#CoronaVirus இந்தியாவுக்கு சுற்றுலா வந்த ஈரான் நாட்டினர் 495 பேரை கண்டறிய முடியவில்லை…!

Read Time:1 Minute, 30 Second

இந்தியாவுக்கு சுற்றுலா வந்த ஈரான் நாட்டினர் 495 பேரை கண்டறிய முடியவில்லை என இந்திய வெளியுறவுத்துறை தகவல் தெரிவித்து உள்ளது.

கொரோனா வைரஸ் உலகம் முழுவதும் வேகமாக பரவி வருகிறது. சீனாவிற்கு அடுத்தப்படியாக ஈரான் மற்றும் இத்தாலியில் 100க்கும் அதிகமானோர் உயிரிழந்து உள்ளனர். ஈரானில் 3500க்கும் அதிகமானோர் பாதிக்கப்பட்டு உள்ளனர். இத்தாலியிலிருந்து இந்தியாவிற்கு சுற்றுலா வந்த 16 பேருக்கு கொரோனா வைரஸ் பாதிப்பு ஏற்பட்டு உள்ளது. இதற்கிடையே ஈரானிலிருந்தும் பலர் சுற்றுலா வந்திருப்பது தெரியவந்தது.

ஈரானில் இருந்து இந்தியாவுக்கு சுற்றுலா வந்த 495 பேரை கண்டறிய முடியவில்லை என்று வெளியுறவுத்துறை செய்தித்தொடர்பாளர் ரவீஷ் குமார் தெரிவித்து உள்ளார்.

டெல்லியில் செய்தியாளர்களிடம் பேசிய அவர், கொரோனா வைரஸ் தாக்குதலுக்கு முன் அவர்கள் இந்தியா வந்ததாகவும், இது தொடர்பாக ஈரான் தூதகரத்திடம் எந்த தகவலும் இல்லை என்றும் குறிப்பிட்டு உள்ளார்.

தற்போது இரு நாடுகளுக்கும் இடையே விமான போக்குவரத்து ரத்து செய்யப்பட்டுள்ளது.