#TMPExclusive ஜார்கண்டில் பா.ஜனதா தோல்விக்கு குடியுரிமை சட்டம் காரணமல்ல…!

Read Time:15 Minute, 29 Second
Page Visited: 71
#TMPExclusive ஜார்கண்டில் பா.ஜனதா தோல்விக்கு குடியுரிமை சட்டம் காரணமல்ல…!

ஜார்கண்ட் மாநிலத்தில் சட்டமன்றத் தேர்தல் நடைபெற்ற போது மத்திய அரசு குடியுரிமை சட்டத்தில் திருத்தம் கொண்டுவந்தது. வங்காளதேசம், ஆப்கானிஸ்தான் மற்றும் பாகிஸ்தானில் மதரீதியாக தாக்குதல்களை எதிர்க்கொண்டு இந்தியாவிற்கு அடைக்கலம் கோரிவந்த இஸ்லாமியர்கள் அல்லாத சிறுபான்மையினருக்கு குடியுரிமை வழங்கப்படும் வகையில் சட்டம் கொண்டுவரப்பட்டது. இதனையடுத்து அவர்களுக்கு குடியுரிமை வழங்க வேண்டும் என்று எதிர்க்கட்சிகள் தரப்பில் போராட்டம் நடத்தப்பட்டது. இந்நிலையில் 23-ம் தேதி ஜார்கண்ட் மாநில தேர்தல் முடிவுகள் வெளியாகியது. பா.ஜனதா தோல்வி அடைந்துள்ளது. இதற்கு குடியுரிமை சட்டம்தான் காரணம் என்று எதிர்க்கட்சிகளால் விமர்சனம் செய்யப்படுகிறது. இதுதொடர்பான உண்மையென்பதை தி மெட்ராஸ் போஸ்ட் தேர்தல் ஆணையத்தின் தரவுகளை கொண்டு ஆய்வு செய்துள்ளது.

ஜார்கண்ட் தேர்தல் நடந்தது எப்போது?

பா.ஜனதா ஆட்சியிலிருந்த ஜார்கண்ட் மாநிலத்தில் 2019 சட்டமன்றத் தேர்தல் 5 கட்டங்களாக நடைபெற்றது. நவம்பர் 30, டிசம்பர் 7, 12, 16, 20 ஆகிய தேதிகளில் முறையே 13, 20, 17, 15, 16 தொகுதிகளுக்கு தேர்தல் நடைபெற்றது. வாக்கு எண்ணிக்கையில் பா.ஜனதா ஆட்சியை இழந்தது. அக்கட்சி 25 தொகுதிகளில் மட்டும் வெற்றிப்பெற்றது. ஜார்கண்ட் முக்தி மோர்ச்சா, காங்கிரஸ், ராஷ்டீரிய ஜனதா தளம் இணைந்த கூட்டணி 47 தொகுதிகளில் வென்றது.

2019 நாடாளுமன்றத் தேர்தலுக்கு பின்னர் நடைபெற்ற அரியானா, மராட்டிய மாநில சட்டமன்றத் தேர்தல்களில் பா.ஜனதா தனிப்பெரும் கட்சியானது. ஆனால், ஜார்கண்ட் மாநிலத்தில் இரண்டாம் இடத்திற்கு தள்ளப்பட்டது. மத்திய அரசு குடியுரிமை திருத்தச் சட்ட திருத்த மசோதாவை 9-ம் தேதி மக்களவையிலும், 11-ம் தேதி மாநிலங்களவையில் நிறைவேற்றியது. இதன்பின்னர் ஜார்கண்ட் மாநிலத்தில் மூன்று கட்டங்களாக தேர்தல் நடைபெற்றது. அதாவது 48 தொகுதிகளில் தேர்தல் நடைபெற்றது. இந்த 48 தொகுதிகளில் பா.ஜனதாவின் வெற்றி மற்றும் தோல்வியை கடந்த 2014 தேர்தலுடனும், மத்திய அரசு குடியுரிமை சட்டத்தை கொண்டுவருவதற்கு முன்னதாக தேர்தலை எதிர்க்கொண்ட 33 தொகுதி (முதல் இரண்டு கட்டம்) முடிவுகளுடனும் ஆய்வு செய்து, இத்தகவல் வெளியிடப்பட்டுகிறது.

முன்னதாக மாநிலத்தில் கூட்டணியை பற்றி தெரிந்துக்கொள்வோம்

மாநிலத்தில் ஆளும் கட்சியாக இருந்த பா.ஜனதா, இதுவரையில் அனைத்து ஜார்கண்ட் மாணவ சங்க கட்சியுடன் கூட்டணி வைத்து போட்டியிட்டது. ஆனால், இம்முறை கூட்டணி வைக்கவில்லை. மாணவ சங்க கட்சியின் தரப்பில் 20 தொகுதிகள் கேட்கப்பட்டது. ஆனால், பா.ஜனதா 15 தொகுதிகள் மட்டுமே கொடுக்க சம்மதித்தது. இறுதியில் கூட்டணி உடைந்து இருதரப்பும் தனித்தனியாக போட்டியிட்டது. இது கட்சியின் வெற்றியை பாதிக்கும் என சில பா.ஜனதா தலைவர்கள் எச்சரித்து உள்ளனர். ஆனாலும், பா.ஜனதா தனித்து போட்டியிட துணிந்தது. மராட்டியத்தில் சிவசேனா செய்த டார்ச்சர்கூட இதற்கான காரணமாக சொல்லப்படுகிறது. மறுபுறம் காங்கிரஸ் அம்மாநில கட்சியான ஜார்கண்ட் முக்தி மோர்ச்சா, பீகார் எல்லையை ஒட்டிய தொகுதிகளில் கணிசமான வாக்கு வங்கியை கொண்ட லாலுவின் ராஷ்டீரிய ஜனதா தளம் கட்சியுடன் கூட்டணி அமைத்தது. பா.ஜனதா கூட்டணி உடைந்த நிலையில், எதிர்க்கட்சிகள் மகா கூட்டணியை மேலும் வலுப்படுத்தின. இதற்கிடையே ஜார்கண்ட் முக்தி மோர்ச்சா கட்சியின் செயல் தலைவர் ஹேமந்த் சோரன் பழங்குடியின மக்களை குறிவைத்து உள்ளூர் பிரச்சினைகளை முன்வைத்து பிரசாரங்களை மேற்கொண்டார். குடியுரிமை சட்டம் பா.ஜனதாவின் வெற்றியை பறித்ததா? என்பதை பார்க்கலாம்.

கடந்த 2014 ஜார்கண்ட் தேர்தலில் பா.ஜனதா, அனைத்து ஜார்கண்ட் மாணவ சங்க கட்சி கூட்டணியாக போட்டியிட்ட போது 42 தொகுதிகளை வென்றது. அதாவது, பா.ஜனதாவுக்கு 37 தொகுதிகளும், அனைத்து ஜார்கண்ட் மாணவ சங்க கட்சிக்கு 5 தொகுதிகளும் கிடைத்தது.

48 தொகுதிகளில் முடிவு எப்படி?

குடியுரிமை சட்டம் விவகாரம் தொடர்பாக எதிர்க்கட்சிகளின் குற்றச்சாட்டுகளுக்கு பா.ஜனதா பதிலடி கொடுத்து பிரசாரம் செய்தபோது தேர்தல் நடைபெற்ற 48 தொகுதிகளில் (கடைசி மூன்று கட்டம்) 19 தொகுதிகள் பா.ஜனதாவுக்கு சென்றது. காங்கிரஸ் கூட்டணிக்கு 24 தொகுதிகளையும், அனைத்து ஜார்கண்ட் மாணவ சங்கம் கட்சி 2 தொகுதிகளிலும் வென்றது. மற்றவை 3 தொகுதிகளைப் பெற்றுள்ளன. கடந்த 2014-ம் ஆண்டு ஜார்கண்ட் மாநிலத்தில் பா.ஜனதா, அனைத்து ஜார்கண்ட் மாணவ சங்க கட்சியுடன் கூட்டணி அமைத்து போட்டியிட்ட போது இந்த 48 தொகுதிகளில் 25 தொகுதிகளை வெற்றன. அதாவது, பா.ஜனதா 23 தொகுதிகளை வென்றிருந்தது, அதன் கூட்டணி கட்சியான அனைத்து ஜார்கண்ட் மாணவ சங்க கட்சி 2 இடங்களில் வென்றிருந்தது.

இப்போது பா.ஜனதா 19 தொகுதிகளில் வென்றுள்ளது. அதன்வசமிருந்த 6 தொகுதிகளை இழந்துள்ளது. மறுபுறம் அனைத்து ஜார்கண்ட் மாணவ சங்கம் கட்சி இரண்டு இடங்களை வென்றது. இப்போது இந்த 48 தொகுதிகளில் காங்கிரஸ் கூட்டணி வெற்றிப்பெற்ற 24 தொகுதிகளில் 8 தொகுதிகளில் பா.ஜனதாவின் வெற்றி வாய்ப்புகளை பறித்துள்ளது அனைத்து ஜார்கண்ட் மாணவ சங்க கட்சி. அனைத்து ஜார்கண்ட் மாணவ சங்க கட்சி வாக்குகளை பிரித்ததால் 6 தொகுதிகளை இழந்ததுடன், கூடுதலாக இரண்டு தொகுதிகளில் வெற்றிவாய்ப்பையும் பறிகொடுத்துள்ளது.


8 தொகுதிகளில் வாக்கு விபரம்:-


தும்ரி தொகுதி:-
ஜார்கண்ட் முக்தி மோர்ச்சா 71128
அனைத்து ஜார்கண்ட் மாணவர் சங்கம் கட்சி 36840
பா.ஜனதா 36013


மதுபூர் தொகுதி:-
ஜார்கண்ட் முக்தி மோர்ச்சா 88115
பா.ஜனதா 65046
அனைத்து ஜார்கண்ட் மாணவர் சங்கம் கட்சி 45620


காண்டே தொகுதி:-
ஜார்கண்ட் முக்தி மோர்ச்சா 65023
பா.ஜனதா 56168
அனைத்து ஜார்கண்ட் மாணவர் சங்கம் கட்சி 15361


நாளா தொகுதி:-
ஜார்கண்ட் முக்தி மோர்ச்சா 61356
பா.ஜனதா 57836
அனைத்து ஜார்கண்ட் மாணவ சங்கம் கட்சி 16778


பாகூர் தொகுதி:-
காங்கிரஸ் 128218
பா.ஜனதா 63110
அனைத்து ஜார்கண்ட் மாணவ சங்கம் கட்சி 39444


ராம்கார்க் தொகுதி:-
காங்கிரஸ் – 99944
அனைத்து ஜார்கண்ட் மாணவர் சங்கம் கட்சி 71226
பா.ஜனதா கட்சி – 31874


இச்சாகார்க் தொகுதி:-
ஜார்கண்ட் முக்தி மோர்ச்சா 57546
அனைத்து ஜார்கண்ட் மாணவர் சங்கம் கட்சி 38836
பா.ஜனதா 38485


கைஜிரி தொகுதி:-
காங்கிரஸ் 83829
பா.ஜனதா 78360
அனைத்து ஜார்கண்ட் மாணவர் சங்கம் கட்சி 29091


முதல் இரண்டு கட்டங்கள் ஒருபார்வை

குடியுரிமை சட்டம் கொண்டுவருவதற்கு முன்னதாக 33 தொகுதிகளில் இரண்டு கட்டங்களாக தேர்தல் நடைபெற்றது. இந்த தொகுதிகளில் 14 தொகுதிகளை 2014-ம் ஆண்டு தேர்தலில் பா.ஜனதா வென்றிருந்தது. இப்போது இதில் 6 தொகுதிகளை மட்டும் வென்றுள்ளது. குடியுரிமை சட்டம் கொண்டுவருவதற்கு முன்னதாக தேர்தல் நடந்த இப்பகுதிகளில் 8 தொகுதிகளை பா.ஜனதா இழந்துள்ளது. இதிலும் ஆறு தொகுதிகளில் பா.ஜனதாவின் வெற்றி வாய்ப்பை அனைத்து ஜார்கண்ட் மாணவ சங்க கட்சி பறித்துள்ளது. லாகர்தாகா, காட்சிலியா, ஜக்சாலை, ஜெகன்நாத்பூர், சக்ரதார்பூர், தாமர் தொகுதிகளில் பா.ஜனதாவின் வெற்றிக்கு மாணவ சங்கம் கட்சி வேட்டு வைத்துள்ளது. இதுபோக, ஜாம்செட்பூர் கிழக்கு தொகுதியில் முதல்வர் ரகுபர் தாஸ் தோல்வியை தழுவினார். அவர் முன்னாள் பா.ஜனதா மந்திரி சரயு ராயிடம் தோல்வியை தழுவினார். இங்கு அனைத்து ஜார்கண்ட் மாணவ சங்க கட்சி போட்டியிடவில்லை. ஆக மொத்தம் 7 தொகுதிகளில் பா.ஜனதாவின் வெற்றிவாய்ப்பு சரிந்துள்ளது.

