#IndiaFightsCorona ‘வாழ்வா, சாவா’ போரில் கடினமான முடிவு; மன்னிப்புக் கேட்கிறேன் – பிரதமர் மோடி பேச்சு விபரம்:-

இந்தியா கொரோனா வைரஸ் பரவலை தடுக்க போராடி வருகிறது. மக்கள் நடமாட்டத்தை தடுக்க மத்திய அரசு 21 நாட்கள் ஊரடங்களை அமல் படுத்தியுள்ளது. இதற்கிடையே தினக்கூலி தொழிலாளர்கள் முழு அடைப்பால் பாதிக்கப்பட்டு உள்ளனர். அவர்கள் தங்களுடைய சொந்த ஊருக்கு செல்ல பஸ் மற்றும் ரெயில் வசதியில்லாததால் பெரும் சிரமத்தில் பசியுடன் தவிக்கும் நிலையும் இருக்கிறது. இந்நிலையில் தங்களுடைய சொந்த ஊருக்கு மக்கள் நடந்தே செல்கிறார்கள். இவ்விவகாரத்தில் அரசு விமர்சனங்களை எதிர்க்கொண்டது. இதனையடுத்து ஒவ்வொரு மாநில அரசுக்களும் தங்களுடைய மாநில மக்களை பிற மாநிலங்களில் இருந்து அழைத்துவர பஸ்களை ஏற்பாடு செய்துள்ளன.

ஆனால், கொரோனா வைரஸ் சமூக பரவலை தடுக்க மக்கள் கூட்டமாக கூடுவதை தவிர்க்க வேண்டிய அவசியம் உள்ளது. இதனால், மற்றொரு நெருக்கடியான நிலை தென்படுகிறது. பிற மாநிலங்களில் இருந்து வரும் தங்கள் மாநில மக்களை தனிமைப்படுத்த நடவடிக்கை எடுக்க வேண்டும் என அரசு தரப்பில் கேட்டுக்கொள்ளப்பட்டுள்ளது. பிரதமர் நரேந்திர மோடி ஒவ்வொரு மாதத்திலும் கடைசி ஞாயிற்றுக்கிழமையன்று வானொலியில் ‘மன் கி பாத்’ என்ற நிகழ்ச்சியில் பிரதமர் மோடி பேசி வருகிறார். அந்த வகையில் இன்று பிரதமர் மோடி மக்களுக்கு உரையாற்றினார்.

பிரதமர் மோடி பேசுகையில், கொரோனா வைரஸ் தொற்றுநோய்க்கு எதிரான போராட்டத்தில் இந்தியர்கள் பல நாட்கள் பொறுமையாக இருக்க வேண்டியிருக்கும்; மக்களுக்கு ஏற்பட்ட சிரமத்திற்கு மன்னிப்பு கோருகிறேன் என்றார்.

உங்களிடம் நான் மன்னிப்பு கோருகிறேன். என்னை மன்னித்துவிடுவீர்கள் எனறு நம்புகிறேன். என்னுடைய ஏழை எளிய சகோதரர்கள், சகோதரிகளை பார்க்கையில் எங்களை பிரதமர் இப்படி சிக்கலில் வைத்துவிட்டாரே என்று சொல்வார்கள் என்பதை உறுதியாக உணர்கிறேன். அவர்களிடம் நான் மன்னிப்பு கோருகிறேன். நீங்கள் பிரச்சினையில் இருந்து வருகிறீர்கள். உங்களின் பிரச்சினைகள் எனக்கு புரிகிறது. ஆனால், 130 கோடி மக்கள்தொகை கொண்ட நம்நாட்டில் கொரோனா வைரஸை ஒழிக்க இதை தவிர்த்து வேறு வழி எதுவும் தெரியவில்லை.

கொரோனா வைரசை ஒழிக்க முழுஅடைப்பு மட்டுமே வழியாக உள்ளது. உலகநாடுகளும் இதனைதான் செயல்படுத்தி வருகிறது. உங்களின் பாதுகாப்பும், உங்கள் குடும்பத்தாரின் பாதுகாப்பும் முழு அடைப்பால் உறுதி செய்யப்பட்டுள்ளது. இதனால், உங்களுக்கு அசவுகரியங்கள், கடினமான சூழல்கள் ஏதேனும் இருந்தால்; நீங்கள் சந்தித்தால் மீண்டும் ஒருமுறை மன்னிப்பு கேட்டுக்கொள்கிறேன்.

எந்த நோயையும் தொடக்கத்திலேயே கிள்ளி எறிந்துவிட வேண்டும் என நம்முடைய முன்னோர்கள் கூறுவார்கள். அப்படியில்லையென்றால் அது வளர்ந்து பெரிதாகும், குணப்படுத்துவது கடினமாகிவிடும். கொரோனாவை தொடக்கத்திலே கிள்ளிவிடவே இந்த நடவடிக்கை எடுக்கப்பட்டுள்ளது. கொரோனா வைரஸால் பாதிக்கப்பட்டவர்கள் வீடுகளில் தனிமைப்படுத்தப்படும்போது விரும்பத்தாகத சம்பவங்கள் மோசமாக மற்றவர்களால் நடத்தப்படும் சம்பவங்களை கேட்பது துரதிர்ஷ்டவசமானது. இதனால் மிகவும் வேதனையடைந்தேன். தற்போது நிலவும் சூழலை நன்கு புரிந்து கொள்ளவேண்டும். நமக்கு சமூக விலகல் மிகவும் அவசியமானது. மனிதநேய விலகல், உணர்ச்சி விலகல் கிடையாது.

கொரோனா வைரசால் பாதிக்கப்பட்டவர்கள், தனிமைப்படுத்தப்பட்டவர்கள் ஒன்றும் கிரிமினல்கள் கிடையாது.

தனிமைப்படுத்தப்படுபவர்கள் அனைவரும் கொரோனா வைரஸ் தொற்று இருக்கும் என சந்தேகிக்கப்படும் நபர்கள் மட்டுமே. அவர்கள் தனிமையில் இருப்பது தங்களையும், மற்றவர்களும் நோய் தொற்றுக்கு ஆளாக்காமல் இருப்பதற்குதான் என்பதை புரிந்து செயல்பட வேண்டும். கொரோனா வைரஸ் மனிதர்களை கொல்கிறது என்பதால் ஒட்டுமொத்த மனித சமுதாயமும் இணைந்து அதை எதிர்த்து, ஒழிக்க வேண்டும்.

எனவே முழு அடைப்பு என்பது உங்களை தற்காத்து கொள்வதற்கான வாய்ப்பாகும். அதனால் உங்களையும், உங்கள் குடும்பத்தையும் பாதுகாக்கலாம். அடுத்து வரும் நாட்களில் நீங்கள் பொறுமையாக இருந்து லட்சமண ரேகையை தாண்டாமல் இருக்க வேண்டியது அவசியமாகும். இந்த 21 நாட்கள் முழுமையாக மதிக்காதவர்களுக்கு கடுமையான எச்சரிக்கை விடுக்கிறேன்.

எல்லோரும் சட்டத்தை மீறி வேண்டுமென்றே செல்வது கிடையாது. ஆனால், சிலர் சட்டத்தை மீறிச் செயல்படுகிறார்கள். அவர்கள் கொரோனா வைரஸ் குறித்தும், அதன் தீவிரம் குறித்தும் புரிந்துகொள்ள வேண்டும். நான் அவர்களுக்கு சொல்வதெல்லாம் முழுஅடைப்பு விதிகளுக்கு நீங்கள் கட்டுப்படாவிட்டால், இந்த மோசமான கொரோனா வைரஸிடமிருந்து நம்மை காப்பது கடினமாகும்.

உலகில் பல நாடுகளை சேர்ந்தவர்கள் விதிமுறைகளை மதிக்காமல் வெளியே சென்று இப்போது வருத்தப்படுகிறார்கள், மற்றவர்கள் உயிரோடு விளையாடி வருகிறார்கள். மற்றவர்கள் எளிதாக வாழ்க்கை நடத்த உதவும் மக்கள் ஹீரோக்கள்தான். குறிப்பாக பிளம்பர்கள், எலக்ட்ரீசியன், மளிகை கடை உரிமையாளர்கள், டெலிவரி செய்பவர்கள், தொலைத்தொடர்பு, இன்டர்நெட் பராமரிப்பாளர்கள் அனைவரும் ஹீரோக்கள் ஆவர். கொரோனா வைரசை எதிர்த்து மருத்துவர்கள், செவிலியர்கள், பாரா-மெடிக்கல் ஊழியர்கள், ஆஷா ஊழியர்கள், சுகாதாரப் பணியாளர்கள், அங்கன்வாடி பணியாளர்கள் ஆகியோரை வைத்து போரிடுகிறது.

இந்திய தேசம் உங்களின் உடல்நலத்தில் அக்கறையாக இருக்கிறது. 20 லட்சம் பணியாளர்கள் மருத்துவ பணியில் இருக்கிறீர்கள் என்பதை அறிவேன். உங்களுக்காக அரசு ரூ.50 லட்சம் காப்பீட்டை அறிவித்து உள்ளது. இந்த போரில் நாட்டை நீங்கள் முன்னெடுத்து செல்ல வேண்டும். இந்த 21 நாட்கள் ஓய்வு நாட்களை உங்களை முழுமையாக ஆக்கபூர்வமாக பயன்படுத்துங்கள். பழைய நண்பர்களுடன் அமர்ந்து பேசுங்கள் எனக் கூறினார்.

Next Post

#IndiaFightsCorona 21 நாள் ஊரடங்கு மேலும் நீடிக்கப்படுமா? மத்திய அரசு பதில்

Mon Mar 30 , 2020
கொரோனா வைரஸ் பரவலை கட்டுப்படுத்தும் விதமாக கொண்டுவரப்பட்ட 21 நாள் ஊரடங்கு மேலும் நீட்டிக்கப்படுமா? என்ற கேள்விக்கு மத்திய அரசு பதில் அளித்து உள்ளது. இந்தியாவில் கொரோனா வைரஸ் பாதிப்பு காணப்பட்டதும் பிரதமர் மோடி 21 நாள் ஊரடங்கை அமல்படுத்தினார். இன்று ஆறாவது நாளாகும். ஊரடங்கினால் இந்தியாவில் கொரோனாவின் தாக்கம் குறைந்துள்ளது. இருப்பினும், உயிரிழப்பு மற்றும் பாதிப்பு எண்ணிக்கை மெல்ல உயர்ந்து செல்கிறது. இந்தியாவில் கொரோனாவினால் பாதிக்கப்பட்டவர்கள் எண்ணிக்கை ஆயிரத்தை […]

அதிகம் வாசிக்கப்பட்டவை