பள்ளியில் வானியல் ஆய்வகங்கள்… மோடி அரசாங்கத்திற்கு உதவும் 19 வயது இளைஞர்…!

Read Time:8 Minute, 32 Second

5 ஆண்டுகளுக்கு முன்பு சூரியனைச் சுற்றி வரும் குறுங்கோள் ஒன்றை கண்டுபிடித்த ஆர்யன் மிஸ்ரா, பள்ளிகளில் குறைந்த கட்டண ஆய்வகங்களை உருவாக்கி வருகிறார். அவரது முயற்சிகள் சமீபத்தில் அரசாங்கத்தின் கவனத்தை ஈர்த்துள்ளது. தற்போது, நரேந்திர மோடி அரசு இந்தியா முழுவதும் கேந்திரியா வித்யாலயாக்கள் மற்றும் ஜவஹர் நவோதயா வித்யாலயாக்களில் வானியல் ஆய்வகங்களை உருவாக்க திட்டமிட்டுள்ளது. இந்தியா முழுவதும் உள்ள இந்த பள்ளிகளில் 19 வயதான ஆர்யன் மிஸ்ராவின் உதவியுடன் மலிவு விலையில் வானியல் ஆய்வகங்களை உருவாக்கிறது.

டெல்லியில் ஒரு செய்தித்தாள் விற்பனையாளருக்கு பிறந்த ஆர்யன் மிஸ்ரா, நாடு தழுவிய சிறுகோள்தேடல் திட்டத்தில் பங்கேற்றபோது, சைபர் கஃபே (இண்டர்நெட் மையம்) ஒன்றில் தரவை ஸ்கேன் செய்யும் போது பூமிக்கு அருகிலுள்ள ஒரு சிறுகோள் ஒன்றை கண்டுபிடித்தபோது அவருக்கு 14 வயது. நான்கு ஆண்டுகளுக்கு பிறகு அவர் 2018 -ல் ஸ்பார்க் வானியல் (Spark Astronomy) என்ற நிறுவனத்தை நிறுவினார். வானியல் ஆய்வகங்கள் அமைக்கும் மிஸ்ராவின் முயற்சிகள் சமீபத்தில் அரசாங்கத்தின் முதன்மை அறிவியல் ஆலோசகர் கே. விஜயராகவனின் கவனத்தை ஈர்த்தன. இப்போது அவர், இந்த குறைந்த கட்டண ஆய்வகங்களை மனிதவள மேம்பாட்டு அமைச்சகத்தின் கீழ் உள்ள பள்ளிகளுக்கு கொண்டு வருகிறார்.

இருதரப்பு ஒப்பந்தம் இன்னும் முறைப்படுத்தப்படவில்லை என்றாலும், முதன்மை அறிவியல் ஆலோசகரின் அலுவலகத்தின் மூத்த ஆலோசகராக இருக்கும் சைலஜா வைத்யா குப்தா, கேந்திரியா வித்யாலயாக்கள் மற்றும் ஜே.என்.வி.களில் வானியல் ஆய்வகங்களை நிறுவுவதற்கான முயற்சிகள் நடந்து வருவதாக உறுதிப்படுத்தியுள்ளார் என தி பிரிண்ட் செய்தி வெளியிட்டுள்ளது.

ஸ்பார்க் வானியல் நிறுவனத்தின் உடனான அரசாங்கத்தின் ஒப்பந்த திட்டத்தின்படி, டிசம்பர் முதல் அடுத்த மூன்று மாதங்களில் இந்தியாவில் உள்ள பல்வேறு அரசுப் பள்ளிகளில் எட்டு ஆய்வகங்கள் கட்டப்படும். அடுத்த கட்டமாக 2020 ஏப்ரல் முதல் நாடு முழுவதும் கூடுதலாக 500 ஆய்வகங்கள் கட்ட திட்டமிடப்பட்டுள்ளது.

சுயமாக கற்றுக்கொண்ட வானியல் ஆர்வலரான மிஸ்ரா, பள்ளி நாட்களில் பள்ளி முடிந்ததும் இண்டர்நெட் மையத்தில் அதிக மணிநேரம் செலவிடுவார், அப்போது பரந்த பிரபஞ்சத்தை பற்றி அனைத்தையும் கற்றுக்கொள்வதை வழக்கமாக கொண்டிருந்தார். மாணவர்கள் விண்வெளியைப் பற்றி அறிந்து கொள்வது எவ்வளவு கடினம் என்பதை ஆரம்பத்தில் உணர்ந்துள்ளார். இந்தியாவில் பெரும்பாலான பள்ளிகள் தங்கள் பாடத்திட்டத்தில் விண்வெளி குறித்து ஒரு தனி பாடத்தை கொண்டிருக்கவில்லை. இதனை நிவர்த்தி செய்வது எப்படி என்பது பற்றி அவருடைய எண்ண ஓட்டம் இருந்துள்ளது. இதன் அடிப்படையில் இதற்கான கட்டமைப்புடன் குறைந்த செலவில் ஆய்வகம் அமைக்கும் விதமாக ஸ்பார்க் வானியல் நிறுவனத்தை தொடங்கியுள்ளார். மிஸ்ரா இப்போது ஹரியானாவில் உள்ள அசோகா பல்கலைக்கழகத்தில் இயற்பியலில் பி.எஸ்சி படித்து வருகிறார்.

