டெல்டா பகுதியில் புதிதாக ஹைட்ரோ கார்பன் திட்டத்தை தொடங்க முடியாது – எடப்பாடி பழனிசாமி

Read Time:7 Minute, 51 Second
Page Visited: 52
டெல்டா பகுதியில் புதிதாக ஹைட்ரோ கார்பன் திட்டத்தை தொடங்க முடியாது – எடப்பாடி பழனிசாமி

தமிழக சட்டசபையில் வனம், சுற்றுச்சூழல் துறை மானிய கோரிக்கையில் தி.மு.க. எம்.எல்.ஏ. ரகுபதி (திருமயம்) பேசுகையில், டெல்டா பகுதியை பாதுகாக்கப்பட்ட மண்டலமாக அறிவித்தாலும், ஏற்கனவே இருக்கும் திட்டங்கள் மூலம் 700 கிணறுகள் தோண்டப்பட்டால் அங்கு நிலைமை என்னவாகும்? என்று கேள்வி எழுப்பினார். இதற்கு முதல்-அமைச்சர் எடப்பாடி பழனிசாமி பதில் அளித்தார். அப்போது அவர் பேசுகையில், இனி தமிழகத்தில் புதிதாக ஹைட்ரோ கார்பன் திட்டம் எதுவுமே நடைபெறுவதற்கு வாய்ப்பே கிடையாது. முழுமையான சட்டம் நிறைவேற்றப்பட்டு இருக்கிறது.

ஆனால் இதுபற்றி தி.மு.க. எம்.பி. ஜெகத்ரட்சகன், நாடாளுமன்றத்தில் ஒரு சந்தேகத்தை எழுப்பி இருக்கிறார்.

காவிரி டெல்டாவை பாதுகாக்கப்பட்ட வேளாண் மண்டலமாக எங்களுடைய அரசு அறிவித்து உள்ளது. இந்த அறிவிப்பை சட்டசபையில் நான் அறிவித்தபோதே, “எந்த ஒரு திட்டத்தையும் மாநிலத்தின் எந்த பகுதியிலும் அனுமதிக்கவோ, ரத்து செய்யவோ முடிவெடுக்கும் உரிமை மாநில அரசுக்கே உள்ளது. மத்திய அரசு அதை தடுக்காது. மத்திய மந்திரியே கடிதம் மூலம் ஒப்புதல் வழங்கி உள்ளார்” என்று குறிப்பிட்டு இருக்கிறேன்.

ஏற்கனவே மத்திய மந்திரியிடம் இருந்து ஒப்புதல் கடிதம் வாங்கி உள்ளோம். மத்திய அரசே ஒப்புதல் கொடுத்து கடிதம் அனுப்பிய பின்னரும், தி.மு.க. எம்.பி. இந்த பாதுகாக்கப்பட்ட வேளாண் மண்டல அறிவிப்பை மத்திய அரசின் ஒப்புதல் இல்லாமல் மாநில அரசு எவ்வாறு நடைமுறைப்படுத்த முடியும்? என்று கேள்வி எழுப்பி உள்ளார். மேலும் மத்திய அரசை மீறி மாநில அரசு எவ்வாறு செயல்பட முடியும் என்ற கேள்வியும் கேட்டு இருகிறார். நாங்கள் சட்டமுன்வடிவை கொண்டு வந்து, முழுமையான பாதுகாப்போடு இந்த சட்டத்தை நிறைவேற்றி உள்ளோம்.அவரது அந்த கேள்வியை படிக்கும்போது, மாநில அரசின் உரிமை எது?, மத்திய அரசின் உரிமை எது? என்பது கூட தெரியாமல் எம்.பி. கேள்வி கேட்டு இருக்கிறார்.

தமிழக அரசு வேளாண் பெருமக்களின் நலனுக்காக இந்த சட்டத்தை அரசு கொண்டு வந்தது. ஆனால் தி.மு.க.வுக்கு இது சுத்தமாக பிடிக்கவில்லை என்பது தான் இதில் வெட்டவெளிச்சமாக தெரிகிறது.