இதுபோக பெரும்பாலான தொகுதிகளில் (பா.ஜனதா வெற்றிபெற்ற தொகுதிகளிலும்) அனைத்து ஜார்கண்ட் மாணவ சங்கம் கட்சி வாக்குகளை வெகுவாக பிரித்துள்ளது. பா.ஜனதா கூட்டணியை தக்க வைத்து இருந்தால் 45 தொகுதிகளுக்கு மேல் வெற்றைபெற்றிருக்கலாம் என்பது ஆய்வில் தெரியவந்துள்ளது. நாடாளுமன்றத் தேர்தலில் இருந்து மாநில சட்டமன்றங்களுக்கான தேர்தல் மாறுப்பட்டது. இதனை இந்திய வாக்காளார்கள் மிகவும் தெளிவாக புரிந்து வைத்துள்ளனர். இதே ஜார்கண்ட் மாநிலத்தில் மே மாதம் நடந்த 2019 நாடாளுமன்றத் தேர்தலில் பா.ஜனதா 12 இடங்களில் வென்றது. அப்போது அனைத்து ஜார்கண்ட் மாணவ சங்கம் கட்சியுடன் பா.ஜனதா கூட்டணியில் இருந்தது. பா.ஜனதா தலைவர்களின் பிரசாரம் பெரும்பாலும் தேசிய அரசியலை மையமாக வைத்து அமைந்தது. மறுபுறம் ஜார்கண்ட் முக்தி மோர்ச்சா பழங்குயிடின மக்களை நாடியது. புள்ளிவிபரங்களையும், முந்தைய தேர்தல் முடிவுகளையும் பார்க்கையில் பா.ஜனதாவின் வெற்றி வாய்ப்புக்கு உள்மாநில பிரச்சினைகளும், கூட்டணியமைப்பில் வியூக தோல்வியும் காரணமாக அமைந்திருக்கிறது என்பது தெரிகிறது. எதிர்க்கட்சிகள் சொல்வது போன்று குடியுரிமை சட்டமும், என்.ஆர்.சி.யும் தாக்கத்தை ஏற்படுத்தியதாக தெரியவில்லை. மாநிலத்தில் பா.ஜனதா அதிகமான வாக்குகள் வித்தியாசத்திலும் வெற்றியை பதிவு செய்துள்ளது.

அக்கட்சியின் வாக்கு விகிதமும் கணிசமாகவே உயர்ந்து உள்ளது. 2014 தேர்தலில் பா.ஜனதா, அனைத்து ஜார்கண்ட் மாணவ சங்கம் கட்சியுடன் இணைந்து போட்டியிட்ட போது 42 தொகுதிகளில் வென்றது. அப்போது, 35 சதவீத வாக்குகள் பா.ஜனதா கூட்டணிக்கு கிடைத்தது. பா.ஜனதாவுக்கு 31 சதவீதமும், அனைத்து ஜார்கண்ட் மாணவ சங்க கட்சிக்கு 4 சதவீதமும் கிடைத்தது. இப்போது இருதரப்புமே அதிகமான வாக்கு வங்கியை காட்டுகின்றன. பா.ஜனதா 33.4 சதவீதமும், அனைத்து ஜார்கண்ட் மாணவ சங்கம் கட்சி 8.1 சதவீதமும் வாக்குகளை பெற்றுள்ளது. கூட்டணி அமைப்பில் பா.ஜனதா தோல்வியை தழுவியதே பெரும் தோல்வியாக பார்க்கப்படுகிறது. எதிர்க்கட்சிகள் வரிசையில் பெரும்பாலும் யாரும் அதிகமான வாக்குகள் வித்தியாசத்தில் வெற்றியை பதிவு செய்யவில்லை.

பா.ஜனதாவிற்கு தவறாக சென்றது என்ன?

ஜார்கண்ட் முடிவு பாஜகவை கவலைப்பட வேண்டிய ஒரு புதிய விவகாரத்தை அடிக்கோடிட்டுக் காட்டுகிறது. கூட்டணி கட்சிகளை தக்க வைத்திருப்பதில் அடிவாங்குவது தற்போதைய தேர்தல் தோல்வியை காட்டுகிறது. ஜார்கண்டில் ஜார்கண்ட் முக்தி மோர்ச்சா, மராட்டியத்தில் தேசியவாத காங்கிரஸ், சிவசேனா போன்ற மாநில கட்சிகள் பா.ஜனதாவிற்கு செக் வைக்கும் விதமாக செயல்பட்டுள்ளது. இந்நிலையில் பிற கூட்டணிகளை இணைப்பதில் பா.ஜனதா வியூக தோல்வியை தழுவியுள்ளது என்பது தெரிகிறது. மாநில முதல்வர் ரகுபர் தாசின் ஆணவப்போக்கும், பழங்குடியின மக்களின் கோபமும் பா.ஜனதாவிற்கு எதிராகவும் அமைந்துள்ளது.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %