#IndiaFightsCorona வெளிமாநில தொழிலாளர்களை தடுத்து நிறுத்துங்கள் மாநிலங்களுக்கு மத்திய அரசு உத்தரவு

Read Time:4 Minute, 20 Second
Page Visited: 42
#IndiaFightsCorona வெளிமாநில தொழிலாளர்களை தடுத்து நிறுத்துங்கள் மாநிலங்களுக்கு மத்திய அரசு உத்தரவு

இந்தியாவில் கொரோனா பரவுவதை தடுக்க நாடு முழுவதும் வருகிற ஏப்ரல் 14-ம் தேதி வரை ஊரடங்கு உத்தரவு பிறப்பிக்கப்பட்டு உள்ளது. அத்தியாவசிய பொருட்களை ஏற்றிச் செல்லும் சரக்கு வாகனங்களுக்கு மட்டும் அனுமதி வழங்கப்பட்டு உள்ளது.

போக்குவரத்தை கட்டுப்படுத்த மாவட்ட, மாநில எல்லைகள் மூடப்பட்டு உள்ளன. இதனால் , மக்களின் இயல்பு வாழ்க்கை பெரிதும் பாதிக்கப்பட்டு இருக்கிறது. ஊரடங்கு உத்தரவையும் மீறி சில மாநிலங்களில் உள்ள வெளிமாநில தொழிலாளர்கள் தங்கள் சொந்த ஊர்களுக்கு கூட்டம் கூட்டமாக நடந்தே செல்கிறார்கள். வடமாநிலங்களில் ஒரே நேரத்தில் ஏராளமானோர் செல்வதால் அவர்களுக்கும், அவர்களால் மற்றவர்களுக்கும் கொரோனா வைரஸ் பரவும் ஆபத்து ஏற்பட்டு உள்ளது.

இதனையடுத்து ஊரடங்கு நடவடிக்கையை மீறி வெளிமாநில தொழிலாளர்கள் தங்கள் சொந்த ஊர்களுக்கு செல்வதை தடுத்து நிறுத்த வேண்டும் என்று கேட்டுக்கொள்ளப்பட்டது. இது தொடர்பாக மத்திய அரசின் சார்பில் அறிக்கை ஒன்று வெளியிடப்பட்டது. அந்த அறிக்கையில், ஊரடங்கு உத்தரவு அமலில் இருக்கும் நாட்களில் மாவட்ட மற்றும் மாநில எல்லைகள் மூடப்பட்டு இருப்பதையும், போக்குவரத்து தடை செய்யப்பட்டு இருப்பதையும், வெளிமாநில தொழிலாளர்கள் வெளியேறாமல் இருப்பதையும் மாநில அரசுகள் உறுதி செய்ய வேண்டும்.

அத்தியாவசிய பொருட்களை கொண்டு செல்லும் சரக்கு வாகனங்களை மட்டுமே அனுமதிக்க வேண்டும். மாநில எல்லை தாண்டி செல்லும் தொழிலாளர்களை தடுத்து நிறுத்தி குறைந்த பட்சம் 14 நாட்கள் தனிமைப்படுத்தி ஒரு குறிப்பிட்ட இடத்தில் வைக்க நடவடிக்கை எடுக்க வேண்டும். அங்கு அவர்களுக்கு தேவையான உணவு உள்ளிட்ட அடிப்படை வசதிகளை செய்து கொடுக்க வேண்டும்.
அவர்களுக்கு உணவு உள்ளிட்ட வசதிகள் கிடைப்பதை அந்தந்த மாவட்ட ஆட்சியர்கள், போலீஸ் சூப்பிரண்டுகள் உறுதி செய்ய வேண்டும். ஊரடங்கு உத்தரவு தொடர்பான வழிமுறைகள் முறையாக பின்பற்றப்படுகிறதா என்பதை 24 மணி நேரமும் கண்காணிக்க வேண்டும். இதற்கு தேவையான நிதியை மாநில பேரிடர் மீட்பு நிதியில் இருந்து பயன்படுத்திக்கொள்ளுமாறு மாநில அரசுகளுக்கு உத்தரவிடப்பட்டு உள்ளது.

ஊரடங்கு அமலில் இருக்கும் காலக்கட்டத்தில் தொழிலாளர்களுக்கு அவர்கள் வேலைபார்க்கும் நிறுவனங்களிடம் இருந்து உரிய நேரத்தில் பிடித்தம் இல்லாமல் சம்பளம் கிடைப்பதை மாநில அரசுகள் உறுதி செய்ய வேண்டும். இந்த காலகட்டத்தில் தொழிலாளர்களிடம் இருந்து வாடகை கேட்கக்கூடாது. வாடகை செலுத்தாதற்காக தொழிலாளர்களையும், மாணவர்களையும் வெளியேற்ற முயற்சிக்கும் வீட்டின் உரிமையாளர்கள் மீது நடவடிக்கை எடுக்கப்பட வேண்டும்.

கொரோனா பரவுவதை தடுப்பதற்காக பிறப்பிக்கப்பட்டுள்ள ஊரடங்கு உத்தரவை திறம்பட அமல்படுத்துவதை மாநில மற்றும் யூனியன் பிரதேச அரசுகள் உறுதி செய்ய வேண்டும் என தெரிவிக்கப்பட்டுள்ளது.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %