ஏழைகளுக்கு ஆண்டுக்கு ரூ.72,000 ராகுல் அறிவிப்பு ஒரு ஏமாற்று வேலை – ஜெட்லி விமர்சனம்

Read Time:4 Minute, 9 Second

ஏழைகளுக்கு ஆண்டுக்கு ரூ.72,000 என்ற காங்கிரஸ் அறிவிப்பு ஒரு ஏமாற்று வேலை என மத்திய அமைச்சர் அருண் ஜெட்லி விமர்சனம் செய்துள்ளார்.

காங்கிரஸ் தலைவர் ராகுல் காந்தி, மத்தியில் காங்கிரஸ் கட்சி ஆட்சிக்கு வந்தால், மக்களுக்கு குறைந்தபட்ச வருவாய் உறுதி அளிப்பு திட்டம் அமல்படுத்தப்படும் என்று ஏற்கனவே கூறிவந்தார். நேற்று அத்திட்டம் தொடர்பான அறிவிப்பு வெளியிடுகையில், மத்தியில் காங்கிரஸ் ஆட்சிக்கு வந்தால், குறைந்தபட்ச வருவாய் உறுதி அளிப்பு திட்டத்தின் கீழ் ஏழைகளுக்கு ஆண்டுதோறும் ரூ.72 ஆயிரம் வழங்கப்படும். 5 கோடி குடும்பங்களுக்கு இந்த நிதி உதவி கிடைக்கும். அந்த குடும்பங்களில் உள்ள 25 கோடி பேர், இத்திட்டத்தால் நேரடியாக பலன் பெறுவார்கள்.

இந்த திட்டத்தால் ஏற்படும் நிதி தாக்கத்தை காங்கிரஸ் கட்சி ஆய்வு செய்து விட்டது. கடந்த சில மாதங்களாக எல்லா கணக்கீடுகளையும் போட்டுப் பார்த்து விட்டோம். புகழ்பெற்ற பொருளாதார நிபுணர்களுடன் ஆலோசனை நடத்தி, இந்த திட்டத்தை இறுதி செய்து உள்ளோம் என்றார்.

நிதி எங்கிருந்து வரும்?

இந்த திட்டத்துக்கான நிதி ஆதாரம் எங்கிருந்து வரும்? இதனால் பொருளாதாரத்துக்கு பாதிப்பு ஏற்படாதா? என்று செய்தியாளர்கள் கேள்வி எழுப்பினர். அதற்கு பதிலளித்து பேசிய ராகுல் காந்தி, நாட்டில் போதுமான பணம் இருக்கிறது. அதனால்தான் காங்கிரஸ் கட்சி இந்த உத்தரவாதத்தை அளிக்கிறது. மத்தியபிரதேசம், சத்தீஷ்கார், ராஜஸ்தான் ஆகிய மாநிலங்களில், ஆட்சிக்கு வந்த 10 நாட்களில் விவசாய கடன்கள் தள்ளுபடி செய்யப்படும் என்ற எங்களுடைய வாக்குறுதி நிறைவேற்றப்பட்டது. அதே போல் இத்திட்டமும் நிறைவேற்றப்படும். முதலில், சோதனை ரீதியாக அமல்படுத்தப்பட்ட பிறகு, முழுமையாக செயல்படுத்தப்படும். ஒவ்வொரு நாளும் உங்கள் பணம் எடுக்கப்பட்டு வருகிறது. அது எப்படி நடக்கிறது என்பதை உங்களுக்கு காட்டுவோம் என கூறியுள்ளார்.

அருண் ஜெட்லி காட்டம்

ஏழைகளுக்கு ஆண்டுக்கு ரூ.72,000 என்ற காங்கிரஸ் அறிவிப்பு ஒரு ஏமாற்று வேலை என்று அருண் ஜெட்லி விமர்சனம் செய்துள்ளார்.

காங்கிரஸ் கட்சி, வறுமையை ஒழிப்பதை தேர்தல் ஆயுதமாகப் பயன்படுத்துகிறதே தவிர இதுவரையில் அதற்காக ஒன்றும் செய்தது கிடையாது. இத்தகைய வானளாவிய உத்தரவாதங்களை காங்கிரஸ் அறிவிக்க உரிமையற்றதாகிறது. இப்போது காங்கிரஸ் அறிவித்து இருக்கும் ரூ.72,000 அறிவிப்பு ஒரு ஏமாற்று வேலையாகும். ஆட்சியில் இருந்தபோது 2008-ல் விவசாயக் கடன் ரூ.72,000 கோடியைத் தள்ளுபடி செய்வதாக அறிவித்தனர். ஆனால் ரூ.52,000 கோடிதான் தள்ளுபடி செய்தனர். இதிலும், டெல்லி வர்த்தகர் ஒருவர் இதன் முக்கால்வாசிப் பயனை அடைந்ததாக இந்திய தலைமைத் தணிக்கையாளர் அறிக்கை தெரிவித்தது.

ராகுல் காந்தி அறிவித்ததை விட 1.5 மடங்கு அதிகமாக பிரதமர் மோடி அரசு ஏழைகளுக்கு சாதகம் செய்துள்ளது. ஆதார் மூலமான திட்டங்களை விமர்சனம் செய்த காங்கிரஸ் கட்சிதான் இப்போது, குறைந்தபட்ச ஏழைகள் வருவாய் திட்டத்தில் வங்கிகள் மூலம் பணம் அனுப்பப்படும் என்று கூறுகிறது என அருண் ஜெட்லி விமர்சனம் செய்துள்ளார்.