22-ம் தேதி யாரும் வெளியே வராதீர்கள் நாட்டு மக்களுக்கு பிரதமர் மோடி வேண்டுகோள்

உலகையே அச்சுறுத்திவரும் கொரோனா வைரஸ் தாக்கம் இந்தியாவிலும் உள்ளது. இந்தியாவில் கொரோனா வைரஸ் பரவுவதை தடுக்க மத்திய, மாநில அரசுகள் தீவிர நடவடிக்கைகளை மேற்கொண்டு வருகின்றன. இந்தநிலையில், கொரோனா பரவுவதை கட்டுப்படுத்துவது தொடர்பாக பிரதமர் மோடி நேற்று தொலைக்காட்சி மூலம் நாட்டு மக்களுக்கு உரையாற்றினார். அப்போது அவர் பேசுகையில்,

பெருந்தொற்று நோயாக அறிவிக்கப்பட்டுள்ள கொரோனா உலக அளவில் பெரும் அச்சுறுத்தலை ஏற்படுத்தியுள்ளது. கொரோனா வைரசை கட்டுப்படுத்த அரசு தீவிர நடவடிக்கைகளை மேற்கொண்டு வருகிறது. கடந்த 2 மாதங்களாக 130 கோடி இந்திய குடிமக்களும் இதை ஒரு தேசிய பிரச்சினையாக கருதி கொரோனா வைரசை கட்டுப்படுத்த தங்களை முழுமையாக ஈடுபடுத்தி கொண்டுள்ளனர்.

இந்த கொரோனா வைரசை கட்டுப்படுத்த மக்கள் அனைவரும் மிகுந்த எச்சரிக்கையுடன் இருப்பதோடு அரசுக்கு முழு ஒத்துழைப்பு அளிக்கவேண்டும். கொரோனா வைரஸ் பாதித்து இருப்பதை போன்று, முதலாவது, இரண்டாவது உலகப்போரின் போது கூட இத்தனை நாடுகள் பாதிக்கப்பட்டது கிடையாது. இதுபோன்ற தொற்று ஏற்படும் காலத்தில் நாம் ஆரோக்கியமாக இருந்தால், இந்த உலகம் ஆரோக்கியமாக இருக்கும் என்ற தாரக மந்திரமே நம்மை காப்பாற்றும். இதுபோன்ற நோயை புறக்கணிக்கவும், ஆரோக்கியமாக இருக்கவும் பொறுமை மிகவும் அவசியமான ஒன்று.

கொரோனா தொற்றை தடுக்க அறிவியல் ரீதியாக உறுதியான தீர்வு காண இன்னும் முடியவில்லை. இந்த நோய்க்கிருமிக்கு இன்னும் மருந்து கண்டுபிடிக்கப்படவில்லை. இந்த நோயை கட்டுப்படுத்துவதற்காக மருத்துவமனைகள், விமானநிலையங்கள் உள்ளிட்ட முக்கியமான இடங்களில் இரவும், பகலும் பாடுபட்டு வரும் மருத்துவர்கள் மற்றும் மருத்துவ ஊழியர்களுக்கு நாம் அனைவரும் நன்றிக்கடன்பட்டு இருக்கிறோம்.
இந்த நோயில் இருந்த தற்காத்துக்கொள்ள வீட்டுக்குள்ளேயே இருப்பதுதான் பாதுகாப்பான ஒரே வழியாகும்.
எனவே, அடுத்த சிலவாரங்களுக்கு பொதுமக்கள் வீட்டை விட்டு வெளியே வரவேண்டாம் என்று நான் கேட்டுக்கொள்கிறேன். குறிப்பாக 65 வயதுக்கு மேற்பட்டவர்கள் வெளியே வரவேண்டாம். மிகவும் அத்தியாவசிய தேவைகளுக்காக மட்டுமே வெளியேவாருங்கள். வியாபாரம் மற்றும் பணிகளை வீட்டில் இருந்தவாறே செய்ய முயற்சி செய்யுங்கள். நெரிசல் மிகுந்த இடங்களுக்கு செல்வதை தவிர்ப்பதோடு மக்கள் அதிகம் கூடும் நிகழ்ச்சிகளையும் புறக்கணித்து வீடுகளை விட்டு வெளியேறாமல் இருக்கவேண்டிய அவசியம்.

மக்கள் தங்களை தாங்களே தனிமைப்படுத்திக் கொள்வதன் மூலம் மட்டுமே கொரோனா வைரசை கட்டுப்படுத்த முடியும். எனவே வருகிற 22-ம் தேதி மக்கள் ஊரடங்கு கடைபிடிக்குமாறு கேட்டு கொள்கிறேன். அன்று காலை 7 மணி முதல் இரவு 9 மணி வரை யாரும் வீட்டை விட்டு வெளியே வரவேண்டாம் என்று கேட்டுக்கொள்கிறேன். அத்தியாவசிய பணிகளை தவிர்த்து வேறு எதற்காகவும் வெளியே வரவேண்டாம். அன்று மக்கள் தங்களை தனிமைப்படுத்தி கொள்ள வேண்டும்.

அன்று வீட்டுக்குள் இருந்தபடியோ அல்லது பால்கனியில் நின்றபடியோ கைகளை தட்டியோ, மணி அடித்தோ கொரோனாவை ஒழிக்க பாடுபடும் ஊழியர்களுக்கு மக்கள் தங்கள் ஆதரவை தெரிவிக்க வேண்டும். உள்ளூர் நிர்வாகம் அன்று மாலை 5 மணிக்கு சைரன் ஒலி எழுப்பி இதைனை மக்களுக்கு தெரியப்படுத்த வேண்டும்.
இந்த மக்கள் ஊரடங்கு நடவடிக்கையின் மூலமாக எதிர்காலத்தில் ஏற்படும் சவால்களை சந்திப்பதற்கு நம்மை நாம் தயார்படுத்திக் கொள்ள முடியும். இதுபற்றி அடுத்து 2 நாட்கள் மக்களிடையே விழிப்புணர்வை ஏற்படுத்த வேண்டும்.

அத்தியாவசிய பொருட்கள் மக்களுக்கு ஒழுங்காக கிடைப்பதை அரசாங்கம் உறுதி செய்யும். உணவு பொருட்கள், பால், மருந்து பொருட்களின் சப்ளை நிறுத்தப்படமாட்டாது. இவைகள் மக்களுக்கு வழக்கம்போல் கிடைக்கும். உணவுப்பொருட்களுக்கு தட்டுப்பாடு ஏற்படாமல் பார்த்து கொள்ளப்படும். எனவே யாரும் பீதி அடைய தேவையில்லை. மக்கள் பொருட்களை வாங்கி யாரும் பதுக்க வேண்டாம்.

வழக்கமான மருத்துவ பரிசோதனைக்காக மருத்துவமனைக்கு செல்பவர்கள் கூடுமானவரை அதை தவிர்க்குமாறு கேட்டுக்கொள்கிறேன். தேவைப்படும் பட்சத்தில் தொலைபேசி மூலமோ அல்லது குடும்ப மருத்துவரிடமோ அல்லது அருகில் உள்ள மருத்துவரிடமோ உரிய ஆலோசனைகளை பெற்று கொள்ளுங்கள். மிகவும் அத்தியாவசியம் இல்லாத அறுவை சிகிச்சைகளை கூடுமானவரை தள்ளிப்போடுமாறு கேட்டுக்கொள்கிறேன். கொரோனா வைரஸ் பாதிப்பு காரணமாக பொருளாதார ரீதியாக ஏற்படும் பிரச்சினைகள் குறித்து ஆய்வு செய்து உரிய நடவடிக்கைகளை மேற்கொள்ள நிதியமைச்சர் தலைமையில் பொருளாதார மீட்பு பணிக்குழு ஒன்று அமைக்கப்படும்.

இந்த குழு சம்பந்தப்பட்டவர்களுடன் ஆலோசனை நடத்தி அவர்கள் தெரிவிக்கும் கருத்துகளின் அடிப்படையில் உரிய முடிவுகளை எடுக்கும். வைரஸ் பரவல் பிரச்சினையின் காரணமாக நடுத்தர மற்றும் ஏழை மக்கள் பெரிதும் பாதிக்கப்பட்டு உள்ளனர். எனவே அவர்கள் வேலைக்கு வராவிட்டாலும் அவர்களுக்கு உரிய சம்பளத்தை வழங்குமாறு அவர்களுடைய முதலாளிகளை கேட்டுக்கொள்கிறேன். இந்த நெருக்கடியான நேரத்தில் நாட்டு மக்கள் அனைவரும் ஒன்றுபட்டு செயல்பட உறுதி ஏற்போம் எனக் கூறினார்.

Next Post

இந்தி பாடகருடன் நடிகை அமலாபால் 2-வது திருமணம்...

Sat Mar 21 , 2020
தமிழில் மைனா படம் மூலம் பிரலமாகி முன்னணி நடிகையாக உயர்ந்த அமலாபால், ரசிகர்கள் மத்தியில் பெரும் இடத்தை பிடித்திருந்தார். தெய்வத்திருமகள், வேட்டை, தலைவா, நிமிர்ந்து நில், வேலை இல்லா பட்டதாரி, அம்மா கணக்கு, திருட்டு பயலே-2 உள்பட பல வெற்றி படங்களில் நடித்து உள்ளார். சமீபத்தில் ஆடை படத்தில் உடைகள் எதுவும் அணியாமல் நடித்து பரபரப்பை ஏற்படுத்தினார். அமலாபாலுக்கும், இயக்குனர் விஜய்க்கும் 2014-ம் ஆண்டு திருமணம் நடந்தது. பின்னர் கருத்து […]

அதிகம் வாசிக்கப்பட்டவை