தமிழகத்தில் 3 சட்டமன்ற தொகுதிகளுக்கு தற்போது தேர்தல் இல்லை…!

Read Time:3 Minute, 1 Second

தமிழகத்தில் காலியாகவுள்ள அரவக்குறிச்சி, ஒட்டப்பிடாரம், திருப்பரங்குன்றம் ஆகிய மூன்று சட்டமன்ற தொகுதிகளுக்கு தற்போது தேர்தல் இல்லையென தெரியவந்துள்ளது.

நாடாளுமன்றத் தேர்தல் தேதி அறிவிப்பை தேர்தல் ஆணையம் கடந்த 10-ம் தேதி வெளியிட்டது. தமிழகத்தில் நாடாளுமன்றத் தேர்தலுடன், காலியாகவுள்ள 21 சட்டப்பேரவைத் தொகுதிகளில் 18 தொகுதிகளுக்கும் இடைத் தேர்தல் ஏப்ரல் 18-ம் தேதி நடைபெறும் என அறிவிக்கப்பட்டது. நீதிமன்றங்களில் உள்ள நிலுவை வழக்குகள் காரணமாக அரவக்குறிச்சி, ஒட்டப்பிடாரம், திருப்பரங்குன்றம் ஆகிய 3 தொகுதிகளுக்கு இடைத்தேர்தல் நடைபெறாது என விளக்கம் அளிக்கப்பட்டது.

இந்நிலையில், காலியாகவுள்ள அரவக்குறிச்சி, ஒட்டப்பிடாரம், திருப்பரங்குன்றம் ஆகிய சட்டப்பேரவைத் தொகுதிகளின் இடைத்தேர்தலை நாடாளுமன்றத் தேர்தலுடன் சேர்த்து நடத்த தேர்தல் ஆணையத்துக்கு உத்தரவிடக் கோரி மாநிலங்களவை திமுக உறுப்பினர் ஆர்.எஸ். பாரதி, முன்னாள் அமைச்சர் வி.செந்தில் பாலாஜி ஆகியோர் சார்பில் உச்சநீதிமன்றத்தில் மனுக்கள் தாக்கல் செய்யப்பட்டன. இவ்வழக்கு தொடர்பான விசாரணையில் தமிழகத்தில் காலியாகவுள்ள அரவக்குறிச்சி, ஒட்டப்பிடாரம், திருப்பரங்குன்றம் ஆகிய மூன்று சட்டப்பேரவைத் தொகுதிகளில் இடைத்தேர்தலை நடத்துவோம் என தேர்தல் ஆணையம் கூறியது.

இப்போது தேர்தல் நடைபெறும் தேதிகளில் இத்தேர்தலை நடத்த வேண்டும் என திமுக தரப்பில் வாதிடப்பட்டது. அப்போது உச்சநீதிமன்றம் தேர்தலை எப்போது நடத்துவது என்பது குறித்து நாங்கள் தெரிவிக்க மாட்டோம் என ஏற்கெனவே கூறிவிட்டோம். உங்களது கோரிக்கையை தேர்தல் ஆணையம் நிச்சயம் பரிசீலிக்கும் என்றது. இதைத் தொடர்ந்து பிறப்பிக்கப்பட்ட உத்தரவில், தமிழகத்தில் காலியாகவுள்ள அரவக்குறிச்சி, ஒட்டப்பிடாரம், திருப்பரங்குன்றம் ஆகிய மூன்று தொகுதிகளுக்கான இடைத்தேர்தலை உரிய நேரத்தில் நடத்த வேண்டும். இது தொடர்புடைய மனுக்கள் முடித்து வைக்கப்படுகின்றன என்று தெரிவிக்கப்பட்டுள்ளது.

உரிய நேரம் எப்போது என்பது குறித்து தேர்தல் ஆணையமோ, உச்சநீதிமன்றமோ தெளிவுப்படுத்தவில்லை. இதனால், இந்த 3 தொகுதிகளுக்கும் தற்போதைக்கு இடைத்தேர்தல் இல்லையெனத் தெளிவாகிறது.