மதுரையில் ரசாயனம் கலந்த 2 டன் மீன்கள் பறிமுதல்…!

Read Time:8 Minute, 14 Second

அசைவப்பிரியர்களின் உணவுப்பட்டியலில் பிரதான இடம்பிடிப்பது மீனாகும். மருத்துவர்களும் சத்தாண உணவு என பரிந்துரை செய்யும் மீன்கள் ரசாயனம் கலக்கப்பட்டு விஷமாக பல்வேறு இடங்களில் விற்பனைக்கு வருகிறது.

மதுரை நகரில் கரிமேடு மீன் மார்க்கெட் பிரபலமானது. இங்கு கடைகளில் விற்கப்படும் மீன்கள் சுகாதாரம் இன்றி இருப்பதாக கிடைத்த தகவலின்படி அதிகாரிகள் சோதனையை மேற்கொண்டதில் பல கடைகளில் வைத்திருந்த மீன்களுக்கு ரசாயன பொருட்கள் செலுத்தப்பட்டு இருந்தது தெரியவந்தது. அங்கு இரண்டு டன்னுக்கும் அதிகமான மீன்கள் பறிமுதல் செய்யப்பட்டன.

இது குறித்து மாவட்ட உணவு பாதுகாப்புத்துறை அதிகாரி சோமசுந்தரம் கூறும்போது, இதுபோன்ற நடவடிக்கைகள் இனி தொடர்ந்து நடைபெறும். மேலும், ரசாயனம் கலக்காத மீன்களை வாங்கி விற்குமாறு வியாபாரிகளுக்கு அறிவுரை வழங்கப்பட்டு உள்ளது. தற்போது கலப்படம் செய்த வியாபாரிகளுக்கு எச்சரிக்கை மட்டுமே விடுத்திருக்கிறோம். தொடர்ந்து இதுபோன்ற செயல்களில் ஈடுபட்டால் கடை உரிமம் ரத்து செய்யப்படும். கடைகளில் நடத்தப்பட்டது போல் மீன்களை ஏற்றி வரும் லாரிகளிலும் அதிகாரிகள் சோதனையில் ஈடுபடுவார்கள் என்றார். இச்சம்பவத்தை அடுத்து தமிழகம் முழுவதும் உள்ள மீன் மார்க்கெட்களில் சோதனையை மேற்கொள்ளுமாறு உணவுப்பாதுகாப்பு துறை அதிகாரிகளுக்கு தமிழக அரசு உத்தரவிட்டுள்ளது.

மீன்களை பிடிக்கும் போதே பார்மலின் ரசாயனம் கலந்த தண்ணீருக்குள் வைத்து பின்னர் ஐஸ் பெட்டிகளில் வைக்கின்றனர். இதற்கான ஐஸ் தயாரிக்கும் ஆலையில் சென்று பார்த்த போது, அதற்கான உப்புகளிலும் பார்மலின் கண்டுபிடிக்கப்பட்டது என தெரிவிக்கப்பட்டு உள்ளது.

இதுபோன்ற ரசாயனம் கலந்த மீன்களை சாப்பிட்டால் மூளை நரம்புகள் பாதிக்கப்படுவதோடு, கண் பார்வையையும் பாதிக்கும் என எச்சரிக்கிறார்கள் மருத்துவர்கள். புற்றுநோயையும் ஏற்படுத்தும்; இவற்றை கர்ப்பிணிகளும் சாப்பிட கூடாது, அவர்களுக்கு மிகவும் பாதிப்பு நேரிடும். “உணவுப்பொருட்களை பதப்படுத்த பார்மலின் பயன்படுத்தக்கூடாது. இதனால் நுரையீரல் பாதிக்கப்படவும் வாய்ப்பு உள்ளது. பார்மலின் நாம் சாப்பிடக்கூடாத பொருளாகும். இதனால், புற்றுநோய் ஏற்படவும் வாய்ப்புகள் அதிகம் என ஆய்வுகளிலும் தெரியவந்து உள்ளது.” என மருத்துவர்கள் எச்சரிக்கிறார்கள்.

இதற்கிடையே கரிமேடு கடைக்காரர்கள் நாங்கள், மீன்களில் ரசாயனம் கலப்பது இல்லை என்றும் வெளி மாநிலங்களில் இருந்து வரும் மீன்களில்தான் கலக்கப்பட்டு இருக்க வாய்ப்பு உள்ளது எனவும் தெரிவிக்கிறார்கள்.

