#JNU ‘பல்கலைக்கழகத்தை வைத்து அரசியல் செய்யாதீர்கள்’ கனிமொழிக்கு துணைவேந்தர் பதில்

Read Time:2 Minute, 20 Second

டெல்லி ஜவஹர்லால் நேரு பல்கலைக்கழகத்தில் விடுதிக் கட்டண உயர்வு உள்ளிட்ட பிரச்சினைகளுக்காக போராட்டம் நடைபெற்று வந்தது. இந்நிலையில் ஞாயிற்றுக்கிழமை இரவு முகத்தில் துணியை கட்டிக் கொண்டு வந்த நபர்கள் மாணவர்கள் மீதும் ஆசிரியர்கள் மீதும் சரமாரியாக தாக்குதல் நடத்தினர். இதில் ஜவஹர்லால் நேரு பல்கலைக்கழக மாணவர் பேரவைத் தலைவர் ஆயிஷ் கோஷின் மண்டை உடைந்தது.

இந்த தாக்குதலில் காயம் அடைந்த 35 பேர் டெல்லி எய்ம்ஸ் மருத்துவமனையில் அனுமதிக்கப்பட்டு உள்ளனர். இந்த தாக்குதலை ஏபிவிபி மாணவர்கள் அமைப்புதான் நடத்தியுள்ளது என குற்றம் சாட்டப்படுகிறது.
இதுதொடர்பாக விசாரணை நடைபெற்று வருகிறது. மாணவர்கள் மீதான தாக்குதலுக்கு பிரபலங்கள், அரசியல் தலைவர்கள் கடும் கண்டங்களை தெரிவித்து வருகின்றனர். பல்கலைக்கழகத்தில் தாக்குதல் நடந்த சம்பவத்தில், துணைவேந்தர் ஜெகதீஷ் குமார் மீது அதிருப்தி நிலவுகிறது. அவர் பதவி விலக வேண்டும் என்ற கோரிக்கையும் வலுத்துள்ளது.

இந்நிலையில் காங்கிரசின் உண்மை அறியும் குழுவும், திமுக எம்.பி. கனிமொழியும் பல்கலைக்கழகத்திற்கு சென்றுள்ளது. கனிமொழி மாணவர்களுக்கு ஆதரவை தெரிவித்தார். இதற்கிடையே டுவிட்டரிலும் தகவல்களை வெளியிட்டார். அதில், மதவாதத்தின் கோரத் தாண்டவம் எப்படி இருக்கும் என்பதற்கான சாட்சியே மாணவர்கள் மீதான தாக்குதல் என சாடியிருந்தார்.

இந்நிலையில் கனிமொழி மற்றும் காங்கிரஸ் உண்மை அறியும் குழு ஜேஎன்யுக்கு வந்தது தொடர்பாக விமர்சனத்தை முன்வைத்துள்ள துணைவேந்தர் ஜெகதீஷ் குமார், “தயவுசெய்து எங்கள் பல்கலைக்கழகத்தை அரசியலாக்க வேண்டாம். தயவுசெய்து எங்களை தனியாக விட்டுவிடுங்கள், எங்கள் வேலையை நாங்கள் செய்வோம்” என்று கூறியுள்ளார்.