குட்பை… டென்னிஸிலிருந்து விடை பெற்றார் ரஷிய புயல் மரிய ஷரபோவா…!

Read Time:5 Minute, 14 Second
Page Visited: 155
குட்பை… டென்னிஸிலிருந்து விடை பெற்றார் ரஷிய புயல் மரிய ஷரபோவா…!

17 வயதில் விம்பிள்டன் பட்டம் வென்ற ரஷிய புயல் மரிய ஷரபோவா சர்வதேச டென்னிசில் இருந்து விடைபெற்றுள்ளார்.

உலகின் சிறந்த டென்னிஸ் வீராங்கனைகளில் ஒருவராக வலம் வந்த ‘ரஷிய புயல்’ வீராங்கனை மரிய ஷரபோவா. முன்னாள் நம்பர் ஒன் வீராங்கனையான 32 வயதான ஷரபோவா 5 கிராண்ட்ஸ்லாம் பட்டம் வென்ற சாதனையாளர் ஆவார்.

2004-ம் ஆண்டு ஷரபோவா தனது 17-வது வயதில் டென்னிஸ் மைதானத்தை அதர்க்களம் செய்து அப்போதைய முன்னணி வீராங்கனையான செரீனா வில்லியம்சை நேர் செட்டில் தோற்கடித்து விம்பிள்டன் பட்டத்தை வென்று அனைவரது கவனத்தையும் ஈர்த்தார்.

இதனை தொடர்ந்து 2006-ம் ஆண்டு அமெரிக்க ஓபனிலும், 2008-ல் ஆஸ்திரேலிய ஓபனிலும், 2012 மற்றும் 2014-ம் ஆண்டுகளில் பிரெஞ்ச் ஓபனிலும் வெற்றி மகுடம் சூடினார். விளம்பர படங்களிலும், டென்னிசிலும் கொடிகட்டி பறந்த ஷரபோவா அதிக வருவாய் ஈட்டும் வீராங்கனையாக அடையாளம் காணப்பட்டார்.

தோள்பட்டை காயத்தால் அடிக்கடி அவதிப்பட்ட ஷரபோவா 2016-ம் ஆண்டு ஆஸ்திரேலிய ஓபன் போட்டியின் போது ஊக்கமருந்து பயன்படுத்தியதாக சர்ச்சை எழுந்தது. இதய நோய் பிரச்சினைக்காக சாப்பிட்ட மருந்து, தடை செய்யப்பட்ட ஊக்கமருந்து பட்டியலில் இருந்ததை கவனிக்கவில்லை என்று அவர் தரப்பில் விளக்கம் அளித்தார். இருப்பினும் அவருக்கு 15 மாதங்கள் தடை விதிக்கப்பட்டது. தடை காலம் முடிந்து 2017-ம் ஆண்டில் அவர் மறுபிரவேசம் செய்தாலும், அதன் பிறகு அவரால் டென்னிசில் முன்புபோல் ஜொலிக்க முடியவில்லை.
சமீபத்தில் ஆஸ்திரேலிய ஓபனில் களம் இறங்கிய அவர் முதல் சுற்றுடன் நடையை கட்டினார். தொடர்ச்சியான தோல்வி எதிரொலியாக தரவரிசையிலும் 373-வது இடத்துக்கு தள்ளப்பட்டார்.

அழகு, நளினமான ஆட்டம் மூலம் கோடிக்கணக்கான ரசிகர்களின் கனவு கன்னியாக திகழ்ந்தவர் ஷரபோவா. டென்னிசிலிருந்து விடைபெறுவது தொடர்பாக கூறுகையில், ‘என்னுடைய வாழ்க்கையை டென்னிஸ் விளையாட்டுக்காக அர்ப்பணித்தேன். அந்த டென்னிஸ் எனக்கு வாழ்க்கையை கொடுத்தது. ‘குட்பை’ சொல்வதன் மூலம் டென்னிசையும், நாள்தோறும் மேற்கொள்ளும் பயிற்சி முறைகள், முதல் பந்தை அடிக்கும் தருணம், பயிற்சியாளர் குழுவினர் என்று எல்லோரையும் இழக்கிறேன்.

டென்னிசில் எனது வெற்றிக்கு முக்கிய காரணம் என்னவென்றால் நான் ஒரு போதும் பின்னோக்கி பார்த்ததில்லை. முன்னோக்கியும் பார்த்ததில்லை. தொடர்ந்து முயற்சி செய்தால் உயர்ந்த இடத்துக்கு செல்ல முடியும் என்ற நம்பிக்கையுடன் செயல்பட்டேன்’ என்று குறிப்பிட்டு உள்ளார்.

கடந்த 1987-ம் ஆண்டு ஏப்ரல் 19-ம் தேதி ரஷ்யாவில் பிறந்த மரிய ஷரபோவா, கடந்த 1994-ம் ஆண்டில் அமெரிக்காவில் நிரந்தரக் குடியுரிமை பெற்று வசித்து வருகிறார். தனது 17-வது வயதில் கிராண்ட் ஸ்லாம் போட்டியில் விளையாடிய மரிய ஷரபோவா முதன்முதலாக விம்பிள்டனில் 2004-ம் ஆண்டு பட்டம் வென்றார்.
டபிள்யுடிஏ டென்னிஸ் உலகில் தனது 18-வது வயதிலேயே உலகின் மிகச்சிறந்த வீராங்கனை எனும் பெயரெடுத்து தரவரிசையில் ஷரபோவா முதலிடத்தைப் பெற்றார். இதுவரை 36 டபிள்யுடிஏ பட்டங்களையும், 4 ஐடிஎப் பட்டங்களையும் ஷரபோவா வென்றுள்ளார்.

நான் இப்போது திரும்பிப் பார்க்கிறேன். நான் டென்னிஸில் மிகப்பெரிய மலையை கடந்து வந்திருக்கிறேன். என்னுடைய பாதை முழுவதும் பள்ளத்தாக்குகளும், வேலிகளும் நிறைந்தவை. ஆனால் உச்சியிலிருந்து பார்த்தால் எனது பாதை நம்பமுடியாதவை’ எனவும் குறிப்பிட்டுள்ளார் ஷரபோவா.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %