#Coronavirus பாதிப்பு குறித்து தெரிந்துக்கொள்ள வேண்டியவை… எப்படி தப்பிக்கலாம்…

Read Time:6 Minute, 20 Second
Page Visited: 38
#Coronavirus பாதிப்பு குறித்து தெரிந்துக்கொள்ள வேண்டியவை…  எப்படி தப்பிக்கலாம்…

சீனாவில் பெரும் அச்சுறுத்தலை ஏற்படுத்தியுள்ள கொரோனா வைரஸ் உலக நாடுகளை பெரும் அச்சுறுத்தலுக்கு உள்ளாக்கியுள்ளது. ஒருவரிடமிருந்து மற்றொருவருக்கு பரவும் தன்மைக்கொண்ட இவ்வைரஸ் பாதிப்பு அதிகமாக காணப்படுகிறது. சீனாவை தொடர்ந்து அமெரிக்கா, சவுதி அரேபியா, ஜப்பான், தென் கொரியா, தைவான், தாய்லாந்து உள்ளிட்ட நாடுகளில் வைரஸ் பாதிப்பு இருப்பது தெரியவந்துள்ளது.

2002-03 ம் ஆண்டுகளில் உலகம் முழுவதும் சார்ஸ் வைரஸ் பரவியது. சீனாவிலிருந்துதான் வேகமாக பரவியது. உலகம் முழுவதும் 750 பேர் உயிரிழந்தனர். அப்போது சீனாவில் 349 பேரும், ஹாங்காங்கில் 299 பேரும் பலியாகினர் என்பது குறிப்பிடத்தக்கது. இப்போது அதேபோன்று கொரோனா வைரஸ் சீனாவை ஆட்டிப்படைக்கிறது.

வைரஸ் பாதிப்பு அறிகுறிகள்: ஜலதோஷம், தும்மல், தொண்டை வலி, தலைவலி மற்றும் காய்ச்சல் வைரஸ் தாக்குதலுக்கு அடிப்படை அறிகுறியாக உள்ளது. பின்னர் நோய் எதிர்ப்பு சக்தியை உறிஞ்சி உயிரிழப்பை ஏற்படுத்துகிறது.

எப்படி பரவுகிறது:
இவ்வகை வைரஸ் விலங்குகளிடம் இருந்து மனிதர்களுக்கு பரவுகிறது. சீனாவில் கடல் உணவு வர்த்தக மையத்திலிருந்து வைரஸ் பரவியிருக்கிறது. பாம்புகளில் இருந்து மனிதர்களுக்கு பரவியிருப்பதாக கூறப்படுகிறது. மனிதர்களிடமும் பரவுகிறது. தும்முதல், தொடுதல் மற்றும் கைகளை குலுக்குவதன் மூலமாகவே எளிதாக வைரஸ் பரவுகிறது.

உயிரை பறிக்கிறது:
மூக்கு மற்றும் வாய் வழியாக உடலுக்குள் வைரஸ் செல்கிறது. அங்கு, சுவாச மண்டலத்தின் செல்களை தாக்குகிறது. நுரையீரலை தாக்கும் வைரஸ் வீக்கத்தை ஏற்படுத்துகிறது. நிமோனியா காய்ச்சலை உண்டாக்குகிறது. சுவாச மண்டலத்தின் செல்களிலும் வீக்கத்தை ஏற்படுத்தி சுவாசிக்க முடியாமல் செய்து உயிரை பறிக்கிறது. நோய் எதிர்ப்பு சக்தி குறைவாக கொண்டவர்களை எளிதாக வேட்டையாடுகிறது.

மருந்து கிடையாது:இந்த வைரஸ் பாதிப்பிற்கு மருந்துகள் எதுவும் கண்டுபிடிக்கப்படவில்லை. மருந்துகளை கண்டுபிடிக்கும் பணியில் உலக நாடுகள் தீவிரமாக ஈடுபட்டுள்ளன. ஆனால், அதற்கான ஆரம்ப தடயம் கிடைப்பதிலும் சிரமம் நிலவுகிறது. சீனாவின் தேசிய நுண்ணறிவியல் மையம் கரோனா வைரஸின் எலக்ட்ரான் மைக்ரோஸ்கோப் புகைப்படத்தை முதன்முதலாக வெளியிட்டுள்ளது.

பெரும்பாலான நேரங்களில் அறிகுறிகளாக செல்லப்படும் பாதிப்பு தாமாகவே போய்விடும். ஆனால், ஆரம்பத்திலே கவனிக்க வேண்டும் என்று உலக சுகாதாரத்துறை வல்லுநர்கள் அறிவுறுத்துகிறார்கள். அறிகுறிகள் மோசமான நிலையை அடையும் முன்னதாக மருத்துவர்களை அணுக வேண்டும் என்கிறார்கள். வலி அல்லது காய்ச்சல் மருந்துகளை பரிந்துரைப்பதன் மூலம் மருத்துவர்கள் அறிகுறிகளைப் போக்கலாம். ஏராளமான திரவ ஜூஸ்களை குடிக்கவும், ஓய்வெடுக்கவும், முடிந்தவரை நன்றாக தூங்கவும் என்கிறார்கள்.

வைரஸ் பாதிப்பை எவ்வாறு தடுக்கலாம்?

சார்ஸ் வைரஸ்களின் குடும்பத்திலிருந்து பாதுகாக்க தடுப்பூசி எதுவும் கிடையாது. அமெரிக்க தேசிய சுகாதார நிறுவனம் புதிய வைரசுக்கு எதிரான தடுப்பூசி ஒன்றை உருவாக்கி வருகிறது. ஆனால், மருத்துவ பரிசோதனைகள் நடைபெறுவதற்கு மாதங்கள் அல்லது வருடங்கள் ஆகலாம். நோய்வாய்ப்பட்டவர்களை நெருங்குவதை தவிர்ப்பதன் மூலம் தொற்றை குறைக்க முடியும். உங்கள் கண்கள், மூக்கு மற்றும் வாயை தொடுவதை தவிர்க்க முயற்சி செய்யுங்கள்.

சோப்பு மற்றும் தண்ணீரில் உங்கள் கைகளை அடிக்கடி கழுவவும், குறைந்தது 20 விநாடிகள் கழுவவும்.

விழிப்புணர்வு முக்கியமானது. நீங்கள் நோய்வாய்ப்பட்டிருந்தாலோ, சீனாவின் வூஹான் பகுதிக்கு பயணம் செய்திருந்தாலோ, அங்கு இருந்த ஒருவருடன் தொடர்பு கொண்டிருந்தாலோ, கொரோனா வைரஸ் பாதிக்கப்பட்டு இருக்கலாம் என நம்பினாலோ மருத்துவரை உடனடியாக தொடர்பு கொண்டு சிகிச்சை பெற வேண்டும். நீங்கள் இரும்பும் போது அல்லது தும்மும்போது உங்கள் வாய் மற்றும் மூக்கை மூடிக்கொள்ளுங்கள். முறையான சிகிச்சை பெறாவிட்டால் பாதிப்புக்கு உள்ளானவர்கள் உயிரிழக்க நேரிடும் என சுகாதாரத்துறை அதிகாரிகள் எச்சரிக்கின்றனர். வைரஸிலிருந்து தற்காத்துக்கொள்ள சுவாச முகமூடிகளை அணிந்துக்கொள்ளலாம்.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %