம்மு காஷ்மீரில் 4 இடங்களில் காங்கிரஸ் போட்டியிடுகிறது. தேசிய அளவில் கூட்டணி கட்சிகளுக்கு அதிகமான இடங்களை அளித்து தோழமையுடன் கூட்டணியை அழைத்துச் செல்ல விரும்புகிறது என கூறியுள்ளார். பிரியங்காவின் வருகை உ.பி. காங்கிரசுக்கான செல்வாக்கை உயர்த்தும் எனவும் நம்பிக்கை தெரிவிக்கிறார்.