#IranvsUSA மத்திய கிழக்கில் போர் மேகம்…. அமெரிக்க படைகளை குறிவைத்து ஈரான் ஏவுகணைகள் வீச்சு

Read Time:4 Minute, 0 Second

ஈராக்கில் உள்ள அமெரிக்க விமானப்படை தளங்களை குறிவைத்து ஈரான் ஏவுகணைகளை வீசியுள்ளதாக செய்திகள் வெளியாகியுள்ளது.

அணுசக்தி ஒப்பந்தம் தொடர்பான விவகாரத்தில் அமெரிக்காவுக்கும், ஈரானுக்கும் இடையே மோதல் வெடித்தது. இந்த மோதல் காரணமாக ஈரானின் மீது பொருளாதார தடையை வரிசையாக அடுக்கிய அமெரிக்கா அந்நாட்டின் புரட்சிகர ராணுவ படையை பயங்கரவாத அமைப்பாக அறிவித்தது. இதற்கு பதிலடியாக அமெரிக்காவை பயங்கரவாத ஆதரவு நாடு என்றும் தங்கள் பிராந்தியத்துக்குள் இருக்கும் அமெரிக்க வீரர்களை பயங்கரவாதிகளாகவும் ஈரான் அறிவித்தது.

இந்த சூழலில் கடந்த வெள்ளிக்கிழமை ஈராக்கில் அமெரிக்க ராணுவம் நடத்திய வான்தாக்குதலில் ஈரான் ராணுவ தளபதி காசிம் சுலைமானி கொல்லப்பட்டார். இதனால் இருநாடுகளுக்கும் இடையே போர் மூளும் அபாயம் ஏற்பட்டு உள்ளது. சுலைமானி கொலைக்கு காரணமான அமெரிக்க ராணுவத்தை பயங்கரவாத இயக்கமாக ஈரான் அறிவித்துள்ளது.

ஈரான் தாக்குதல்

இந்நிலையில் ஈராக்கில் உள்ள அமெரிக்க விமானப்படை தளங்களை குறிவைத்து ஈரான் ஏவுகணைகளை வீசியுள்ளதாக செய்திகள் வெளியாகியுள்ளது. ஈராக்கில் ஐ.எஸ். பயங்கரவாதிகளை அழிப்பதற்காக வந்த அமெரிக்கா ராணுவதளங்களை அமைத்தது. விமானப்படை தளங்களையும் கட்டமைத்தது. அங்கேயே அந்நாட்டு அதிகாரிகள் மற்றும் படை வீரர்கள் முற்றுகையிட்டனர். சுலைமானி கொல்லப்பட்ட பின்னர் அவர்கள் உஷார் நிலைப்படுத்தப்பட்டனர். இந்நிலையில் ஈராக்கில் அமெரிக்க படைகள் மையம் கொண்டிருந்த இரண்டு விமானப்படை தளங்களில் ஈரான் ஏவுகணைகளை வீசியுள்ளது, சுமார் 12க்கும் அதிகமான ஏவுகணைகள் தாக்கியுள்ளது என அமெரிக்க பாதுகாப்புத்துறை வெளியிட்டுள்ள செய்தியில் குறிப்பிடப்பட்டுள்ளது. இர்பில் மற்றும் அல் அசாத்தில் தாக்குதல் நடத்தப்பட்டுள்ளது. ஆனால், உயிரிழப்புக்கள் குறித்து எந்தஒரு தகவலும் இல்லையென பெண்டகன் கூறியுள்ளது.

பயங்கரவாத அமைப்பாக அறிவிப்பு

அமெரிக்காவை பயங்கரவாத ஆதரவு நாடாக அறிவித்து கடந்த ஆண்டு ஏப்ரல் மாதம் கொண்டு வரப்பட்ட சட்டத்தில் திருத்தம் செய்து, நாடாளுமன்றத்தில் மசோதா தாக்கல் செய்யப்பட்டது. இந்த மசோதா அமோக ஆதரவுடன் நிறைவேற்றப்பட்டது. அந்த மசோதாவில் அமெரிக்க படைகள், அதனை சார்ந்த அனைத்து அமைப்புகள், ஊழியர்கள், ஒப்பந்தக்காரர்கள் மற்றும் சுலைமானியை கொல்ல உத்தரவிட்டவர்கள் அனைவரும் பயங்கரவாதிகள் என குறிப்பிடப்பட்டுள்ளது. மேலும் இவர்களுக்கு ராணுவம், நுண்ணறிவு, நிதி, தொழில்நுட்பம் உள்ளிட்ட வகைகளில் உதவி செய்வது பயங்கரவாதத்துக்கு துணைபோகும் செயலாகவே கருதப்படும் எனவும் மசோதாவில் தெரிவிக்கப்பட்டுள்ளது.

இதற்கிடையே ஈராக்கில் இருந்து அமெரிக்க படைகளை வெளியேற்ற அந்த நாட்டு நாடாளுமன்றத்தில் தீர்மானம் நிறைவேற்றப்பட்டுள்ளது. ஆனால், அமெரிக்கா பொருளாதார தடை என மிரட்டல் விடுத்துள்ளது.

ஈராக்கிலிருந்து படைகள் வெளியேறுவது குறித்து அமெரிக்கா எந்த முடிவும் எடுக்கவில்லை.