இது தொடர்பாக பொது சுகாதாரம் மற்றும் நோய்த் தடுப்பு மருந்து துறை இயக்குநராகவும், உணவு பாதுகாப்பு ஆணையராகவும் இருந்த டாக்டர்எஸ். இளங்கோ 2018-ம் ஆண்டு பத்திரிக்கைக்கு அளித்த பேட்டியில் கூறியதாவது:-

ஆறு, குளம், ஏரி, கிணறுகளில் பிடிக்கப்படும் மீன்கள் எளிதில் கெட்டுப்போகாது. ஆனால், கடலில் பிடிக்கப்படும் மீன்கள் விரைவாக கெட்டுப்போகும் தன்மை கொண்டவையாகும். இதனால், சிலர் 60 சதவீதம் தண்ணீர், 40 சதவீதம் பார்மாலின் கலவையில் கடல் மீன்களை மூழ்க வைத்து எடுக்கின்றனர். பார்மாலின் கலந்த மீன்கள் 15 நாட்கள் வரை கெட்டுப்போகாமல் இருக்கும் என்பதால், இதுபோன்ற செயல்களில் அவர்கள் ஈடுபடுகின்றனர். ஆந்திரா, தெலங்கானா, மகாராஷ்டிரா உள்ளிட்ட மாநிலங்களிலும் மீன்கள் கெட்டுப்போகாமல் இருக்க பார்மாலின் கலக்கின்றனர். இதேபோல் மீன்கள் கெட்டுப்போகாமல் இருக்க தண்ணீர், பிளீச்சிங் பவுடர் கலவையில் மூழ்க வைத்து எடுத்து பதப்படுத்தியும் விற்பனை செய் கின்றனர்.

பார்மாலின் கலந்த மீனை எளிதில் கண்டுபிடிக்க முடியாது. தற்போதுதான் கடலில் இருந்து பிடித்துவந்த மீன் போலவே இருக்கும். நல்ல மீனை சமைத்து சாப்பிடும்போது சுவை நன்றாக இருக்கும். இதுவே, பார்மாலின் கலந்த மீனை சமைத்து சாப்பிடும் போது சுவை மாறுபடும்.

பிளீச்சிங் பவுடர் கலந்த மீனை எளிதில் கண்டுபிடித்துவிடலாம். பிளீச்சிங் பவுடர் கலந்திருந்தால் மீன்களில் சிறிய அளவில் துர்நாற்றம் வீசும். பார்மாலின் ரசாயனத்தை மனித உடல் ஏற்றுக் கொள்ளாது. இவற்றை தொடர்ந்து சாப்பிட்டு வந்தால் கல்லீரல், இரைப்பை, பெருங்குடல், சிறுகுடல், சிறுநீரகம், கண் நரம்புகள் பாதிக்கப்படும். இந்த உறுப்புகளில் புற்றுநோய் வருவதற்கும் அதிகம் வாய்ப்புள்ளது. இதேபோல் பிளீச்சிங் பவுடர் கலந்த மீன்களை சாப்பிட்டாலும் உடல்நலம் பாதிக்கப்படும்.

கேரள மாநிலம் கொச்சியில் மத்திய கடல் மீன்வள ஆராய்ச்சி நிலையத்தில் மீன்களில் ரசாயனம் கலந்திருப்பதை அறிவதற்கான கருவி கண்டுபிடிக்கப்பட்டு உள்ளது. தமிழக உணவுப் பாதுகாப்புத் துறை அலுவலர்கள் அந்த கருவிகளை பெற்று மீன் மார்க்கெட்களுக்கு சென்று மீன்களில் ரசாயனம் கலந்திருக்கிறதா என்பதை சோதனை செய்யலாம். உணவுப் பாதுகாப்பு மற்றும் தரநிர்ணய சட்டம் – 2006 சட்டத்தை பயன்படுத்தி இதுபோன்ற செயல்களில் ஈடுபடுபவர்கள் மீது கடுமையான நடவடிக்கை எடுக்க வேண்டும். மீன்வளத்துறையும், உணவுப்பாதுகாப்பு துறையும் விழிப்புணர்வை ஏற்படுத்தி பொதுமக்களுக்கு தரமான மீன்கள் கிடைப்பதை உறுதி செய்ய வேண்டும்.

பார்மாலின், பிளீச்சிங் பவுடரை கலந்தால் மீன்கள் கெட்டுப்போகாமல் இருக்கும் என்பதற்கு எந்த ஆராய்ச்சியும், ஆதாரமும் இல்லை. மருத்துவக் கல்லூரி மருத்துவமனைகளில் மாணவர்களுக்கு வகுப்பு எடுக்கவும், உறவினர்கள் வருவதற்கு தாமதமாகும் நேரத்தில் இறந்த உடல்களை பதப்படுத்தவும் பார்மாலின் திரவம் பயன்படுத்தப்படுகிறது. விலங்குகளின் உடல்களும் பார்மாலின் பயன்படுத்தி பதப்படுத்தி வைக்கப்படுகிறது. இதற்குதான் பார்மாலினை பயன்படுத்துகின்றனர்.

சிங்கப்பூர், மலேசியா, தாய்லாந்து போன்ற நாடுகளில் உள்ள அசைவ உணவகங்களில் மீன், நண்டு, இறால் போன்றவற்றை உயிருடன் வைத்திருப்பார்கள். வாடிக்கையாளர்கள் எதை கேட்கிறார்களோ, அதனை உயிருடன் பிடித்து சமைத்துக் கொடுப்பார்கள். ஆனால், நமது நாட்டில் உள்ள எந்த உணவகத்திலும் உயிருடன் இருக்கும் மீன்களை வைத்திருப்பதில்லை. இறந்த மீன்களையே சமைத்துக் கொடுக்கின்றனர் என்று கூறியிருந்தார்.