ஏப்ரல் 14-ம் தேதி வரை அனைத்துப் பயணிகள் ரெயில்களும் ரத்து… புறநகர் சேவையும் இருக்காது

Read Time:2 Minute, 17 Second

இந்தியாவில் கொரோனா வைரஸ் பரவுவதை தடுக்கும் முயற்சியாக 21 நாட்கள் ஊரடங்கு உத்தரவை பிரதமர் மோடி நேற்று அறிவித்தார். நேற்று நள்ளிரவு முதல் இந்த ஊரடங்கு உத்தரவு அமலுக்கு வந்தது.

கொரோனா வைரஸ் நாடு முழுவதும் தீவிரமாக பரவுவதை தடுக்கும் வகையில் மத்திய அரசும், மாநில அரசுகளும் பல்வேறு தடுப்பு, முன்னெச்சரிக்கை நடவடிக்கைகளை எடுத்து வருகின்றன.

கடந்த 22-ம் தேதி முதல் மார்ச் 31-ம் தேதி வரை அனைத்து பயணிகள் ரெயில் சேவையும் நிறுத்தப்படுவதாக ரெயில்வே துறை அறிவித்தது. பின்னர் பயணிகள் டிக்கெட் முன்பதிவு செய்திருந்தால், பிடித்தம் இல்லாமல் கட்டணம் திரும்ப வழங்கப்படும் எனவும் தெரிவிக்கப்பட்டது. இந்தியா முழுவதும் ரெயில் நிலையங்கள் காவல்துறையின் கட்டுப்பாட்டுக்குள் கொண்டுவரப்பட்டது.

பயணிகள் ஜூன் 21-ம் தேதி வரையில் முன்பதிவு செய்து உள்ள டிக்கெட்டுகளை ரத்து செய்து கட்டணத்தை திரும்பப் பெறலாம் என தெரிவிக்கப்பட்டுள்ளது.

தற்போது ஏப்ரல் 14-ம் தேதி வரை பயணிகள் ரெயில் சேவையை நிறுத்துவதாக ரெயில்வே துறை அறிவித்து உள்ளது. அதேசமயம், அத்தியாவசியப் பொருட்களை கொண்டு செல்லும் சரக்கு ரெயில் போக்குவரத்து தொடர்ந்து செயல்படும் என்று தெரிவிக்கப்பட்டு உள்ளது. பெருநகரங்கள் அனைத்திலும் புறநகர் ரெயில்களும் இயங்காது.

இதற்கிடையே ரெயில்வே துறை நேற்று வெளியிட்ட மற்றொரு அறிவிப்பில், தங்களின் உற்பத்தி தொழிற்சாலையில் மருத்துவமனைக்கு தேவையான கட்டில்கள், சுயதனிமைக்கான வசதிகள், உள்ளிட்ட பொருட்களை தயார் செய்தவதற்கான சாத்தியங்களை ஆய்வு செய்து அதை உற்பத்தி செய்து வழங்கும். கொரோனாவுக்கு எதிராகப் போராடும் என தெரிவித்து உள்ளது.