முதன் முதலில் ஹைட்ரோ கார்பன் திட்டத்திற்கு ஒப்புதல் அளித்தது தி.மு.க. தான். எங்கள் ஆட்சிக்காலத்தில் இல்லாத ஒரு ஹைட்ரோ கார்பன் திட்டத்திற்கு எதிரான போராட்டங்களை அறிவித்ததும் திமுகதான். ஆக, டெல்டா மாவட்ட விவசாயிகளுக்கு மாநிலத்தில் ஆட்சியில் இருக்கும்போதும், மத்தியில் கூட்டணியில் இருக்கும்போதும், எதுவும் செய்யாமல், தற்போது எங்கள் அரசு கொண்டு வந்த இந்த சட்டத்தை எப்படியாவது நிறுத்த வேண்டும் என்று நாடாளுமன்றத்தில் திமுகவினர் கேள்வி எழுப்பினார்கள். அதைத்தான் குழந்தையையும் கிள்ளிவிட்டு, தொட்டிலையும் ஆட்டுவது என்பார்கள். ஆனால் இவர்களது நாடகம் தமிழக மக்களிடம் ஒருபோதும் எடுபடாது.

மக்களுக்கு நன்மை பயக்கும் சட்டமாக இது இருப்பதால், இது செயல்பாட்டுக்கு வந்துவிட்டால், டெல்டா பகுதியில் திகவினரால் அரசியல் செய்ய முடியாது என்ற பயம் இருக்கிறது என்ற சந்தேகம் தான் எங்களுக்கு எழுகிறது. இது மாநில அரசாங்கத்திற்கு உட்பட்ட சட்டம். மாநில அரசாங்கத்திற்கு உட்பட்ட சட்டத்தின் அடிப்படையிலே தான் சட்டமுன்வடிவை கொண்டு வந்து நிறைவேற்றி உள்ளோம். இதில் எந்த சந்தேகமும் தேவை இல்லை. இனி புதிதாக எந்தவொரு ஹைட்ரோ கார்பன் திட்டத்தையும் தமிழகத்தில் அமல்படுத்த இயலாது, கொண்டுவரவும் இயலாது என்பதை உறுதிபட தெரிவித்து கொள்கிறேன்.

குறைகளே இல்லாமல் தெளிவாகத்தான் இந்த சட்டத்தை நாங்கள் இயற்றி உள்ளோம். உங்களுக்கு விருப்பம் இல்லாமல் இருக்கலாமே தவிர, சட்டத்தில் எந்தவித குளறுபடியும் கிடையாது.நீங்கள் கொண்டு வந்ததை, இவர்கள் தடுக்கிறார்களே என்ற எண்ணம்தான் உங்கள் மனதில் இருக்கிறதோ என்ற சந்தேகம் எங்களுக்கு ஏற்படுகிறது. இதை எப்படியாவது தடுக்க வேண்டும். இதற்கு ஒரு உள்நோக்கம் கொண்டு வந்து, அ.தி.மு.க. ஆட்சியிலே இந்த சட்டம் கொண்டு வரக் கூடாது என்ற எண்ணத்தில் நீங்கள் செயல்படும்போது நாங்கள் என்ன செய்ய முடியும்.

வேண்டுமென்றே திட்டமிட்டு, அங்கே இருக்கிற டெல்டா பாசன விவசாயிகளுக்கு இடையே குழப்பம் ஏற்படுத்துவதற்காக நீங்கள் அதை குறிப்பிட்டிருக்கிறீர்களே தவிர, இந்த சட்டத்தில் எந்த குறைபாடும் இல்லை என்பதை ஆணித்தரமாக தெரிவித்து கொள்கிறேன். டெல்டா பகுதியில் மாநில அரசாங்கம் அனுமதி கொடுத்தால் தான் எதையும் நிறைவேற்ற முடியும். அதற்கு தான் நாங்கள் சட்டமே கொண்டு வந்து நிறைவேற்றி இருக்கிறோம். ஆகவே அதில் உங்களுக்கு எந்த சந்தேகமும் தேவையில்லை.

இனி புதிதாக எந்தவொரு ஹைட்ரோ கார்பன் திட்டத்தையும் கொண்டுவர முடியாது. மாநில அரசிற்கு தான் அதிகாரம் இருக்கிறது. அதை மத்திய மந்திரியும் கூறிவிட்டார். மீண்டும் மீண்டும் ஏதாவது ஒரு பிரச்சினையை உருவாக்கி, நீங்கள் அரசியல் ஆதாயம் தேட முற்பட்டால் நிச்சயம் 100 சதவீதம் நிறைவேறாது எனக் கூறிஉள்ளார். பாதுகாக்கப்பட்ட வேளாண் மண்டலமாக அறிவித்த பிறகு, யாரும் புதிதாக ஹைட்ரோ கார்பன் திட்டத்தை கொண்டுவர முடியாது, அனுமதி கொடுக்கவும் முடியாது எனவும் அவர் தெரிவித்து உள்ளார்.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %