இந்திய ராணுவம் ‘மோடியின் சேனைகள்’என்ற யோகியின் பேச்சுக்கு முன்னாள் விமானப்படை தளபதி எதிர்ப்பு

Read Time:4 Minute, 36 Second

“இந்தியப் படைகள் அனைத்தும் எந்தஒரு தனிநபருக்கும் சொதமானவை கிடையாது. அவைகள் இந்திய சேதத்திற்கு சொந்தமானவை,” என இந்திய விமானப்படையின் முன்னாள் தலைமை அட்மிரல் எல் ராம்தாஸ் கூறியுள்ளார்.

இந்திய பாதுகாப்பு படைகளை தேர்தல் பிரசாரத்திற்காக எந்தஒரு அரசியல் கட்சிகளும் பயன்படுத்தக்கூடாது என தேர்தல் ஆணையம் உத்தரவிட்டுள்ளது. ஆனால் பா.ஜனதா தரப்பில் இந்த விதிகள் மீறப்பட்டு வருகிறது. டெல்லியில் அபிநந்தனின் புகைப்படம் இடம்பெற்ற பேனர்கள் பா.ஜனதா சார்பில் வைக்கப்பட்டது. விமானப்படையின் உடையுடன் பா.ஜனதாவை சேர்ந்தவர்கள் பிரசாரம் செய்தனர். மேலும் பா.ஜனதா வெளியிட்ட நானும் காவலாளி வீடியோவிலும் ராணுவம் இடம்பெற்றது. இதற்கு தேர்தல் ஆணையம் நோட்டீஸ் விடுத்துள்ளது. இந்நிலையில் யோகி ஆதித்யநாத் பேச்சும் சர்ச்சையை ஏற்படுத்தியுள்ளது.

யோகி ஆதித்யநாத் பேசியது என்ன?

உத்தரபிரதேச மாநிலம் காசியாபாத்தில் அம்மாநில முதல்வர் யோகி ஆதித்யநாத் பிரசாரம் ஒன்றில் பேசுகையில், காங்கிரஸ், சமாஜ்வாடி, பகுஜன் சமாஜ் அரசுக்களால் செய்ய முடியாதவை, இப்போது பா.ஜனதாவின் அரசில் சாத்தியமாகியுள்ளது. பிரதமர் மோடியின் தலைமையிலான அரசில் பயங்கரவாத முகாம்கள், எல்லையை தாண்டி பாகிஸ்தானிலும் அழிக்கப்பட்டுள்ளது.

காங்கிரஸ் பயங்கரவாதிகளுக்கு பிரியாணி கொடுத்தது, ஆனால் மோடியின் ராணுவம் அவர்களுக்கு புல்லட் மற்றும் வெடிகுண்டுகளை வழங்கியது.

இதுதான் வேறுபாடு. மசூத் அசாரை காங்கிரஸ் ஜியென அழைத்து பயங்கரவாதத்தை ஊக்குவிக்கிறது என குறிப்பிட்டு இருந்தார். யோகி ஆதித்யநாத் ராணுவத்தை மையப்படுத்திய பிரசாரம் செய்ததற்கு எதிர்க்கட்சிகள் கண்டனம் தெரிவித்தன. இவ்விவகாரத்தை ஏற்கனவே தேர்தல் ஆணையம் கையில் எடுத்துள்ளது, விசாரித்து அறிக்கையை சமர்பிக்குமாறு காசியாபாத் மாவட்ட ஆட்சியரிடம் கேட்டுக்கொண்டுள்ளது.

எதிர்க்கட்சிகள் கண்டனம்

பா.ஜனதா தொடர்ந்து ராணுவத்தை சுயநலத்திற்காக பயன்படுத்துகிறது என காங்கிரஸ் உள்ளிட்ட எதிர்க்கட்சிகள் கண்டனம் தெரிவித்துள்ளன. காங்கிரஸ் தலைவர் பிரியங்கா சதூர்வேதி வெளியிட்டுள்ள டுவிட் செய்தியில், யோகி ஆதித்யநாத் ராணுவத்தை மோடியின் ராணுவம் என கூறியுள்ளார். இது பாதுகாப்பு படைகளை அவமதிக்கும் செயலாகும். இந்திய பாதுகாப்பு படைகள் பிரசார மந்திரியின் (பிரதமர்) படைகள் கிடையாது. யோகி ஆதித்யநாத் மன்னிப்பு கேட்க வேண்டும் என வலியுறுத்தியுள்ளார். வாக்குக்காக இந்திய ராணுவம் அவமதிக்கப்படுகிறது என திரிணாமுல் காங்கிரசும் கண்டனம் தெரிவித்துள்ளது. இந்திய ராணுவம் மக்களுக்கானது, தனிநபர் யாருக்கும் சொந்தமான கிடையாது என பிற கட்சிகளும், நெட்டிசன்களும் விமர்சனம் செய்து வருகின்றனர்.

தேர்தல் ஆணையத்திடம் செல்கிறது

இப்போது இவ்விவகாரத்தை தேர்தல் ஆணையத்திடம் எடுத்துச் செல்ல உள்ளதாக என இந்திய விமானப்படையின் முன்னாள் தலைமை அட்மிரல் எல் ராம்தாஸ் கூறியுள்ளார்.

“இந்தியப் படைகள் அனைத்தும் எந்தஒரு தனிநபருக்கும் சொதமானவை கிடையாது. அவைகள் இந்திய சேதத்திற்கு சொந்தமானவை. இப்போது தேர்தல் நடைபெற உள்ளதால் தேர்தல் ஆணையம்தான் தலைமையாகும். யோகி ஆதித்யநாத் பேச்சு விவகாரம் தொடர்பாக தேர்தல் ஆணையத்தை நாட உள்ளேன்,”

எனக் கூறியுள்ளார். யோகி ஆதித்யநாத்தின் பேச்சினால் முன்னாள் வீரர்கள் பலர் மிகவும் வருத்தம் அடைந்துள்ளனர் எனவும் குறிப்பிட்டுள்ளார்.