மிஸ்ரா பேசுகையில், “எனக்கு 11 வயதிலிருந்தே வானியலில் ஆர்வம் இருந்தது, ஆனால் அதைப் பற்றி அறிய வாய்ப்பு கிடைக்கவில்லை. எனது தந்தை செய்தித்தாள் விற்பனையாளர். நாங்கள் ஒரு குடிசை பகுதியில் வாழ்ந்தோம், அப்போது, எங்களிடம் ஸ்மார்ட்போன் அல்லது மடிக்கணினி கிடையாது. என்னுடைய பெற்றோர் ஒருபோதும் பள்ளிக்கு செல்லவில்லை என்றாலும், தரமான கல்வியின் முக்கியத்துவத்தை புரிந்துகொண்டு என்னை ஒரு தனியார் பள்ளியில் சேர்த்து படிக்க வைத்தனர்.

நான் ஒரு நல்ல பள்ளியில் படிக்க என் அம்மா தனது நகைகளை விற்க வேண்டியிருந்தது. அந்த நேரத்தில், தனியார் பள்ளி குடிசைபகுதியை சேர்ந்த மாணவர்களை அனுமதிக்கவில்லை. எனவே ஒரு மூத்த வழக்கறிஞரின் வீட்டில் காவலாளியாக பணியாற்றிய என் மாமா, எனது பள்ளி ஆவணங்களில் பாதுகாவலராக முகவரியை பயன்படுத்த முடிவு செய்தோம். நான் ஒரு குடிசைபகுதியில் வாழ்ந்தேன் என்பது என் நெருங்கிய நண்பர்களுக்கு மட்டுமே தெரியும்,” என்கிறார்.

புது தில்லியில் நடைபெற்ற தேசிய அளவிலான வானியல் ஆராச்சி முகாமில் மிஸ்ராவும் அவரது நண்பர் கீர்த்திவர்தன் குக்ரேதி செவ்வாய் கிரகத்திற்கும் வியாழனுக்கும் இடையில் ஒரு சிறுகோள் கண்டுபிடித்தனர். இதுஒரு செய்தித்தாள் விற்பனையாளரின் மகன் செய்தித்தாளில் தோன்றுவது பெரிய விஷயமாக இருந்தது. இது வானியலில் தீவிரமாகப் பின்தொடர அவர், தனது பெற்றோரை நம்பவைக்க உதவியது. மிஸ்ரா பின்னர் பல பள்ளிகள் மற்றும் பல்கலைக்கழகங்களுக்கு வானியல் பற்றிய பேச்சுக்களை வழங்க அழைக்கப்பட்டார். ஆனால், இந்த விரிவுரைகள் விண்வெளியைப் பற்றிய அறிவைப் பரப்புவதற்கு போதுமானதாக இருக்காது அல்லது அண்டத்தின் மீதான அவர்களின் ஆர்வத்தைப் பின்தொடர இளம் தலைமுறையினரை ஊக்குவிக்காது என்ற புரிதல் அவருக்கு எப்போதும் இருந்தது.

வானியல் பற்றிய விவாதங்கள் நடைபெறக்கூடிய இடங்களை உருவாக்குவது மிகவும் பலனளிக்கும் என்று அவர் விரைவில் உணர்ந்தார். இது ‘ஸ்பார்க் வானியல்’ நிறுவனம் பிறப்பதற்கு வழிவகுத்தது. இன்று அவரது தொடக்கத்தால் கட்டப்பட்ட ஆய்வகங்கள் வானிலை கண்காணிப்புக்கு நான்கு அடிப்படை தொலைநோக்கிகளை வழங்கியுள்ளது. குழாய்கள் அல்லது குறுந்தகடுகள் (சிடி) போன்ற மறுசுழற்சி செய்யப்பட்ட பொருட்களைப் பயன்படுத்தி மிஸ்ரா தானே பணிபுரிந்து ஆய்வகங்களை உருவாக்குகிறார். அவர் வெவ்வேறு வகுப்புகளுக்கான பாடத்திட்டங்களையும், மூன்று நாள் ஆசிரியரின் பயிற்சி வகுப்பையும் வழங்குகிறது. அவரது வகுப்புகளுக்கு பதிவுபெறும் மாணவர்கள் வானியல் துறையில் சமீபத்திய முன்னேற்றங்கள் குறித்த வழக்கமான செய்திகளை பெறுகிறார்கள்.

இந்நிறுவனம் ஒவ்வொரு ஆய்வகத்திற்கும் சுமார் 3 லட்சம் ரூபாய் வசூலிக்கிறது. இப்போதைக்கு இது ஐந்து தனியார் பள்ளிகளுடன் பணிபுரிந்துள்ளது. புதுடெல்லியில் இரண்டு, மற்றும் பஞ்சாப், அரியானா மற்றும் குஜராத்தில் தலா ஒரு பள்ளிகளில் ஆய்வகங்களை அமைத்துள்ளது. இந்த வானியல் ஆய்வகங்களை பள்ளிகளில் ‘ஸ்மார்ட் வகுப்புகள்’ போலவே பொதுவான ஒன்றாகும் என நம்புகிறார் மிஸ்ரா. “நிச்சயமாக, இந்த ஆய்வகங்கள் அனைவரையும் வானியலாளராக மாற்றாது. ஆனால் வானத்தைப் பார்ப்பது ஒருவரை (மாணவரையோ, மாணவியையோ) அவரது குறிக்கோள்களையும் கனவுகளையும் நோக்கிச் செயல்பட தூண்டுகிறது. இந்த ஆய்வகங்களில் அது நடக்கும் என்று நான் நம்புகிறேன், ”என்று கூறுகிறார் மிஸ்ரா.