#CAAProtests சுய பரிசோதனை செய்து கொள்ள வேண்டும் – பிரதமர் மோடி அறிவுரை

Read Time:2 Minute, 50 Second

குடியுரிமை சட்டத்திற்கு எதிராக போராட்டம் என்ற பெயரில் வன்முறையில் ஈடுபட்டவர்கள் தங்களை சுயபரிசோதனை செய்து கொள்ள வேண்டும் என்று பிரதமர் மோடி வலியுறுத்தியுள்ளார்.

மத்திய அரசின் குடியுரிமை சட்டத்திற்கு எதிராக இந்தியா முழுவதும் எதிர்க்கட்சிகளால் போராட்டம் நடத்தப்பட்டது.

இதில் உயிரிழப்பு சம்பவங்களும், பொதுச்சொத்துக்கள் சேதப்படுத்தப்பட்ட வன்முறை சம்பவங்களும் நடைபெற்றது. இந்தியா முழுவதும் போர்க்களமாக காட்சியளித்தது. தற்போது, போராட்டங்கள் நின்று அமைதி நிலவுகிறது.


பா.ஜனதா ஆட்சி செய்யும் உத்தரபிரதேசம் மாநிலத்தில் போராட்டத்தின்போது பெரும் வன்முறை சம்பவங்கள் அரங்கேறியது. 18 பேர் மாநிலத்தில் உயிரிழந்துள்ளனர். போலீசாரும், பொதுமக்களும் காயம் அடைந்து சிகிச்சை பெற்று வருகிறார்கள்.


மாநிலத்தில் தீ வைப்பு சம்பவங்கள் மூலம் பொதுச்சொத்துக்கள் பெரிதும் சேதப்படுத்தப்பட்டது. 5400 பேரை காவல்துறை காவலில் எடுத்துள்ளது, 700க்கும் அதிகமானோரை சிறைக்கு அனுப்பியுள்ளது.


250க்கும் அதிகமானோர் மீது தேசிய பாதுகாப்பு சட்டம் பாய்ந்துள்ளது. பொது சொத்துக்களை சேதப்படுத்தியவர்களிடம் அபராதம் வசூலிக்கும் நடவடிக்கையும் முன்னெடுக்கப்பட உள்ளது.


இந்தநிலையில் லக்னோவில் முன்னாள் பிரதமர் வாஜ்பாய் பிறந்தநாளான டிசம்பர் 25-ம் தேதி அடல் பிகாரி வாஜ்பாய் மருத்துவ பல்கலைக்கழகத்துக்கு பிரதமர் மோடி அடிக்கல் நாட்டினார்.


பிரதமர் மோடி பேசுகையில், உத்தரப்பிரதேசத்தில் போராட்டம் என்ற பெயரில் வன்முறையில் ஈடுபட்டவர்கள் தங்களை சுயபரிசோதனை செய்து கொள்ள வேண்டும். தாங்கள் செய்தது சரியா? அல்லது தவறா? என்பதை எண்ணி பார்க்க வேண்டும். வன்முறையை கைவிட்டு தங்கள் வீடுகளுக்கு சென்று யோசிக்க வேண்டும்.


தங்கள் சேதப்படுத்திய அரசு பேருந்தகள் உள்ளிட்ட பொது சொத்துக்கள் நமது எதிர்கால சந்ததியினருக்கு சொந்தமானது. நாடுமுழுவதும் அமைதி நிலவ வேண்டும் என்பது நம்முடைய விருப்பம். சட்டம் ஒழுங்கை மதிக்க வேண்டும். அதன்மூலமே நமது பாதுகாப்பை நாம் உறுதி செய்ய முடியும் என்றார்.